Nshi dikumi l’ɔkɔngɔ wa Yeso mbidɛ l’olongo, otshulwelo wa nyuma k’ekila lo lushi la Pɛntɛkɔsta wakasha djembetelo y’ɔnɛ nde mɛtɛ aki l’olongo. Ndo djembetelo nkina ya dikambo sɔ yakonge. Yema la ntondo ka ombeki Stɛfano mbokama ave l’ɔtɛ wakandɛnya kɔlamelo yande, nde akate ate: “Ohonyenda, dimi lambɛna olongo wambodihɔ ndo Ɔna onto emadi lo lonya l’omi la Nzambi.”​—Etsha 7:56.

Etena kakinde kaamɛ la She l’olongo, Yeso akahombe kongɛ didjango dimɔtshi diakatama l’Ɔtɛkɛta wa Nzambi. Davidɛ akafunde ɛtɛkɛta wakasambiyama ate: “Jehowa akatɛ Nkumɛmi [Yeso] ate: ‘Djasɛ lo lonya lami l’omi polo lam’ayomokitsha atunyi ayɛ oko kihona k’ekolo ayɛ.’” Lam’akakomɛ etena kakandakongaka, nde akahombe ‘ntshɔ tolɛɛ l’atei wa atunyi ande.’ (Osambo 110:1, 2) Ko kakɔna kakahombe Yeso nsala oma l’olongo etena kakandakongɛka dia ndɔsha atunyi ande?

Etshumanelo k’Akristo kakakengama lo Pɛntɛkɔsta 33 T.D. Yeso akatatɛ mbolɛ kana nɔmbɔla oma l’olongo laadiko di’ambeki ande w’akitami. (Kɔlɔsayi 1:13) Nde akaalɔmbɔla l’olimu awɔ w’esambishelo ndo akaalɔngɔsɔla lo ɔkɛndɛ awɔ wa lo nshi yayaye. Ɔkɛndɛ akɔna? Wanɛ wayotshikala la kɔlamelo polo lo nyɔi wayolwama ndo wayokamba kaamɛ la Yeso oko nkumi ya dikanga lo Diolelo.

Ɛnyɛlɔ ka laande ka ɔmɔtshi lakahombe ndjonga nkumekanga ele Saolo lakeyamaka dimɛna lo lokombo lande l’ose Rɔmɔ la Pɔɔlɔ. Nde aki ose Juda laki l’ohetoheto edja efula l’Ɛlɛmbɛ wa Nzambi, koko nde akanganyiyama oma le ewandji w’ɔtɛmwɛlɔ w’ase Juda, diakɔ diele nde aketawɔ dia kaanga Stɛfano mbokama ave. Oma laasɔ, lo “mboka ambeki wa Nkumadiɔndjɔ nkɛlɛ ndo [lo mbo]wawanɛ dia mbashila oshiki,” Saolo akatshu otsha la Damasɛkɛ. Kayifasi, ɔlɔmbɛdi a laadiko akawosha lotshungɔ la tonda ambeki wa Yeso ndo mbatɔla la Jɛrusalɛma. (Etsha 7:58; 9:1) Koko etena kaki Saolo lo mboka, osase wa wolo wakahɛtɛ lo dihole diakinde ndo nde akakɔ la nkɛtɛ.

Dui diakaye diata ɔnɛ: “Saolo, Saolo, lande na kampɛnyahɛnyayɛ?” Saolo akambola ate: “Nkumadiɔndjɔ, wɛ na?” Okadimwelo wakashama  ɔnɛ: “Dimi Yeso kahɛnyahɛnyayɛ.”​—Etsha 9:4, 5.

Yeso akatɛ Saolo dia mbɔtɔ la Damasɛkɛ ndo dia nkongɛɛ elembetshiyelo ekina, koko nde akahombe nɔmbwama l’osomba nɛ dia osase wa dihindo ɔsɔ wakawole washo. Lo ɛnɛlɔ kekina, Yeso akɛnama le Ananiya ombeki ande ɔmɔtshi wakadjasɛka la Damasɛkɛ. Yeso akasha Ananiya adrɛsɛ lɛnɛ aki Saolo. Ananiya akakandakanda dia nsala dui sɔ, koko Yeso akoshikikɛ ate: “Pami kɛsɔ ekɔ ehomɔ kamomɔsɔna dia mɛmbɛ ase wedja, nkumi ya dikanga ndo ana w’ase Isariyɛlɛ lokombo lami.” Washo wa Saolo wakadihɔ ndo lɛkɔ la Damasɛkɛ “nde akatatɛ nsambisha akambo wendana la Yeso . . . , ata ate: Nde ekɔ Ɔna Nzambi.”​—Etsha 9:15, 20.

L’ekimanyielo ka Yeso, Pɔɔlɔ la esambisha ekina wakakambe olimu w’esambishelo wele Yeso akatatɛ lawɔ. Nzambi akaatshɔkɔla ndo wakakondja etombelo wa diambo efula. Ɛnɔnyi oko 25 l’ɔkɔngɔ wa Yeso mɛnama le nde lo mboka k’otsha la Damasɛkɛ, Pɔɔlɔ akafunde dia lukumu l’ɔlɔlɔ “lakasambishama lo etongelo tshɛ kele l’ɛse olongo.”​—Kɔlɔsayi 1:23.

Ɛnɔnyi efula l’ɔkɔngɔ, Yeso akasha olangemi ande ɔpɔstɔlɔ Joani waɛnɛlɔ wotshikitanyi watanema lo dibuku dia Bible dia Ɛnyɛlɔ. Lo tshimbo ya waɛnɛlɔ ɛsɔ, Joani mɛtɛ akasɛnɛ polo lo mɛna okalwelo wa Yeso lo lowandji la Diolelo. (Joani 21:22) “Lo wolo wa nyuma [Joani a]katanema lo lushi la Nkumadiɔndjɔ.” (Ɛnyɛlɔ 1:10) Etena kakɔna kakahombe dui sɔ ntatɛ?

Wekelo wa dimɛna dimɛna wa prɔfɛsiya ka lo Bible mɛnyaka dia “lushi la Nkumadiɔndjɔ” lakatatɛ lo nshi yaso nyɛ. Lo 1914, Ta dia ntondo dia l’andja w’otondo diakatatɛ. Tatɛ l’etena kɛsɔ tekɔ lo mɛna ata, mpokoso, ndjala ya kasha, adidimu wa nkɛtɛ ndo tolembetelo tokina tɛnya okotshamelo wa l’andja w’otondo wa “djembetelo” yakasha Yeso apɔstɔlɔ ande yendana la “woongelo” ande ndo “ekomelo.” (Mateo 24:3, 7, 8, 14) Esambishelo ka lokumu l’ɔlɔlɔ la Diolelo kambosambishama, aha tsho l’ɛtshi ka nkɛtɛ ka Rɔmɔ koko l’andja w’otondo.

Joani akasambiyama dia mɛnya kɛnɛ kalembetshiya dui sɔ ate: “Kakianɛ, panda kamboyala ndo wolo ndo Diolelo dia Nzambi kaso ndo lowandji la Kristo kande.” (Ɛnyɛlɔ 12:10) Eelo, Diolelo dia Nzambi dia l’olongo diakasambisha Yeso lo yɛdikɔ y’efula diekɔ dui dia mɛtɛ!

Ɔsɔ ekɔ losango la dimɛna efula le ambeki wa Yeso tshɛ wele la kɔlamelo. Vɔ koka nama l’otema ɛtɛkɛta wa Joani wata ɔnɛ: “Diakɔ diele olongo le, ɔngɛnɛngɛnɛ ndo wanɛ wodjashi lɔkɔ! Mananu kayanga monga la nkɛtɛ ndo lo ndjale, nɛ dia Diabolo amboya le nyu ele la nkɛlɛ k’efula, eeya dia etena kambootshikalɛ kaya mondo.”​—Ɛnyɛlɔ 12:12.

L’etena kɛnɛ, Yeso aya bu nto onto lodjashi lo lonya l’omi la She akonga. Nde ekɔ lo nɔmbɔla oko Nkumekanga ndo kem’edja nde ayolanya atunyi ande tshɛ. (Hɛbɛru 10:12, 13) Ɛtshɔkɔ akɔna watokongɛ?