La dikɔlɔ di’ekomelo diakinde l’apɔstɔlɔ ande, Yeso akawatɛ ate: “L’ɔkɔngɔ wa dimi mbolɔ, layotshɔ la ntondo kanyu la Ngalileya.” (Mateo 26:32; 28:7, 10) L’etena kɛnɛ, ambeki ande efula wambonda lɔkɛndɔ otsha lɛkɔ, ko kakɔna kakawahombe tosala la Ngalileya?

Lushi lɔmɔtshi, Petero akatɛ apɔstɔlɔ asamalo ate: “Dimi lambotshɔ toka ɛtɛyi.” Vɔ akɔ asamalo wakakadimola vate: “Ndo sho tayanga ntshɔ la yɛ.” (Joani 21:3) Otsho w’otondo, vɔ kominda ndooko ɛngɔ. La lɔkɛsɛ, Yeso akɛnama l’omamu w’ashi, koko vɔ kombeeya. Yeso akawatɛ la dui dia wolo ate: “Anami le, onde nyu ndooko l’ɛngɔ ka ndɛ?” Vɔ wakakadimola vate: “Ndooko!” Yeso akawatɛ ate: “Nyoke ɔtɛyi lo lonya l’omi la waato ko nyayonda yema.” (Joani 21:5, 6) Vɔ wakande nse efula diakɔ diakiwɔ kokoka kaanga nkotola ɔtɛyi awɔ.

Joani akatɛ Petero ate: “Ongo Nkumadiɔndjɔ!” (Joani 21:7) Aha la tshimbatshimba, Petero akalɔtɛ dihɔndɔ diande dia laadiko diakandakolola etena kakandokaka ɛtɛyi. Nde akambɛ lo ndjale ndo akasale osale oko yɛdikɔ ya mɛtɛlɛ 90 otsha l’omamu. Ambeki akina wakayayelaka lo waato ɔkɔkɛ wayakotola ɔtɛyi woludi la nse.

Etena kakawakome l’omamu, vɔ wakɛnyi “dja y’akalanga yahɛta ndo nse yaki laadiko dia akalanga kaamɛ ndo mapa.” Yeso akate ate: “Nyela nse mɔtshi yondjinyu.” Petero akakotola ɔtɛyi waki la nse ya weke 153! Yeso akate ate: “Nyoye nyoyole.” Ndooko ɔtɔi la l’atei awɔ laki la dihonga dia mombola ɔnɛ, “Wɛ na?” nɛ dia vɔ wakeye dia ɔsɔ aki Yeso. (Joani 21:10-12) Ɔsɔ aki mbala ka sato kakandɛnama le ambeki ande waki olui.

Yeso akasha onto tshɛ la l’atei awɔ mapa la nse dia ndɛ. Ko ondo etena kakandende nse yakawande, nde akambola ate: “Simɔna ɔna Joani, onde wɛ mbokakami ngandji oleki diangɔ nɛ?” Onde Petero akaleke ndjasha l’olimu wa minda nse oleki olimu wakalangaka Yeso dia nde nsala? Petero akakadimola ate: “Eelo Nkumadiɔndjɔ, wɛ mbeyaka dia dimi kookaka ngandji.” Ɔnkɔnɛ, Yeso akawotɛ ate: “Leshaka ɛkɔkɔ ami wa totshitshɛ.”​—Joani 21:15.

Yeso akambola nto ate: “Simɔna ɔna Joani, onde wɛ mbokakami ngandji?” Ondo Petero akaambe diakɔ diakandakadimola l’otema ɔtɔi ate: “Eelo Nkumadiɔndjɔ, wɛ mbeyaka dia dimi kookaka ngandji.” Yeso akawotɛ woho akɔ waamɛ ate: “Lamaka ɛkɔkɔ ami wa totshitshɛ.”​—Joani 21:16.

Mbala ka sato Yeso akambola ate: “Simɔna ɔna Joani, onde wɛ mbokakami ngandji?” Ondo l’etena kɛsɔ Petero akakoke ndjambola dia kana Yeso ekɔ lo mvɔ kɔlamelo yande tshɔdia. Petero akate l’eshikikelo tshɛ ate: “Nkumadiɔndjɔ, wɛ mbeyaka akambo tshɛ, wɛ mbeyaka dia dimi kookaka ngandji.” Yeso akanyomoshikikɛ kɛnɛ kakahombe Petero nsala ate: “Leshaka ɛkɔkɔ ami wa totshitshɛ.” (Joani 21:17) Eelo, wanɛ walɔmbɔla pombaka kambɛ wanɛ wakotwama lo lokoto l’ɛkɔkɔ la Nzambi.

Yeso akandama ndo akadiakema nɛ dia nde akakambe olimu wakotome Nzambi dia ndjosala. L’etena kɛnɛ, nde ambɛnya dia kɛsɔ mbayokomɛ Petero. Yeso akate ate: “Etena kakiyɛ ɔlɔngɔlɔngɔ, wɛ akalɔtaka ahɔndɔ wɛmɛ ndo wɛ aketetaka lɛnɛ akayalangaka. Koko etena kayoyonga osombe, wɛ ayosembola anya ayɛ ko onto okina ayokɔlɔtsha ahɔndɔ ndo ayokɔtɔla lɛnɛ ahayalange.” Koko Yeso akokeketsha ate: “Tetemala ndjelami.”​—Joani 21:18, 19.

Petero akɛnyi ɔpɔstɔlɔ Joani ndo akambola ate: “Nkumadiɔndjɔ, ko pami kɛnɛ?” Eelo, kakɔna kakahombe nkomɛ ɔpɔstɔlɔ ɔsɔ wele Yeso akawokaka ngandji ka laande? Yeso akakadimola ate: “Naka dimi nanga dia nde ntshikala polo lam’ayomoya, dikambo sɔ akendadiɔ?” (Joani 21:21-23) Petero akahombe ndjela Yeso aha la ndjakiyanya lo kɛnɛ kasala anto akina. Koko, Yeso akɛnya dia Joani ayɔsɛna edja ndeka apɔstɔlɔ akina ndo ayolongola ɛnɛlɔ ka oyelo wa Yeso lo Diolelo diande.

Lo mɛtɛ, Yeso akasale akambo akina efula wele totowokoka fundama tshɛ lo wɛɔmbɔ.