Yeso aki ekekɔ la Samariya kana la Ngalileya. Afarisɛ wakawoke dimbola diendana la oyelo wa Diolelo diakawafɔnyaka dia diayoya lo woho wayɛnama le anto tshɛ ndo sɛlɛmɔnyi ya weke yayosalema. Koko nde akate ate: “Diolelo dia Nzambi hadiotoya lo woho wayɛnama le anto tshɛ. Ndo anto hawotota vate: ‘Eenda diɔ nɛ diele lanɛ!’ kana ɔnɛ: ‘Eenda diekɔ lɛnɛ!’ nɛ dia, nyolonge, Diolelo dia Nzambi diekɔ l’atei anyu.”​—Luka 17:20, 21.

Anto amɔtshi wakakoke mbɔsa dia Yeso akataka dia ɛlɔmbwɛlɔ ka Diolelo kekɔ l’etema w’ekambi waki Nzambi. Dui sɔ hadiokoke monga ngasɔ, nɛ dia Diolelo hakoke monga l’etema wa Afarisɛ wanɛ wakatɛkɛtaka la Yeso. Koko, diɔ diekɔ l’atei awɔ nɛ dia Yeso ɔnɛ lakasɔnama Nkumekanga ka Diolelo dia Nzambi ekɔ l’atei awɔ.​—Mateo 21:5.

Ondo l’ɔkɔngɔ wa Afarisɛ ntshɔ, Yeso akanyomolembetshiya ambeki ande awui akina wendana la oyelo wa Diolelo. Oko wayodionga lo woongelo ande lo lowandji la Diolelo, nde akate ntondo ate: “Nshi yayoya yayonyokombola mɛna kaanga lushi ɔtɔi l’atei wa nshi ya Ɔna onto, koko hanyotoliɛna.” (Luka 17:22) Yeso akɛnyaka dia ɛlɔmbwɛlɔ k’Ɔna onto lo Diolelo kayonga lo nshi yayaye. La ntondo k’etena kɛsɔ koka, ambeki amɔtshi mbeyaka nomɔlomɔ efula dia mbeya etena kayosalema dui sɔ, koko vɔ wayohomba ntetemala nkonga polo l’etena kakashikikɛ Nzambi k’Ɔna onto ndja.

Yeso akatetemala ate: “Naka anto wambonyotɛ vate: ‘Nyende lanɛ!’ kana ɔnɛ: ‘Nyende lɛnɛ!’ tanyotshɔke ndo tanyaayelake. Nɛ dia oko watɛnamaka osase wa dingadimu dia mvula oma lo koma mɔtshi ya l’ɛse olongo polo lo koma nkina ya l’ɛse olongo, ngasɔ mbayonga Ɔna onto lo lushi lande.” (Luka 17:23, 24) Ngande wayoyakokɛ ambeki wa Yeso diaha ndjela mɛsiya wa kashi? Yeso akate dia oyelo wa Mɛsiya wa mɛtɛ wayoyala oko osase wa dingadimo wayɛnama l’ɛtshi ka woke. Tolembetelo ta woongelo ande lo lowandji la Diolelo tayɛnama dimɛna le anto tshɛ wayendaka.

Oma laasɔ, Yeso akasale wɛdikelo w’akambo wakete dia mɛnya waonga wayonga l’anto l’etena kayaye kɛsɔ ate: “Oko wakidiɔ lo nshi ya Nɔa, ngasɔ mbayoyala lo nshi ya Ɔna onto . . . Ngasɔ mbakidiɔ lo nshi ya Lɔta: Anto wakalɛka, wakanɔka, wakasombaka, wakasondjaka, wakonɛka ndo wakakaka mvudu. Koko lushi lakatombe Lɔta oma la Sɔdɔma, mvula ka dja ndo ka mbɔkɔ kakalɔ oma l’olongo ndo kakaadiake vɔ tshɛ. Ngasɔ mbayonga ndo lushi layɛnama Ɔna onto.”​—Luka 17:26-30.

Yeso kombutaka dia anto wa lo nshi ya Nɔa ndo ya Lɔta wakalanyema nɛ dia wakayashaka l’akambo wokosalaka anto wele oko ndɛ, nnɔ,  nsomba, nsondja, monɛ ndo mbika mvudu. Nɔa, Lɔta ndo nkumbo yawɔ wakayashaka lo yɛdikɔ mɔtshi l’akambo asɔ. Koko anto akina wakasalaka dui sɔ aha la mbidja yimba lo lolango la Nzambi ndo vɔ kombidja yimba l’etena kakawasɛnaka. Ɔnkɔnɛ, Yeso akalakaka ambeki ande dia mbidja yimba lo lolango la Nzambi ndo ndjasha tshɛ dia lisala. Laasɔ nde akawaɛnyaka yoho ya vɔ ndjoka, mbuta ate yoho ya vɔ ntetemala nsɛna etena kayela Nzambi elanyelo lo nshi yayaye.

Ambeki wayohomba mbewɔ diaha diangɔ dia l’andja wasɛnawɔ, “diangɔ diaka[w]atshike l’ɔkɔngɔ” mbekola timba tawɔ. Yeso akate ate: “Lo lushi lɔsɔ, onto lele lo tshoto ya luudu ndo lele la diangɔ diande l’etei ka luudu atoholɔke dia ndjodiɔsa ndo woho akɔ waamɛ, ɔnɛ lele l’ekambɔ atokalolake lɛnɛ ele diangɔ diakandatshike l’ɔkɔngɔ. Nyohɔ wadi a Lɔta.” (Luka 17:31, 32) Nde akakome ekundji ka lɛɛhɔ.

Lo ntetemala ntɛkɛta dia kɛnɛ kayosalema lam’ayolɛ Ɔna onto oko Nkumekanga, Yeso akatɛ ambeki ande ate: “L’otsho ɔsɔ, anto 2 wayonga lo mbeto 1, wayɔsa ɔmɔtshi ko ntshika okina.” (Luka 17:34) Anto amɔtshi wayokondja panda koko akina wayotshikala, wayoshisha nsɛnɔ yawɔ.

Ambeki wakambola ɔnɛ: “Lende na, Nkumadiɔndjɔ?” Ko Yeso akakadimola ate: “Lɛnɛ ele odo mbayosangana ndo mpongo.” (Luka 17:37) Eelo, amɔtshi wayonga oko mpongo yɛna etale. Ambeki asɔ wayotshumana le Kristo ka mɛtɛ, mbuta ate Ɔna onto. L’etena kayaye kɛsɔ, Yeso ayosha ambeki ande akambo wa mɛtɛ washa lɔsɛnɔ le wanɛ wele la mbetawɔ.