Ɛzɛkiyɛlɛ 11:1-25
11 Ko nyuma kɛmɔtshi kakambidiya ndo kakantɔlɛ lo soko dia lo ɛstɛ dia luudu la Jehowa, soko diakɛlɛ otsha lo ɛstɛ.+ Lɛkɔ lo ɛɔtwɛlɔ ka soko, dimi lakɛnyi apami 25, ndo l’atei awɔ kaki Jazaniya ɔna Azura nde la Pelatiya ɔna Bɛnaya, ewandji w’anto.+
2 Oma laasɔ, nde akambutɛ ate: “Ɔna onto, wango wekɔ apami wadja sheke ya nsala kɔlɔ ndo washana dako dia kɔlɔ lo* osomba ɔnɛ.
3 Vɔ mbutaka vate: ‘Onde ɔnɛ keema etena ka mbika mvudu?+ Osomba* wekɔ mpoke ka nkatɛ*+ ndo sho tekɔ onatshi.’
4 “Ɔnkɔnɛ, ta prɔfɛsiya lo dikambo diawɔ. Ɔna onto+ le, ta prɔfɛsiya.”
5 Oma laasɔ, nyuma ka Jehowa kakaye le mi,+ ko nde akambutɛ ɔnɛ: “Ta wate: ‘Jehowa kata ate: “Luudu la Isariyɛlɛ le, kɛnɛ kakanyate kekɔ dimɛna, ndo dimi mbeyaka kɛnɛ kafɔnyanyu.*
6 Nyu nyakadiakisha anto efula lo osomba ɔnɛ, ndo nyakalodia toshinga tawɔ la edo.”’”+
7 “Diakɔ diata Nkum’Olongo Nkumadiɔndjɔ Jehowa ate: ‘Edo wakanyadiake lo osomba ɔnɛ mbele onatshi, ndo osomba mbele mpoke ka nkatɛ.+ Koko nyu nyuamɛ nyayotondjama oma lɔkɔ.’”
8 “‘Nyu nyakokaka lokuwa la ta wɔma,+ ndo dimi layela lokuwa la ta le nyu,’ mbata Nkum’Olongo Nkumadiɔndjɔ Jehowa.
9 ‘Dimi layonyotondja oma l’atei awɔ ndo layonyokimɔ lo anya wa angɛndangɛnda ndo layela elombwelo le nyu.+
10 Nyu nyayodiakema la lokuwa la ta.+ Dimi layonyolombosha lo olelo wa Isariyɛlɛ,+ ko nyu nyayohomba mbeya dia dimi kele Jehowa.+
11 Osomba hawotoyala mpoke ka nkatɛ le nyu, ndo nyu hanyotonga onatshi l’etei katɔ; dimi layonyolombosha lo olelo wa Isariyɛlɛ,
12 ko nyu nyayohomba mbeya dia dimi kele Jehowa. Nɛ dia nyu kɔkɛndakɛnda lo wadjango ami ndo nyu kondjela dombwelo+ diami, koko nyu nyakasale akambo lo yoho yɔtɔnɛ la dombwelo dia wedja wonyodingi.’”+
13 Kam’akamate prɔfɛsiya kɛsɔ, Pelatiya ɔna Bɛnaya akavu, ko dimi lakayakɔsha ekukumadi ndo lakade ekoko la dui dia wolo nte: “Hayii! Nkum’Olongo Nkumadiɔndjɔ Jehowa! Onde wɛ ayanga nshila atshikadi wa Isariyɛlɛ+ oshiki?”
14 Ɔtɛkɛta wa Jehowa wakaye le mi nto ɔnɛ:
15 “Ɔna onto, ananyɔ, aseka ananyɔ wele la lotshungɔ la ntshungola, kaamɛ la luudu l’otondo la Isariyɛlɛ, ase Jɛrusalɛma wakawatɛ ɔnɛ: ‘Nyangane etale la Jehowa. Wodja wekɔ waso; wakatoshawɔ dia vɔ monga waso.’
16 Ɔnkɔnɛ ta wate: ‘Nkum’Olongo Nkumadiɔndjɔ Jehowa kata ate: “Kaanga mbakamaatɔlɛ etale l’atei wa wedja ndo mbakamaahandjola l’atei wa wedja,+ keema edja dimi layoyala tɛmpɛlɔ k’ekila le wɔ lo wedja wakawatshu.”’+
17 “Ɔnkɔnɛ, ta wate: ‘Nkum’Olongo Nkumadiɔndjɔ Jehowa kata ate: “Dimi layonyosanganya oma le anto ndo layonyotshumanya oma lo wedja wakanyadiangana, ndo dimi layonyosha wodja wa Isariyɛlɛ.+
18 Ko vɔ wayokalola lɛkɔ ndo wayonya diangɔ tshɛ dia nyɛtɛɛtɛ ndo ditshelo+ tshɛ dia wɔnɔnyi oma lɔkɔ.
19 Dimi layowasha otema wele kaamɛ,*+ ndo layodja yimba y’oyoyo le wɔ;+ ndo dimi layonya otema wa dive oma lo alemba+ awɔ ko layowasha otema wa emunyi,*+
20 dia vɔ nkɛndakɛnda lo wadjango ami ndo ndjela dombwelo diami ndo dikitanyiya. Laasɔ mbayowonga anto ami, ndo dimi layonga Nzambi kawɔ.”’
21 “‘“Koko le wanɛ wele etema awɔ wambɛlɛ dia ntetemala la diangɔ diawɔ dia nyɛtɛɛtɛ ndo lo ditshelo diawɔ dia wɔnɔnyi, dimi layela etombelo wa kɔlɔ w’oma lo mboka kawɔ lo ɛtɛ awɔ,” mbata Nkum’Olongo Nkumadiɔndjɔ Jehowa.’”
22 Oma laasɔ, akɛruba wakahahanya ahafu awɔ, ndo etshimbi waki suke la wɔ,+ ndo lotombo la Nzambi ka Isariyɛlɛ laki laadiko diawɔ.+
23 Oma laasɔ, lotombo la Jehowa+ lakadɛ oma lo osomba ko lakatemala la diko dia dikona lo ɛstɛ k’osomba.+
24 Ko nyuma kɛmɔtshi kakambidiya lo ɛnɛlɔ l’ekimanyielo ka nyuma ka Nzambi, ko kakantɔlɛ le anto waki lo lɔhɔmbɔ la Kaladiya. Oma laasɔ, ɛnɛlɔ kakamɛnyi kakantshike.
25 Ko dimi lakatatɛ mbutɛ anto waki lo lɔhɔmbɔ akambo tshɛ wakamɛnya Jehowa.
Nɔtɛ ka l'ɛse ka dikatshi
^ Kana “dia ndɔsha.”
^ Tshɛk., “Nde,” osomba wa Jɛrusalɛma, lɛnɛ akafɔnyaka ase Juda dia wayokokamɛ.
^ Kana “mpoke ka onyɔ woke kakatɛwɔ diangɔ.”
^ Kana “akambo waya lo yimba yanyu.”
^ Mbuta ate otema wakɛta dia ndjela ɛlɔmbwɛlɔ kaki Nzambi.
^ Tshɛk., “otema ɔtɔi.”
