Wɛɛla wa ɔna lakashishɔ w’oma la kɔndɔla Yeso akahombe mambiya afutshanyi w’elambo, afundji ndo Afarisɛ wakoohokamɛka, wakoke dia Nzambi nangaka dimanyi atshi wa pɛkato wayatshumoya. (Luka 15:1-7, 11) Kakianɛ, Yeso osawola l’ambeki ande. Nde ambokamba la wɛɛla okina wendana la pami kɛmɔtshi k’ɔngɔnyi kakoke dia jɛra kana olami wa diangɔ diande hayokamba olimu dimɛna.

Yeso akate dia wakayofunda olami ɔsɔ dia nde hayokamba dimɛna la diangɔ di’owandji ande. Ɔnkɔnɛ, owandji ande akate dia minya olami ɔsɔ l’olimu. Olami ɔsɔ akakane yimba ate: “Ahombami nsala lam’ele owandji ayanga minyami l’olimu? Dimi bu la wolo wa nkamba dikambɔ ndo lekɔ lo mboka nsɔnyi nɔmbana.” Dia ndjalɔngɔsɔlɛ nshi yayaye, nde akate ate: “Lambeya kɛnɛ kahombami nsala kele lam’ayowominya l’olimu, anto kawonongole lo mvudu yawɔ.” Mbala kakɔ ɔtɔi nde akelɛ wanɛ waki la abasa ko akawambola ate: “Okolamiyɛ le owandji ami?”​—Luka 16:3-5.

Onto la ntondo akate ate: “Tɛdikɔ 100 t’esɔ k’ɔlivɛ.” Ɔsɔ ekɔ litrɛ 2 200 y’esɔ. Ɔnɛ lakakolama akahombe monga la ekambɔ ka woke ka ɔlivɛ kana monga onto lakasalaka okanda w’esɔ. Olami akawotɛ ate: “Ɔsa mukanda ayɛ wa sɔmbɔ, djasɛ kele funda nto esadi wate: 50 [litrɛ 1 100].”​—Luka 16:6.

Olami akambola onto okina laki la dibasa ate: “Ko wɛ okolamiyɛ?” Nde akakadimola ate: “Tɛdikɔ ta weke 100 t’eponga.” Ɔsɔ aki litrɛ 22 000. Olami akatɛ ɔnɛ laki la dibasa ate: “Ɔsa mukanda ayɛ wa sɔmbɔ kele funda wate: 80.” Lo nsala ngasɔ, nde akakitshakitasha dibasa lo pursa 20.​—Luka 16:7.

Olami eke l’ɔkɛndɛ wa menda awui wa falanga y’owandji ande, laasɔ nde eke la lotshungɔ la nkitshakitsha abasa wokolami anto le owandji ande. Lo nkitshakitsha lofulo la diangɔ diokolami anto, olami ɔsɔ ekɔ lo mbɔtɔ lɔngɛnyi l’anto wakoka ndjosalɛ ɔlɔlɔ lam’ayoshila olimu ande.

Owandji ande akayeya kɛnɛ kakasalema. Kaanga mbele kɛnɛ kakasalema akalembetshiya dia nde shisha, nde akaambe lo kɛnɛ kakasale olami ndo akawandola nɛ dia “kaanga mbakinde onto a kɔlɔ,” nde “akasale akambo la lomba.” Yeso akakotsha ate: “Anto wa lo dikongɛ nɛ di’akambo wekɔ la lomba l’oshika otsha le lɔlɔnga lawɔ hita oleki ana w’osase.”​—Luka 16:8.

Yeso konanga mɛnya dia kɛnɛ kakasale olami ɔsɔ kaki dimɛna, kana nde kokeketsha anto diaha monga la losembwe l’awui w’okanda. Ko akandalange mbuta? Nde akakeketsha ambeki ande ate: “Nyoyayange angɛnyi l’ekimanyielo k’ekundji wa kɔlɔ kele lam’ayowoshila, angɛnyi akɔ kawonyolongole l’ahole wa pondjo.” (Luka 16:9) Eelo, wetshelo w’ohomba efula wekɔ lanɛ wendana la mɛna akambo la ntondo ndo nkamba la lomba l’oshika. Ekambi wa Nzambi, “ana w’osase,” pombaka nkamba la diangɔ diawɔ dia lemunyi la lomba ndo hawohombe mbohɛ elongamelo ka nshi yayaye ya pondjo.

 Paka Jehowa Nzambi la Ɔnande mbakoka nongala onto lo Diolelo dia l’olongo kana lo Paradiso ka la nkɛtɛ l’ɛlɔmbwɛlɔ ka Diolelo sɔ. Sho pombaka nsala la wolo dia mbɔtɔ lɔngɛnyi la wɔ lo nkamba la ɛngɔnyi wele laso dia nsukɛ wahɔ wa Diolelo. Lo nsala ngasɔ, elongamelo kaso ka ndjɔsɛna pondjo pondjo kayonga shikaa etena kayolana paonyi, mfɛsa ndo ɛngɔnyi ekina wa l’emunyi.

Yeso akate nto dia wanɛ wele la kɔlamelo lo nkokɛ ndo lo nkamba la ɛngɔnyi kana diangɔ dia l’emunyi diele la wɔ wayonga la kɔlamelo dia nkokɛ awui woleki ohomba. Yeso akate ate: “Ɔnkɔnɛ, naka hanyɛnyisha kɔlamelo yanyu lo ekundji wa kɔlɔ, onto akɔna ayonyosha ekundji wele mɛtɛ [ɛnyɛlɔ oko wahɔ wa Diolelo]?”​—Luka 16:11.

Yeso akɛnyaka ambeki ande dia wayowalɔmba akambo efula naka vɔ nangaka nongola “ahole wa pondjo.” Onto hakoke monga okambi wa mɛtɛ wa Nzambi ko l’etena kakɔ kaamɛ monga mfumbe ka ɛngɔnyi wa kɔlɔ, kana lomombo la l’emunyi. Yeso akakomiya ate: “Ndooko ose olimu lakoka kambɛ ewandji 2 olimu, nɛ dia nde ayohetsha ɔmɔtshi, ko ayolanga okina kana nde ayɛkama ɔmɔtshi, ko ayɛkɔ okina. Nyu hanyokoke kambɛ Nzambi la ɛngɔnyi olimu.”​—Luka 16:9, 13.