Bible k’Ekila ekɔ awui wa lofunda waki Nzambi le so sho tshɛ. Sho pombaka kieka dia sho mbeya Ɔnɛ lele kangatɔ. (Joani 17:3; 2 Timɔte 3:16) Lo akatshi atɔ, Jehowa Nzambi mbewoyaka sangwelo diande lo dikambo di’anto ndo dikambo di’edjaselo kawɔ ka la nkɛtɛ.—Etatelo 3:15; Ɛnyɛlɔ 21:3, 4.

Ndooko dibuku dikina diele la shɛngiya ya ngasɔ lo nsɛnɔ y’anto. Bible totshutshuyaka dia sho nkɛnɛmɔla waonga waki Jehowa anɛ: Ngandji, kɛtshi ndo kandji. Tɔ mbishaka elongamelo, tɔ kimanyiyaka anto dia mbikikɛ oyadi kaanga asui woleki tshɛ. Ndo tɔ tetemalaka mɛnya lo sɛkɛ awui wa l’andja ɔnɛ wahɔtɔnɛ la lolango la kokele laki Nzambi.—Osambo 119:105; Hɛbɛru 4:12; 1 Joani 2:15-17.

Oma ko etatelo tɔ kakafundama lo Hɛbɛru, lo Arameyɛ ndo lo Grɛkɛ ndo tɔ kambokadimɔma l’otondo kana l’etenyi lo ɛtɛkɛta ndekana 3 000. L’ɔkɔndɔ w’otondo, tɔ mbele dibuku diamboleka kadimɔma ndo kahanyema. Ngasɔ mɛtɛ mbahombadiɔ monga. Prɔfɛsiya ka lo Bible mbutaka ɔnɛ: “Lokumu l’ɔlɔlɔ lɔnɛ la Diolelo [losango loleki ohomba lele lo Bible] layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ, ekomelo kayoya.”—Mateo 24:14.

Lo mbeya ohomba wa losango lele lo Bible, oyango aso komonga tsho dia ntondja ekadimwelo kayela dimɛna dimɛna efundelo wa ntondotondo, koko ndo dia ntondja ekadimwelo kokɛma hwe ndo kele wɔdu mbadia. Asawo wa lo apandisɛ anɛ: “Atɔndɔ wendana la okadimwelo wa Bible,” “Akambo wa laande wele lo ekadimwelo kɛnɛ,” ndo “Woho wakakome Bible le so,” mɛnyaka atɔndɔ w’okadimwelo wakayelama, kaamɛ ndo elembetshielo ɛmɔtshi wele lo ekadimwelo kɛnɛ.

Wanɛ woka Jehowa Nzambi ngandji ndo wɔtɛmɔla, kombolaka dia monga la ekadimwelo k’Ɔtɛkɛta wa Nzambi ka mɛtɛ ndo kokɛma hwe. (1 Timɔte 2:4) Dia nkotsha oyango ɔsɔ, takasale dia ekadimwelo kɛnɛ monga lo Ɔtɛtɛla lo woho wɔtɔnɛ la oyango wele la so wa nkadimola Ekadimwelo k’andja w’oyoyo lo ɛtɛkɛta ekina efula. Ombadi aso wa ngandji le, tekɔ la elongamelo ndo tekɔ lo nɔmba dia wɛ ayɛna dia ekadimwelo k’Afundelo w’Ekila kɛnɛ kekɔ ohomba efula etena kasalayɛ la wolo dia “nyanga Nzambi . . . dia mbotana.”—Etsha 17:27.