Yeso akashidiya mbetsha ambeki ande anɛi lo Dikona di’esongo w’Ɔlivɛ, lo kadimola lo dimbola diawɔ diendana la woongelo ande wa lo nshi yayaye ndo la etena k’ekomelo ka dikongɛ di’akambo.

Nisana 11 aki lushi lakinde mɛtɛ l’olimu efula! Ondo etena kakawatakalolaka otsha la Bɛtaniya dia tolala, mbakatɛ Yeso apɔstɔlɔ ande ate: “Nyu mbeyaka dia l’ɔkɔngɔ wa nshi 2, dambo di’Elekanelo diayosalema ndo Ɔna onto ayokimɔma dia ndjakema l’otamba.”​—Mateo 26:2.

Mɛnamaka dia Yeso aketsha lushi lakayele, mbuta ate Lushi la sato, nde la apɔstɔlɔ ande ato aha l’anto mbafukutanya. Lushi la hende, nde akahangwɛ ewandji w’ɔtɛmwɛlɔ ndo akɛnya kɔlɔ kawɔ lo sɛkɛ. Vɔ wekɔ lo nyanga dia mbodiaka. Ɔnkɔnɛ, nde kondjaɛnya lo sɛkɛ lo Nisana nshi 12 diaha ndooko ɛngɔ mboshimba dia nde nsala dambo di’Elekanelo nde la apɔstɔlɔ ande l’ɔkɔngɔ wa wonya mbɔtɔ la dikɔlɔ diakayele, etena katatɛ Nisana 14.

Koko ewandji w’ɛlɔmbɛdi ndo dikumanyi dia wodja hawotshikadi ki la ntondo ka lushi la dambo di’Elekanelo. Vɔ wakasangana lo sɛkɛ di’ɔlɔmbɛdi a laadiko Kayifasi. Lande na? Vɔ waki la nkɛlɛ nɛ dia Yeso akɛnyaka kɔlɔ kawɔ lo sɛkɛ. Kakianɛ, vɔ wambɔtɔ kaamɛ sheke “dia nyanga woho wa minda Yeso lo mayɛlɛ ko mbodiaka.” Ngande ndo etena kakɔna kayowosala dui sɔ? Vɔ wakate vate: “Aha lo fɛtɛ, diaha lofunge monga l’atei w’anto.” (Mateo 26:4, 5) Vɔ waki la wɔma nɛ dia anto efula wakangɛnangɛnaka Yeso.

Ko wonya akɔ, onto ɔmɔtshi akaye ndjenda ewandji w’ɔtɛmwɛlɔ. Vɔ wakambe dia mɛna dia Judasɛ Iskariyɔtɛ ɔpɔstɔlɔ wa Yeso ɔmɔtshi amboya ndjowaenda. Satana akadje lo yimba yande kanyi ya mfunga Owandji ande! Judasɛ  akawambola ate: “Kakɔna kayonyombisha dia dimi mbokimɔ l’anya anyu?” (Mateo 26:15) Oko wakiwɔ l’ɔngɛnɔngɛnɔ lo dikambo sɔ, vɔ “waketawɔ dia mbosha falanga ya mfɛsa.” (Luka 22:5) Falanga ngana? L’ɔngɛnɔngɛnɔ tshɛ vɔ waketawɔ mbosha ekenga wa mfɛsa 30. Oshinga ɔsɔ wekɔ oko oshinga wa mfumbe wa tɔshɛkɛlɛ 30. (Etombelo 21:32) Lo nsala ngasɔ, ewandji w’ɔtɛmwɛlɔ wakɛnya lohetsho lawɔ otsha le Yeso ndo wakawɔshi dia nde bu la nɛmɔ. Ko Judasɛ akatatɛ “nyanga diaaso dia dimɛna dia mbofunga le wɔ aha la olui w’anto monga laawɔ.”​—Luka 22:6.

Nisana 13 akatatɛ lo ɛɔtwɛlɔ ka wonya Lushi la sato, ndo ɔsɔ aki otsho wa samalo ndo w’ekomelo waketsha Yeso la Bɛtaniya. La wedi a pindju, ɛlɔngɔswɛlɔ w’ekomelo wa dambo di’Elekanelo pombaka salema. Ɔsɔngɔ w’ɔkɔkɔ wakahombe tanema dia vɔ ndjakema ndo fumbama otondo l’ɔkɔngɔ wa Nisana 14 ntatɛ. Lende ayowotɔlɛ ndo ayowalɔngɔsɔlɛ diangɔ dia vɔ ndɛ? Yeso atatɛkɛta akambo asɔ. Diakɔ diele, Judasɛ kokoka mbutɛ ewandji w’ɛlɔmbɛdi awui asɔ.

Ondo l’etatelo ka dikɔlɔ dia Lushi la nɛi, Yeso akatome Petero la Joani oma la Bɛtaniya ate: “Nyotshu nyotɔlɔngɔsɔlɛ dihole dia sho ndjɔlɛ dambo di’Elekanelo.” Vɔ wakambola vate: “Lende alangayɛ sho todilɔngɔsɔla?” Yeso akalembetshiya ate: “Lam’ayonyɔtɔ l’osomba, nyayohomana la pami kɛmɔtshi ayɛmbɛ mbaka k’ashi. Kanyooyele polo lo luudu layondɔtɔ. Kanyote kanga luudu lakɔ nyate: ‘Ombetsha kata ate: “Lende ele luudu la angɛndangɛnda lakokami ndɛ dambo di’Elekanelo la ambeki ami?”’ Ko nde ayonyɛnya luudu la woke la la diko lele la diangɔ. Kanyodilɔngɔsɔlɛ lɔkɔ.”​—Luka 22:8-12.

Aha la taamu, kanga luudu lɔsɔ aki ombeki wa Yeso. Ondo nde akalongamɛka dia Yeso mbɔlɔmba dia nkamba la luudu lande lo diaaso sɔ. Lam’akakome apɔstɔlɔ ahende asɔ la Jɛrusalɛma, vɔ wakatane awui tshɛ paka woho wakawatɛ Yeso. Vɔ wakasale dia ɔna ɔkɔkɔ ndo diangɔ dikina tshɛ diendana l’olelo wa dambo di’Elekanelo monga suke dia nkotsha ehomba w’anto 13, mbuta ate Yeso l’apɔstɔlɔ ande 12.