Ɛzɛkiyɛlɛ 14:1-23
14 Dikumanyi dimɔtshi dia lo Isariyɛlɛ wakaye ndo wakadjasɛ la ntondo kami.+
2 Ko ɔtɛkɛta wa Jehowa wakaye le mi ɔnɛ:
3 “Ɔna onto, apami ango wamboyashikikɛ dia ndjela dikishi diawɔ dia nyɛtɛɛtɛ,* ndo vɔ wambokitsha otamba wa ntakanya wakonya anto dia nsala pɛkato. Onde dimi pombaka mbatshika dia vɔ mimbolami kanyi?+
4 Kakianɛ sawola la wɔ kele tɛwɔ wate: ‘Nkum’Olongo Nkumadiɔndjɔ Jehowa kata ate: “Naka ose Isariyɛlɛ amboyashikikɛ dia ndjela dikishi diande dia nyɛtɛɛtɛ ndo ambokitsha otamba wa ntakanya wakonya anto lo nsala pɛkato ko nde amboya dia ndjombola omvutshi kanyi, dimi Jehowa layowokadimola lo yoho ya dimɛna yɔtɔnɛ la efula ka dikishi diande dia nyɛtɛɛtɛ.
5 Nɛ dia dimi layosala dia wɔma monga lo etema wa luudu la Isariyɛlɛ,* nɛ dia vɔ tshɛ wakangana oma le mi ndo wakayele dikishi diawɔ dia nyɛtɛɛtɛ.”’+
6 “Ɔnkɔnɛ tɛ luudu la Isariyɛlɛ wate: ‘Nkum’Olongo Nkumadiɔndjɔ Jehowa kata ate: “Nyokalole ndo nyokadimɔ oma le dikishi dianyu dia nyɛtɛɛtɛ ndo nyokadimole dungi dianyu oma lo ditshelo dianyu tshɛ dia wɔnɔnyi.+
7 Nɛ dia naka ose Isariyɛlɛ ɔmɔtshi kana ɔngɛndangɛnda wodjashi lo Isariyɛlɛ amboyakakitola la mi ndo amboyashikikɛ dia ndjela dikishi diande dia nyɛtɛɛtɛ ndo ambokitsha otamba wa ntakanya wakonya anto dia nsala pɛkato, ko oma laasɔ nde amboya dia ndjombola omvutshi+ ami kanyi, dimi Jehowa layowokadimola dimɛ.
8 Dimi layɛdiya elungi kami otsha le onto ɔsɔ ndo layowetɛ djembetelo yasha ɔhɛmwɛlɔ ndo ɛtɛkɛta wa yokedi, ndo dimi layowonya oma l’atei wa anto+ ami; ko nyayohomba mbeya dia dimi kele Jehowa.”’
9 “‘Ko naka omvutshi ambokesama ndo ambosha okadimwelo, kete dimi Jehowa kambokesa omvutshi+ akɔ. Dimi layosembola lonya lami dia mbɔlɔsha ndo layowonya oma l’atei wa wodja ami wa Isariyɛlɛ.
10 Vɔ wayohomba mɛmba onongo awɔ; onongo wa ɔnɛ lambola kanyi wayonga woho ɔtɔi la onongo wa omvutshi,
11 dia luudu la Isariyɛlɛ ntshika mbekekɔ oma le mi ndo ntshika ndjadja mindo la kɔlɔ yawɔ tshɛ. Ko vɔ wayonga anto ami ndo dimi layonga Nzambi+ kawɔ,’ mbata Nkum’Olongo Nkumadiɔndjɔ Jehowa.”
12 Ɔtɛkɛta wa Jehowa wakaye le mi nto ɔnɛ:
13 “Ɔna onto, naka wodja wambonsalɛ pɛkato ndo wamboshisha kɔlamelo, dimi layosembola lonya lami otsha le wɔ ndo layolanya kɛnɛ kawasha mbo ya ndɛ,*+ ndo dimi layotoma ndjala lɔkɔ+ ndo layoshila anto la nyama ya lɔkɔ+ oshiki.”
14 “‘Oyadi kaanga apami 3 anɛ: Nɔa,+ Danyɛlɛ+ ndo Jɔbɔ+ waki lɔkɔ, vɔ wotokoka ndjashimbɛ paka vɔamɛ* ato l’ɔtɛ wa losembwe+ lawɔ,’ mbata Nkum’Olongo Nkumadiɔndjɔ Jehowa.”
15 “‘Kana tɔshi dia dimi nsala dia nyama ya mpango ya l’okonda mbeteta lo wodja akɔ ko yɔ mana anto wa lɔkɔ* ndo mbowetɛ tɔngɔ to aha la onto ɔmɔtshi mbeteta lɔkɔ l’ɔtɛ wa nyama ya l’okonda.+
16 Lo mɛtɛ oko wemi la lɔsɛnɔ,’ mbata Nkum’Olongo Nkumadiɔndjɔ Jehowa, ‘oyadi kaanga apami 3 asɔ waki lɔkɔ, totowoshimbɛ oyadi anawɔ wa apami kana anawɔ wa wamato; vɔ wotoyashimbɛ paka vɔamɛ ato, ndo wodja wotoyala tɔngɔ to.’”
17 “‘Kana tɔshi dia dimi mbela lokuwa la ta le wodja+ akɔ ndo dimi mbuta nte: “Lokuwa la ta leetete lo wodja,” ko lɔ nshila anto la nyama+ oshiki.
18 Oyadi kaanga apami 3 asɔ waki lɔkɔ, lo mɛtɛ oko wemi la lɔsɛnɔ,’ mbata Nkum’Olongo Nkumadiɔndjɔ Jehowa, ‘totowoshimbɛ oyadi anawɔ wa apami kana anawɔ wa wamato; vɔ wotoyashimbɛ paka vɔamɛ ato.’”
19 “‘Kana tɔshi dia dimi ntoma elando lo wodja+ akɔ ndo dimi tshulola nkɛlɛ kami le wɔ la ɔkɛdiɛlɔ wa dikila dia nshila anto la nyama oshiki oma lɔkɔ.
20 Oyadi kaanga Nɔa,+ Danyɛlɛ+ ndo Jɔbɔ+ waki lɔkɔ, lo mɛtɛ oko wemi la lɔsɛnɔ,’ mbata Nkum’Olongo Nkumadiɔndjɔ Jehowa, ‘totowoshimbɛ oyadi anawɔ wa apami kana anawɔ wa wamato; vɔ wotoyashimbɛ paka vɔamɛ* ato l’ɔtɛ wa losembwe+ lawɔ.’”
21 “Nɛ dia Nkum’Olongo Nkumadiɔndjɔ Jehowa kata ate: ‘Ngasɔ mbayodioyala lam’ayomotoma alanya*+ ami 4: Lokuwa la ta, ndjala ka kasha, nyama ya mpango ya l’okonda ndo elando+ le Jɛrusalɛma dia nshila anto la nyama oshiki oma lɔkɔ.+
22 Koko, atshikadi amɔtshi wa lɔkɔ wayohandɔ ndo wayotondjama,+ oyadi ana wa apami kana ana wa wamato. Vɔ wekɔ lo ndjaye le nyu ndo lam’ayonyɛna mboka yawɔ ndo etsha awɔ, ndooko onyake nyu nyayosambema l’ɔtɛ wa mpokoso kakamela le Jɛrusalɛma, l’ɔtɛ wa kɛnɛ tshɛ kakamayisalɛ.’”
23 “‘Vɔ wayonyosamba lam’ayonyɛna mboka yawɔ ndo etsha awɔ, ko nyu nyayeya dia aha osalasala mbakamasale kɛnɛ kakamahombe ndjisalɛ,’+ mbata Nkum’Olongo Nkumadiɔndjɔ Jehowa.”
Nɔtɛ ka l'ɛse ka dikatshi
^ Tshɛkɛta ya lo Hɛbɛru yele lanɛ mbeyaka mbɔtɔnɛ la tshɛkɛta yalembetshiya “tumi” ndo vɔ nkamba la yɔ dia mɛnya diɔnyɔ di’efula.
^ Tshɛk., “wayonda luudu la Isariyɛlɛ lo etema awɔ.”
^ Tshɛk., “layohembola tosongo tawɔ ta mapa.” Ondo mendanaka la tosongo takawatɔngɛka mapa.
^ Kana “anima awɔ.”
^ Kana “mana ana wa lɔkɔ.”
^ Kana “anima awɔ.”
^ Kana “etsha ami wa elombwelo.”
