Yema tshitshɛ l’ɔkɔngɔ wa batisimu ka Yeso, nde akahomana l’otunyi wakayashikikɛ dia mbɔkɔsha kaanga la ntondo ka nde ntatɛ olimu ande. Eelo, Diabolo akayange dia pemba Yeso mbala la mbala. L’ɔkɔngɔ diko, Yeso akayota lo dikambo dia kanga kɔlɔ ɔsɔ ate: “Owandji w’andja ɔnɛ ekɔ lo ndjaye. Ndo nde hambaheme.”​—Joani 14:30.

Ɔpɔstɔlɔ Joani akɛnyi la ntondo lo ɛnɛlɔ kɛnɛ kayokomɛ “dragɔ dia woke, oloyi akɔ w’edjedja welamɛ Diabolo ndo Satana.” Otunyi wa kɔlɔ efula w’anto ɔsɔ, akahombe mbikashema oma l’olongo, “ele la nkɛlɛ k’efula, eeya dia etena kambootshikalɛ kaya mondo.” (Ɛnyɛlɔ 12:9, 12) Akristo wekɔ l’ɔkɔkɔ w’oshika wa mbetawɔ dia wekɔ lo nsɛna l’etena kɛsɔ “kaya mondo” ndo di’ɔnɛ kem’edja “dragɔ, oloyi w’edjedja,” ayodjama lo difuku ndo hatokoka nsala ndooko dui l’edja k’ɛnɔnyi 1 000 wayolɛ Yeso lo Diolelo dia Nzambi.​—Ɛnyɛlɔ 20:1, 2.

Kakɔna kayosalema la nkɛtɛ, dihole diadjasɛso l’etena kɛsɔ? Waa na wayɔsɛna lanɛ la nkɛtɛ ndo ngande wayonga lɔsɛnɔ? Yeso ndamɛ akasha ekadimwelo. Lo wɛɛla ande w’ɛkɔkɔ la mbudi, nde akɛnya kɛnɛ kayokomɛ anto w’ɛlɔlɔ wele oko ɛkɔkɔ, wanɛ wakamba kaamɛ l’anango Yeso ndo wawasalɛ ɔlɔlɔ. Nde akɛnya nto hwe kɛnɛ kakongɛɛ wanɛ wahasale awui asɔ, mbuta ate wanɛ wele oko mbudi. Yeso akate ate: “Anto asɔ [mbudi] wayotshɔ lo elanyelo ka pondjo, koko anto w’ɛlɔlɔ [ɛkɔkɔ] wayotshɔ lo lɔsɛnɔ la pondjo.”​—Mateo 25:46.

Kɛsɔ tokimanyiyaka dia mboka ɛtɛkɛta wakatɛ Yeso ondjakanyi wakahanema l’otamba l’omamu ande. Yeso kondaka pami kɛsɔ difuto diakandalake apɔstɔlɔ ande wa kɔlamelo di’ɔnɛ vɔ wayɔlɔmbɔla la nde lo Diolelo dia l’olongo.  Koko, Yeso akalake otshi wa kɔlɔ wakayatshumoya ɔsɔ ate: “Lo mɛtɛ kakotɛmi ɛlɔ nte: Wɛ ayoyala la mi lo Paradiso.” (Luka 23:43) Ɔnkɔnɛ, pami kɛsɔ akakondja elongamelo ka nsɛna lo Paradiso, mbuta ate parkɛ kana jardɛ ya dimɛna efula. Mbokɛmaka dia ɛlɔ kɛnɛ wanɛ wele oko ɛkɔkɔ ndo wɔtɔ “lo lɔsɛnɔ la pondjo” wayonga vɔ lawɔ lo Paradiso kɛsɔ.

Kɛsɔ mbɔtɔnɛka la kɛnɛ kakakɔndɔla ɔpɔstɔlɔ Joani lo woho wayonga akambo l’etena kɛsɔ la nkɛtɛ. Nde akate ate: “Luudu la dipɛma laki Nzambi laya kaamɛ la anto, ndo nde ayodjasɛ kaamɛ la wɔ, ko vɔ wayoyala anto ande. Nzambi ndamɛ ayoyala kaamɛ la wɔ. Nde ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto. Akambo wa ntondo wamboshila.”​—Ɛnyɛlɔ 21:3, 4.

Dia ondjakanyi ɔsɔ nsɛna lo Paradiso, nde pombaka mbolwama oma lo nyɔi. Ndo aha ndamɛ oto mbayolɔ. Yeso akokiya dui sɔ hwe etena kakandate ate: “Wonya wekɔ lo ndjaye wele wanɛ tshɛ wele lo waombo wohɔma wayoka dui diande ko wayotomba. Wanɛ wakasalaka akambo w’ɛlɔlɔ lo eolwelo ka lɔsɛnɔ ndo wanɛ wakasalaka akambo wa kɔlɔ lo eolwelo ka kilombo.”​—Joani 5:28, 29.

Ko kakɔna kayosala apɔstɔlɔ wa kɔlamelo ndo anto akina wayonga kaamɛ la Yeso l’olongo? Bible mbutaka ɔnɛ: “Vɔ wayoyala ɛlɔmbɛdi waki Nzambi ndo waki Kristo, ndo vɔ wayolɛ kaamɛ la nde oko nkumi ya dikanga l’edja k’ɛnɔnyi 1 000.” (Ɛnyɛlɔ 20:6) Wanɛ wayolɛ kaamɛ la Kristo wayonga apami ndo wamato wakasɛnɛ lanɛ la nkɛtɛ. Ɔnkɔnɛ, vɔ mɛtɛ wayonga emboledi wa l’olongo wele la kɛtshi ndo wayadja lo dihole di’anto wayonga la nkɛtɛ.​—Ɛnyɛlɔ 5:10.

Yeso ayokamba la olambo ande w’oshinga w’etshungwelo lo wahɔ w’anto wa la nkɛtɛ ndo ayowanyiyɛ mananu ka pɛkato kakawahowɔ. Nde la wanɛ wayolɛ kaamɛ la nde wayokonya anto wa kɔlamelo kokele. Eelo, l’etena kɛsɔ anto wayɔngɛnangɛna la woho wa lɔsɛnɔ lakakongɛ Nzambi l’etatelo lo dikambo diawɔ etena kakandatɛ Adama l’Eva dia fulanɛ ndo ndodia nkɛtɛ. Kaanga nyɔi kakaye oma lo pɛkato ka Adama hatonga nto!

Laasɔ, Yeso ayokotsha kɛnɛ tshɛ kakɔlɔmbɛ Jehowa. L’ekomelo ka Ɛlɔmbwɛlɔ kande k’Ɛnɔnyi Kinunu, Yeso ayokaloya Diolelo kaamɛ ndo nkumbo k’anto wa kokele le She. Lo kɛnɛ kendana la tshelo ya diambo y’okitshakitsha yayosala Yeso shɔ, ɔpɔstɔlɔ Pɔɔlɔ akafunde ate: “Lam’ayɔlɛndjama diangɔ tshɛ le nde, Ɔna ndamɛ nde lawɔ ayɔlɛmbɛ Ɔnɛ lakɔɔlɛndjɛ diangɔ tshɛ, dia Nzambi monga laadiko dia tshɛ.”​—1 Kɔrɛtɔ 15:28.

Mbokɛmaka hwe dia Yeso ekɔ l’ɔkɛndɛ w’ohomba efula lo okotshamelo wa asangwelo wa diambo wa Nzambi. Ndo etena kayotetemala asangwelo asɔ nkotshama pondjo pondjo, nde ayɔsɛna tshɛ lo tshɛ lo yoho y’ɔtɔnɛ la kɛnɛ kakandate lo dikambo diande ndamɛ ate: “Dimi lekɔ mboka, mɛtɛ ndo lɔsɛnɔ.”​—Joani 14:6.