La wedi a pindju, Lushi la lomingu, Nisana 9, Yeso akamɔ la Bɛtaniya nde la ambeki ande ko wakatshu la Jɛrusalɛma. Lam’akawasukana la Bɛtɛfangɛ, lo Dikona di’esongo w’Ɔlivɛ, Yeso akatɛ ambeki ande ahende ate:

“Nyotshu lo ngelo kɛnanyu la ntondo kengo, ndo kam’ayonyɔtɔ lɔkɔ, nyayotana ɔsɔngɔ wa mponda okelekami kaamɛ la nyangɛwɔ. Kanyoyikelekole ko nyu mbelamiyɔ. Naka onto ambonyotɛ dui dimɔtshi, kanyowote nyate: ‘Nkumadiɔndjɔ mbele l’ohomba ayɔ.’ Ko nde ayoyikimɔ aha la ntshimbatshimba.”​—Mateo 21:2, 3.

Ambeki ande kombeya dia kɛnɛ kakawatɛ Yeso akendanaka la prɔfɛsiya ka lo Bible. Koko, l’ɔkɔngɔ vɔ wakayoshihodiaka okotshamelo wa prɔfɛsiya ka Zɛkariya. Nde akatatshi dia Nkumekanga kakalake Nzambi ayohomba mbɔtɔ la Jɛrusalɛma “la okitshakitsha ndo ekɔ lo ndjahema lo mponda, lo ɔsɔngɔ wa mponda, yana ya mponda ya wadi.”​—Zɛkariya 9:9.

Etena kakakome ambeki la Bɛtɛfangɛ ndo kakawɔshi ɔsɔngɔ wa mponda la nyangɛwɔ, anto wakemala suke wakambola ɔnɛ: “Lande na kakelekolanyu ɔsɔngɔ wa mponda ɔnɛ?” (Makɔ 11:5) Koko lam’akawoke dia Nkumadiɔndjɔ mbayanga nyama yakɔ, vɔ wakatshike ambeki dia vɔ ndjitɔlɛ Yeso. Ambeki wakakitsha ahɔndɔ awɔ wa laadiko laadiko dia mponda ndo w’ɔnatɔ, koko Yeso akahema l’ɔsɔngɔ wa mponda.

Lofulo l’anto lakatahamaka lam’akatɔtɔka Yeso la Jɛrusalɛma. Anto efula wakaale ahɔndɔ awɔ lo mboka. Akina wakahembola tahe y’esongo kana “avundja w’esongo” ndo wakawaetshetshaka. Vɔ wakataka la dui dia wolo ɔnɛ: “Tambokɔlɔmba, oshimbee! Ɔnɛ layaye lo lokombo la Jehowa atshɔkwame! Diolelo dia shɛso Davidɛ diayaye diatshɔkwame!” (Makɔ 11:8-10) Afarisɛ waki l’olui w’anto wakomala lo woho wakataka anto ngasɔ. Vɔ wakatɛ Yeso ɔnɛ: “Ombetsha, hangwɛ ambeki ayɛ.” Yeso akakadimola ate: “Lambonyotɛ nte, naka vɔ mbɔlama, kete ave anɛ wayoda ekoko.”​—Luka 19:39, 40.

Lam’akɛnyi Yeso Jɛrusalɛma, nde akatatɛ ndela ndo akate ate: “Otoyoshihodia ɛlɔ kɛnɛ akambo wendana la wɔladi lee . . . koko kakianɛ vɔ wamboshɛma lo washo ayɛ.” Kana l’ɔtɛ w’ohedia ayɔ wa l’okonda, Jɛrusalɛma ayolongola dilanya. Yeso akate ate: “Atunyi ayɛ wayoka lokombo la dikundji dia lɔsɔngɔla lo otshimbedi ayɛ, wayokotshimba ndo wayokodinga lo bɛkɛ tshɛ. Vɔ wayokɔkɔsha lo nkɛtɛ, wɛ la anayɛ ndo vɔ hawototshika le yɛ ndooko dive laadiko dia dive.” (Luka 19:42-44) Oko wakate Yeso, Jɛrusalɛma akalanyema lo ɔnɔnyi 70 T.D.

Lam’akɔtɔ Yeso la Jɛrusalɛma, ‘osukusuku wakonge l’osomba w’otondo, wambola vate: “Onto akɔna ɔnɛ?”’ Elui w’anto wakatetemala mbuta vate: “Toko omvutshi Yeso, ose Nazarɛtɛ ka la Ngalileya!” (Mateo 21:10, 11) Anto waki l’atei w’olui w’anto wakɛnyi Yeso olola Lazaro wakatɛ anto akina dia dihindo sɔ. Afarisɛ wakakiyana nɛ dia wakɛnyi dia wambokoma ewo. Vɔ wakatanɛ lam’asawɔ ɔnɛ: “Andja w’otondo wotooyele.”​—Joani 12:18, 19.

Oko waki mbekelo kande, etena kakandayaka la Jɛrusalɛma, Yeso akatshu lo tɛmpɛlɔ dia tetsha. Lɛkɔ nde akakɔnɔla akanga wa totshungu ndo akanga wa tshumbe. Etena kakɛnyi ewandji w’ɛlɔmbɛdi ndo afundji kɛnɛ kaketaka ndo kakawoke ana w’akɛnda wata la dui dia wolo lo tɛmpɛlɔ ɔnɛ: “Tambokɔlɔmba, oshimbee, Ɔna Davidɛ!” vɔ wakomala. Ewandji w’ɔtɛmwɛlɔ wakambola Yeso ɔnɛ: “Onde wɛ ekɔ lo mboka kɛnɛ katawɔ kɛsɔ?” Nde akakadimola ate: “Onde nyu nyatadiaka kɛnɛ kakafundama ɔnɛ: ‘Wɛ akasale dia lotombo ntomba oma l’enyɔ w’ana w’akɛnda ndo w’ana w’ashashi’?”​—Mateo 21:15, 16.

Yeso akashishima diangɔ diele lo tɛmpɛlɔ. Lam’ele wonya wambeta, nde la apɔstɔlɔ ande wakamɔ oma lo tɛmpɛlɔ. La ntondo ka Nisana 10 ntatɛ, nde akakalola la Bɛtaniya lɛnɛ akandatetsha otsho wa Lushi la lomingu.