Lam’akandonɛɛ oma la Jeriko, Yeso akatshu la Bɛtaniya. Ɔsɔ aki lɔkɛndɔ la kilɔmɛtrɛ 20 l’akona ndo lo mboka ya kɔlɔ. Jeriko aki lo mɛtrɛ oko 250 l’ɛse lo mbɛdika la ndjale ndo Bɛtaniya aki lo mɛtrɛ oko 610 la diko lo mbɛdika la ndjale. Lazaro nde l’akadiyɛnde ahende wakadjasɛka lo ngielongelo ya Bɛtaniya, yakangana la Jɛrusalɛma kilɔmɛtrɛ oko 3 ndo yaki lo ɛstɛ k’oholola wa Dikona di’esongo w’Ɔlivɛ.

Ase Juda efula wakashile nkoma la Jɛrusalɛma dia Dambo di’Elekanelo. Vɔ wakaye la wonya dia “toyaɛdia lo ndjela ɛlɛmbɛ” naka kana wakasakanya odo kana wakasale dui dikina diawaetɛ mindo. (Joani 11:55; Walelo 9:6-10) Efula ka wanɛ wakakome ntondo wakatshumana lo tɛmpɛlɔ. Vate vate yakikɔ dia kana Yeso ayoya lo Dambo di’Elekanelo.​—Joani 11:56.

Anto wakataka awui wotshikitanyi lo dikambo dia Yeso. Ewandji w’ɔtɛmwɛlɔ ɛmɔtshi wakalangaka mbonda dia mbodiaka. Vɔ wakadjanga dia naka onto ɔmɔtshi mbeya lɛnɛ ele Yeso, nde pombaka mbatɛ “dia vɔ towonda.” (Joani 11:57) Ewandji ɛsɔ wamboshilaka nyanga dia ndjaka Yeso l’ɔkɔngɔ wa nde mbolola Lazaro. (Joani 11:49-53) Mbokɛmaka dia amɔtshi wakadjaka taamu dia kana Yeso ayɛnama lo sɛkɛ.

Yeso akakome la Bɛtaniya Lushi la tanu “nshi 6 la ntondo ka Dambo di’Elekanelo.” (Joani 12:1) Lushi layela (lushi la Sabato, Nisana 8) lakatatɛ l’ɔkɔngɔ wa ɛɔtwɛlɔ ka wonya. Lo nsala ngasɔ, nde akashidiya lɔkɛndɔ lande la ntondo ka Sabato. Takandahombe minda lɔkɛndɔ oma la Jeriko lushi la Sabato, mbuta ate oma lo ɛɔtwɛlɔ ka wonya ka Lushi la tanu polo lo ɛɔtwɛlɔ ka wonya ka Lushi la samalo nɛ dia ɛlɛmbɛ w’ase Juda wakasekɛka lɔkɛndɔ la ngasɔ. Ondo Yeso akatshu laka Lazaro oko wakandasalaka ntondo.

Simɔna, lakadjasɛka nto la Bɛtaniya akelɛ Yeso nde la asekande mbidja ndo Lazaro dia ndjɔlɛ yangɔ Lushi la samalo la dikɔlɔ. Simɔna akelamɛka “kanga sudi,” ondo woho wakinde la sudi ntondo ko Yeso akɔkɔnɔla. Oko wakinde la mbekelo ka nkamba elimu, Maata akalongolaka angɛndangɛnda. Mariya akahokamɛka Yeso la yambalo ya laande ndo l’etena kɛsɔ dui sɔ diakatondja londjo.

Mariya akafola ɔlɔndɔ wa alabatrɛ kana djɔndɔ yaki la “livɛrɛ la malashi wa nardɔ ka dimɛna.” (Joani 12:3) Ɔsɔ aki esɔ ka nɛmɔ efula, oshinga atɔ aki (dɛnariyo 300) mbɛdima la difuto di’oko ɔnɔnyi w’otondo di’ose olimu! Mariya akatɛ Yeso esɔ kɛsɔ l’ɔtɛ ndo l’ekolo ndo akakitola ekolo ande la divo diande. Opumu wa malashi ɔsɔ wakalole luudu l’otondo.

Ambeki wakomala ndo wakambola vate: “Lande na kalanyema malashi ɔnɛ?” (Makɔ 14:4)  Judasɛ Iskariɔtɛ akatone lo mbuta ate: “Lande na kahasondjami malashi ɔnɛ lo dɛnariyo 300 ko mbisha ase wola falanga?” (Joani 12:5) Judasɛ kondjakiyanyaka mɛtɛ lo dikambo di’ase wola. Nde akavaka oma lo shɛtɛshɛtɛ yakandombaka lo dikambo dia ambeki.

Yeso akaswɛlɛ Mariya lo mbuta ate: “Lande na kalanganyu nkiyanya womoto ɔnɛ? Nde ambosalɛ dikambo dia dimɛna. Nɛ dia nyu nyekɔ nshi tshɛ kaamɛ l’ase wola, koko dimi hantongaka la nyu nshi tshɛ. Womoto ɔnɛ ambotɛ malashi ɔnɛ lo demba diami dia nɔngɔsɔla okundelo ami. Lo mɛtɛ kanyotɛmi nte l’ahole tshɛ wa l’andja w’otondo wayosambishama lokumu l’ɔlɔlɔ lɔnɛ, wayotaka ndo dikambo diambosala womoto ɔnɛ dia mboohɔka.”​—Mateo 26:10-13.

Ambolekana lushi l’otondo lamondonga la Bɛtaniya ndo nkumu yendana la okomelo wa Yeso yakadiangana. Ase Juda efula wakaye lo luudu la Simɔna aha tsho dia ndjenda Yeso koko nto dia ndjenda Lazaro, “ɔnɛ lakandolola oma lo nyɔi.” (Joani 12:9) Ewandji w’ɛlɔmbɛdi wakɔtɔ sheke dia ndjaka Yeso ndo Lazaro. Ewandji w’ɔtɛmwɛlɔ ɛsɔ wakɔshi dia woho wakolɔ Lazaro ekɔ lo tshutshuya anto efula dia monga la mbetawɔ le Yeso. Ewandji w’ɔtɛmwɛlɔ ɛsɔ waki mɛtɛ anto wa kɔlɔ!