Ɛnyɛlɔ 14:1-20
14 Dimi lakende, mɛnyi ko Ɔna Ɔkɔkɔ+ emadi lo Dikona dia Siɔna+ nde l’anto nunu lokama l’akumi anɛi la nɛi (144 000)+ wele la lokombo lande ndo lokombo la She+ lofundami lo mfumu yawɔ.
2 Dimi lakoke londjo oma l’olongo laki oko dihelela di’ashi efula ndo oko londjo l’akungola wa wolo ndo londjo lakamoke laki oko londjo la amembi w’esambo wemba ndo wahoma nsɛsɛ yawɔ.
3 Ko vɔ wakembe kɛnɛ kaki oko osambo w’oyoyo+ la ntondo ka kiti ka lowandji ndo la ntondo ka ditongami 4 diasɛna+ la dikumanyi,+ ndo ndooko onto laki l’akoka wa mbeka osambo akɔ, onyake anto nunu lokama l’akumi anɛi la nɛi (144 000)+ wakasombama oma la nkɛtɛ.
4 Vɔ wele wanɛ waki kondjadja mindo la wamato, ɔnkɔnɛ vɔ wekɔ dimuma.+ Vɔ wele wanɛ watetemala ndjela Ɔna Ɔkɔkɔ l’ahole tshɛ watshɔnde.+ Vɔ wakasombama+ oma l’atei w’anto oko ɛlɔnga+ le Nzambi ndo le Ɔna Ɔkɔkɔ,
5 ndo kashi kotanema l’enyɔ awɔ, vɔ bu la ɛkɔmɔ.+
6 Dimi lakɛnyi ondjelo okina atafumbɔ l’atei w’olongo* ndo nde aki la lokumu l’ɔlɔlɔ la pondjo lakandahombe mbewoya wanɛ wodjashi la nkɛtɛ, wedja tshɛ ndo waoho tshɛ ndo ɛtɛkɛta tshɛ ndo weho w’anto tshɛ.+
7 Nde akate la dui dia wolo ate: “Nyoke Nzambi wɔma ndo nyootombole, nɛ dia wonya wa kilombo k’oma le nde wambokoka.+ Nyɔtɛmɔlɛ Ɔnɛ lakatonge olongo la nkɛtɛ la ndjale+ ndo tɔkɔkɔ t’ashi.”*
8 Ondjelo okina wa 2 akooyele, ata ate: “Tɔ kambɔkɔ! Babilɔna ka Woke+ kambɔkɔ,+ tɔ kakanɔshaka wedja tshɛ wanu wa nsɔngu* k’awui atɔ wa mindo wa dieyanelo!”*+
9 Ondjelo okina wa 3 akaayele, ata la dui dia wolo ate: “Naka onto ɔmɔtshi ekɔ lo ntɛmɔla nyama ka ngala+ la efanelo katɔ ndo ekɔ la djembetelo yatɔ lo mfumu kana lo lonya lande,+
10 nde ayɔnɔ wanu wa nkɛlɛ ka Nzambi wambodjama lo dikɔhɔ dia odudu Ande+ aha la ntɔpɔ ndo nde ayosoyama la dja ndo la mbɔkɔ ya dja+ la ntondo ka andjelo w’ekila ndo la ntondo ka Ɔna Ɔkɔkɔ.
11 Ndo edinga w’asui wa wanɛ watɛmɔla nyama ka ngala la efanelo katɔ, ndo w’onto tshɛ lele la djembetelo ya lokombo latɔ+ wayodɛka pondjo pondjo+ ndo vɔ hawotonga la momuya otsho la yanyi.
12 Lanɛ kalɔmbama ekilami,+ wanɛ wakitanyiya ɛlɛmbɛ wa Nzambi ndo wakukutɛ mbetawɔ+ kele la wɔ le Yeso dia vɔ monga la ekikelo.”
13 Ko lakoke dui oma l’olongo diata ɔnɛ: “Funda wate: Ɔngɛnɔngɛnɔ le wanɛ wavɔ wele ambeki waki Nkumadiɔndjɔ+ wa kɔlamelo ntatɛ oma ko kakianɛ. Nyuma kata ate: Eelo, vɔ womuya oma l’elimu awɔ, nɛ dia akambo wakawasale wekɔ lo taayele.”*
14 Dimi lakende, mɛnyi ko dinge dia wɛma ndo onto ɔmɔtshi lele oko ɔna onto+ odjashi lo dinge diakɔ. Nde aki la dɛmbɔ dia nkoso dia paonyi l’ɔtɛ ande ndo la lokuwa la mpɛmɔ la mina diangɔ lo lonya lande.
15 Ondjelo okina akatombe oma lo dihole di’ekila dia lo tɛmpɛlɔ, atɛ ɔnɛ lakadjasɛ lo dinge la dui dia wolo ate: “Ɔsa lokuwa layɛ la mina diangɔ kele nna, nɛ dia wonya wa mina wambokoka dikambo diangɔ dia dinela dia la nkɛtɛ diambɛla.”+
16 Ko ɔnɛ lakadjasɛ lo dinge aketsha lokuwa lande la mina diangɔ la nkɛtɛ, ko akane diangɔ dia la nkɛtɛ.
17 Ondjelo okina akatombe oma lo dihole di’ekila dia lo tɛmpɛlɔ kele l’olongo. Nde lawɔ aki la lokuwa la mpɛmɔ la mina diangɔ.
18 Ondjelo okina nto akatombe oma lo elambwelo ndo nde aki la lowandji le dja. Nde akatɛ ɔnɛ laki la lokuwa la mpɛmɔ la mina diangɔ la dui dia wolo ate: “Ɔsa lokuwa layɛ la mpɛmɔ la mina diangɔ kele ɔkɔndjɔlɛ sandji dia vinyɔ ya la nkɛtɛ, nɛ dia elowa ayɔ wambɛla.”+
19 Ondjelo aketsha lokuwa lande la mina diangɔ la nkɛtɛ ndo akakɔndjɔla sandji dia vinyɔ ya la nkɛtɛ, ko nde akadje lo diamula dia woke dia nkɛlɛ ka Nzambi.+
20 Wakatondja diamula diakɔ l’andja w’osomba, ko dikila diakatombe oma lo diamula diakɔ diaki dingunda polo l’ɛkɔdi wa l’enyɔ wa mfalasa, etale ka stadia 1 600.*
Nɔtɛ ka l'ɛse ka dikatshi
^ Kana “lo loowa; la diko di’ɔtɛ.”
^ Kana “tɛkɔ.”
^ Grɛkɛ, por·neiʹa. Enda Elembetshielo.
^ Kana “nkɛlɛ.”
^ Kana “kaamɛ la wɔ.”
