Oma la Ngalileya, Yeso nde la ambeki ande wakatenyanya Ɔkɛdi wa Jɔrdana ndo wakete lo mboka ka lo sidɛ katenyanya Pereya. Mbala k’ekomelo kaki Yeso la Pereya, nde akewoya Afarisɛ ɛlɛmbɛ wa Nzambi wendana l’odiakelo wa diwala. (Luka 16:18) Kakianɛ, vɔ wambonyiya dikambo sɔ dia pemba Yeso.

Mɔsɛ akafunde dia koka ndjaka diwala la womoto l’ɔtɛ wambowotana la “dui dimɔtshi dia kɔlɔ.” (Akambo w’ase Lɛwi 24:1) Anto waki la tokanyi totshikitanyi lo kɛnɛ kendana la ɛkɔkɔ wa ndjaka diwala. Amɔtshi mbetawɔka dia ndjaka diwala kaanga lo tokambokambo ta totshitshɛ. Ɔnkɔnɛ Afarisɛ wakambola vate: “Onde ekɔ dimɛna dia pami ndjaka diwala la wadɛnde l’ɔtɛ w’ɔkɔkɔ akɔna tshɛ?”​—Mateo 19:3.

Lo dihole dia nkamba la tokanyi t’anto, Yeso akɛnya la lomba tshɛ kanyi ya Nzambi lo dikambo dia diwala ate: “Onde nyatadia dia ɔnɛ lakaatonge oma l’etatelo akaatonge pami la womoto ndo akate ate: ‘Diakɔ diele, pami ayotshika she la nyango ndo ayomamatana la wadɛnde, ko vɔ 2 wayoyala demba 1’? Ɔnkɔnɛ, vɔ keema anto 2 nto, koko waya demba 1. Laasɔ, onto atokakitolake kɛnɛ kakamamatanya Nzambi.” (Mateo 19:4-6) Etena kakatshukanya Nzambi Adama la Eva, nde kokongɛ dia diwala diawɔ ndjovɔ.

Afarisɛ wakadje taamu lo kɛnɛ kakate Yeso lo mimbola ɔnɛ: “Ko lande na kakate Mɔsɛ dia mbisha womoto mukanda wa mbokimɔ ndo wa ndjaka diwala la nde?” (Mateo 19:7) Yeso akawatɛ ate: “L’ɔtɛ wa lonyu l’etema anyu mbakate Mɔsɛ dia nyu ndjaka diwala la wadiɛnyu, koko komonga ngasɔ oma l’etatelo.” (Mateo 19:8) “Etatelo” kɛsɔ, komonga nshi ya Mɔsɛ, koko etena kakahɔhɔla Nzambi diwala lo Ɛdɛna.

Ko Yeso akate dui dia mɛtɛ di’ohomba nɛ ate: “Dimi lambonyotɛ nte, onto tshɛ ladiaka diwala la wadɛnde, naka aha l’ɔkɔkɔ w’awui wa mindo wa dieyanelo [Grɛkɛ, por·neiʹa] ko nde ntshuka womoto okina, nde ambosala loseka.” (Mateo 19:9) Laasɔ awui wa mindo wa dieyanelo mbele ɔkɔkɔ waamɛ wetawɔ Afundelo dia ndjaka diwala.

Ambeki wakatshutshuyama dia mbuta ɔnɛ: “Naka ngasɔ mbediɔ lam’asa pami la wadɛnde, kete bu dimɛna ntshukana.” (Mateo 19:10) Mbokɛmaka hwe dia onto lasangoya ntshuka kana ntshukama pombaka mbeya dia diwala pombaka tshikalaka pondjo!

Lo kɛnɛ kendana la lonyemba, Yeso akalembetshiya dia anto amɔtshi mbotɔka ɛlɛnga, mbuta ate hawokoke ntshuka. Akina ndjaetɛka ɛlɛnga, mbuta ate ndjakonyaka diaha nsala awui wa dieyanelo. Koko, akina mbikikɛka nsaki yawɔ ya dieyanelo. Vɔ salaka dui sɔ dia ndeka ndjasha tshɛ lo awui wendana la Diolelo. Yeso akakeketsha apokami ande ate: “Onto tshɛ lakoka mbetawɔ yoho ya lɔsɛnɔ shɔ [lonyemba] etawɔ.”​—Mateo 19:12.

Ko anto wakatatɛ mbela ana awɔ wa totshitshɛ le Yeso. Koko, ambeki wakahangwɛ anto, ondo vɔ konanga dia Yeso fukutanyema. Lam’akandɛnyi dui sɔ, Yeso akanyange ndo akawatɛ ate: “Nyotshike ana w’akɛnda waye le mi, takonyashimba, nɛ dia Diolelo dia Nzambi diekɔ di’anto oko vɔ. Lo mɛtɛ kanyotɛmi nte, onto tshɛ lahalongola Diolelo dia Nzambi oko ɔna dikɛnda, lo weho akɔ tshɛ nde hatɔtɔ lɔkɔ.”​—Makɔ 10:14, 15; Luka 18:15.

Ande wetshelo wa dimɛna lee! Dia nongola Diolelo dia Nzambi, sho pombaka monga la memakana ndo monga suke dia mbetshama oko ana w’akɛnda. Yeso akɛnya ngandji kakandokaka ana w’akɛnda lo mbaɛmba ndo mbatshɔkɔla. Ndo nde ekɔ la ngandji ka ngasɔ le onto tshɛ ‘lalongola Diolelo dia Nzambi oko ɔna dikɛnda.’​—Luka 18:17.