Yeso aki oma la mbutɛ ampokami ande la Pereya dia “anto efula wele la ntondo wayonga l’ɔkɔngɔ ndo wanɛ wele l’ɔkɔngɔ wayonga la ntondo.” (Mateo 19:30) Nde akadje dikako vɔlɛ l’etelo kɛsɔ lo mbisha wɛɛla wendana la ase olimu l’ekambɔ ka vinyɔ ate:

“Diolelo dia l’olongo diekɔ oko owandji wa luudu ɔmɔtshi wakatombe la pindju ka pɛɛ dia toyanga ase olimu dia tokamba l’ekambɔ kande ka vinyɔ. L’ɔkɔngɔ wa nde mbokana l’ase olimu dia mbafuta dɛnariyo 1 lo lushi, nde akaatome l’ekambɔ kande ka vinyɔ. Lam’akandatombe nto oya lo wonya wa 3, nde akɛnyi anto akina wemadi lo lobingu aha l’olimu wa nkamba; ko nde akawatɛ ate: ‘Nyu lawɔ, nyotshu l’ekambɔ ka vinyɔ, ko layonyofuta kɛnɛ kahombanyu nongola.’ Ko vɔ wakatshu. Nde akatombe nto oya lo wonya wa 6 ndo oya lo wonya wa 9, ko akasale woho akɔ waamɛ. L’ekomelo, oya lo wonya wa 11, nde akatombe ndo akatane anto akina wemadi ko nde akawambola ate: ‘Lande na kemadinyu lanɛ lushi l’otondo aha l’olimu wa nkamba?’ Vɔ wakawotɛ vate: ‘Nɛ dia ndooko onto lakatɔshi l’olimu.’ Ko nde akawatɛ ate: ‘Nyu lawɔ nyotshu l’ekambɔ ka vinyɔ.’”​—Mateo 20:1-7.

Ampokami wa Yeso wakɔshi dia ekɔ Jehowa Nzambi mbatɛkɛtande etena kakawoke nde ata dia “Diolelo dia l’olongo” ndo “owandji wa luudu.” Afundelo mɛnyaka dia Jehowa mbele kanga ekambɔ ka vinyɔ kele didjidji dia wodja w’Isariyɛlɛ. (Osambo 80:8, 9; Isaya 5:3, 4) Wanɛ wele lo sheke y’Ɛlɛmbɛ mbɛdikamaka la ase olimu wa l’ekambɔ ka vinyɔ. Koko, Yeso kɔtɛkɛtaka di’akambo wakete. Nde akatɛkɛtaka dikambo diakasalema lo nshi yande.

Ewandji w’ɔtɛmwɛlɔ l’ɛnyɛlɔ ka Afarisɛ wanɛ wele atet’edja wakahembe Yeso lo kɛnɛ kendana l’odiakelo wa diwala mbahomba ntetemala nkamba wolo l’olimu wa Nzambi. Vɔ mbele oko ase olimu wakakambe olimu lushi l’otondo, wakalongamɛka difuto dia lushi l’otondo, mbuta ate dɛnariyo ɔtɔi.

Ɛlɔmbɛdi ndo ewandji ekina w’ɔtɛmwɛlɔ wakɔsaka ase Juda akina dia wakakambɛka Nzambi yema tshitshɛ, oko ekambi wakakambaka yema tshitshɛ l’ekambɔ ka vinyɔ ka Nzambi. Lo wɛɛla wa Yeso, vɔ waki anto wakayokambaka “oya lo wonya wa 3” (mbuta ate eshidi 9 wa pindju) kana l’ɔkɔngɔ lo lushi l’olimu, wonya wa samalo, wa divwa ndo l’ekomelo wonya wa dikumi l’ɔtɔi (mbuta ate, oya lo eshidi 5 wa dikɔlɔ).

Apami ndo wamato wakayelaka Yeso wakɔsamaka oko anto “wambodjama mananu.” (Joani 7:49) L’etena k’otale ka nsɛnɔ yawɔ, vɔ waki amundji wa nse ndo akambi w’elimu wa wolo. Koko, lo eleko k’ɔlɔ akatshi ka 29 T.D., “kanga ekambɔ” akatome Yeso dia telɛ anto k’anto asɔ dia kambɛ Nzambi olimu oko ambeki wa Kristo. Vɔ wekɔ anto wa “l’ɔkɔngɔ” wakatɛkɛta Yeso mbuta ate, ase olimu wa l’ekambɔ ka vinyɔ wakayokamba oma lo wonya wa 11.

L’ekomelo ka wɛɛla ande, Yeso akatɛkɛta dia kɛnɛ kakasalema l’ekomelo ka lushi l’olimu ate: “La dikɔlɔ, kanga ekambɔ akatɛ kapita kande ate: ‘Elɛ ase olimu ndo futawɔ difuto diawɔ ntatɛ la wanɛ wakayokomɛ ndo komiya la wanɛ wakatate.’ Lam’akaye wanɛ wakayokamba oma lo wonya wa 11, vɔ wakalongola onto l’onto dɛnariyo 1. Lam’akayoyaka wanɛ wakatatɛ, vɔ wakafɔnya dia wayolongola difuto dioleki efula, koko ndo vɔ lawɔ wakalongola difuto dia dɛnariyo 1. Lam’akawadilongola, vɔ wakatatɛ ngunɛngunɛ owandji wa luudu wata vate: ‘Anto w’ekomelo anɛ wakakambi paka wonya wa ntango ɔtɔi, ko wɛ ambowaɛdinya la so sho wanɛ wakakambi olimu wa wolo lushi l’otondo lo yanyi ya tɛɛ!’ Koko nde akakadimola ɔmɔtshi la l’atei awɔ ate: ‘Waana, dimi hakosale ndooko kɔlɔ. Takokanyi dia dimi kofuta dɛnariyo 1, shi mɛtɛ? Ɔsa difuto diayɛ, tshɔka. Dimi nangaka mfuta wanɛ wakaye l’ekomelo oko wakamanyofutshi. Onde dimi bu la lotshungɔ la nsala kɛnɛ kalangami la diangɔ diami? Kana onde wɛ ekɔ la kandjema l’ɔtɛ wemi ɔlɔlɔ?’ Lo yoho shɔ mbele, wanɛ wele l’ɔkɔngɔ wayonga la  ntondo ndo wanɛ wele la ntondo wayonga l’ɔkɔngɔ.”​—Mateo 20:8-16.

Ambeki wakakoke ndjambola awui wendana l’etenyi k’ekomelo ka wɛɛla wa Yeso. Ngande wayonga ewandji w’ɔtɛmwɛlɔ w’ase Juda wanɛ wayaɔsa vɔamɛ oko “wanɛ wele la ntondo” ndjokoma wanɛ wele “l’ɔkɔngɔ”? Ndo ngande wayokoma ambeki wa Yeso “wanɛ wele la ntondo”?

Ambeki wa Yeso, wanɛ wele Afarisɛ ndo anto akina mbowaɔsaka oko wanɛ wele “l’ɔkɔngɔ” wayanga monga “wanɛ wele la ntondo” dia nongola difuto diawɔ dia lushi l’otondo. Lam’akavu Yeso, Jɛrusalɛma ya la nkɛtɛ yakakashema ko Nzambi akasɔnɛ wodja w’oyoyo, mbuta ate “Isariyɛlɛ wa Nzambi.” (Ngalatiya 6:16; Mateo 23:38) Joani Obatizanyi akatɛkɛta dikambo di’anto asɔ etena kakandatɛkɛta dikambo dia batisimu ka la nyuma k’ekila kakahombe salema. Wanɛ waki “l’ɔkɔngɔ” wayonga anto wa ntondo wa nongola batisimu kɛsɔ ndo nkondja diɛsɛ dia monga ɛmɛnyi wa Yeso “polo ndo l’ahole woleki etale wa lo nkɛtɛ.” (Etsha 1:5, 8; Mateo 3:11) Lo yɛdikɔ yayoshihodia ambeki otshikitanu wa woke wakatɛkɛtaka Yeso, mbayowɛna la ntondo woho wayowaomalɛ lo yɛdikɔ y’efula ewandji w’ɔtɛmwɛlɔ wanɛ waya “l’ɔkɔngɔ.”