Ɛnyɛlɔ 22:1-21
22 Ko ondjelo akamɛnya ɔkɛdi w’ashi wa lɔsɛnɔ+ waki wɛma oko lɔwɔkɔ la kristalɛ, wakɛla oma lo kiti ka lowandji ka Nzambi ndo ka Ɔna Ɔkɔkɔ+
2 otsha l’atei wa shinga ya woke ya l’osomba. Ndo lo wedi akɔ 2 w’ɔkɛdi mbaki esongo wa lɔsɛnɔ wakatɔka elowa mbala 12 ɔnɔnyi tshɛ. Akatshi w’esongo akɔ waki dikambo dia ɛkɔnwɛlɔ ka wedja.+
3 Ndo mananu hayalaki nto l’osomba. Koko, kiti ka lowandji ka Nzambi ndo ka Ɔna Ɔkɔkɔ+ kayoyalaka l’osomba, ko ekambi wa Nzambi wayowokambɛka olimu w’ekila
4 ndo vɔ wayɛna elungi kande+ ndo lokombo lande layonga lo mfumu yawɔ.+
5 Ndo nto, otsho hatoyala nto+ ndo vɔ hawotoyala l’ohomba w’osase wa tala kana osase wa yanyi, nɛ dia Jehowa* Nzambi ayowahɛtshɛ osase,+ ko vɔ wayolɛ oko nkumi ya dikanga pondjo pondjo.+
6 Nde akambutɛ ate: “Ɛtɛkɛta ɛnɛ wekɔ wa kɔlamelo* ndo mɛtɛ.+ Eelo, Jehowa* Nzambi lakatɛkɛta lo tshimbo y’amvutshi+ akatome ondjelo ande dia ndjɛnya ekambi ande akambo wahomba salema keema edja.
7 Hokamɛ! Dimi lekɔ lo ndjaye esadi.+ Diɛsɛ le onto tshɛ lakitanyiya ɛtɛkɛta wa prɔfɛsiya wele lo wɔɔmbɔ ɔnɛ.”+
8 Dimi Joani mbakoke ndo mbakɛnyi akambo asɔ. Lam’akamawaoke ndo lam’akamawaɛnyi, dimi lakakusama l’ekolo wa ondjelo wakamɛnya akambo akɔ dia mbɔtɛmɔla.
9 Koko nde akambutɛ ate: “Eenda! Tosalake ngango! Dimi lekɔ tsho osekayɛ okambi ndo ɔmɔtshi l’atei w’ananyɔ amvutshi ndo wa wanɛ wakitanyiya ɛtɛkɛta wele lo wɔɔmbɔ ɔnɛ. Tɛmɔla Nzambi.”+
10 Nde akambutɛ nto ate: “Toshɛke ɛtɛkɛta wa prɔfɛsiya wele lo wɔɔmbɔ ɔnɛ, nɛ dia etena kakashikikɛma kaya suke.
11 Ɔnɛ lasala akambo wa kɔlɔ atetemale nsala akambo wa kɔlɔ, ndo ɔnɛ lele la lɔkɛwɔ la mindo atetemale lo akambo ande wa mindo. Koko, onto ɔlɔlɔ atetemale l’ɔlɔlɔ ande ndo ɔnɛ lele ekila atetemale monga ekila.
12 “‘Hokamɛ! Dimi lekɔ lo ndjaye esadi ndo lekɔ lo ndjaye la difuto dia ndjofuta onto l’onto lo ndjela etsha ande.+
13 Dimi kele Alfa la Omega,*+ la ntondo ndo la ndjihelo, etatelo la ekomelo.
14 Diɛsɛ le wanɛ wakasole ekutu+ awɔ dia vɔ nkondja lotshungɔ la ntshɔ otsha lo esongo wa lɔsɛnɔ+ ndo dia vɔ mbɔtɔ l’osomba oma lo asoko awɔ.+
15 L’andja w’osomba mbele mfɔ* la wanɛ wele la diɔtɔnganelo la ɛdiɛngɛ, la atshi w’awui wa mindo wa dieyanelo,* la andjakanyi, la atɛmɔdi wa dikishi ndo anto tshɛ walanga kashi ndo watotaka kashi.’+
16 “‘Dimi Yeso, lakatome ondjelo ami dia nde ndjonyewoya akambo asɔ lo dikambo dia tshumanelo. Dimi lekɔ odio ndo kanula ya Davidɛ+ ndo yɔɔtɔ ya pindju+ ya ngaingai.’”
17 Nyuma la otshukami+ wekɔ lo ntetemala mbuta vate: “Yaka!” Onto tshɛ loka ate ɔnɛ: “Yaka!” Onto tshɛ lele la mposa aye,+ ndo onto tshɛ lalanga, ayɔshi ashi wa lɔsɛnɔ wɔsɔsa.+
18 “Lekɔ lo mbutɛ onto tshɛ loka ɛtɛkɛta wa prɔfɛsiya wele lo wɔɔmbɔ ɔnɛ nte: Naka onto mbahɛ dui dimɔtshi laadiko di’akambo anɛ,+ kete Nzambi ayowahɛ asui wofundami lo wɔɔmbɔ ɔnɛ,+
19 ndo naka onto minya dui dimɔtshi oma l’ɛtɛkɛta wa prɔfɛsiya wele lo wɔɔmbɔ ɔnɛ, kete Nzambi ayonya yema yande oma l’esongo wa lɔsɛnɔ+ ndo nde hatɔtɔ l’osomba w’ekila,+ oko wofundamidiɔ lo wɔɔmbɔ ɔnɛ.
20 “Ɔnɛ lewoya akambo asɔ kata ate: ‘Eelo, dimi lekɔ lo ndjaye esadi.’”+
“Aamɛɛ. Nkumadiɔndjɔ Yeso yaka.”
21 Ɔlɔlɔ waheyama mbɛdika wa Nkumadiɔndjɔ Yeso wayale la ekilami!
Nɔtɛ ka l'ɛse ka dikatshi
^ Kana “wa mbɛkɛ otema.”
^ Kana “dɛta A la dɛta Z.” Alfa ndo Omega ekɔ dɛta dia ntondo la di’ekomelo lo alfabɛtɛ wa lo Grɛkɛ.
^ Mbuta ate wanɛ watosalaka akambo wele wɔnɔnyi lo washo wa Nzambi.
^ Enda Elembetshielo, “Awui wa mindo wa dieyanelo.”
