Ɛzɛkiyɛlɛ 23:1-49
23 Ɔtɛkɛta wa Jehowa wakaye le mi nto ɔnɛ:
2 “Ɔna onto, wamato 2 waki ana wa otema ɔtɔi.+
3 Vɔ wakayala numba lo Edjibito;+ oma ko tɔkɛndakɛnda tawɔ vɔ wakayasha lo kinumba. Awɛlɛ awɔ wakaminyaminyama lɛkɔ ndo ntolo yawɔ y’emuma yakanandema lɛkɔ.
4 Nkombo yawɔ ko Ohola* laki enondo ndo Oholiba* laki kose. Vɔ wakayala wami ndo wakote ana w’apami la ana wa wamato. Lo kɛnɛ kendana la nkombo yawɔ, Ohola ele Samariya+ ndo Oholiba ele Jɛrusalɛma.
5 “Ohola akatatɛ nsala kinumba+ etena kakinde lakimi. Nde aki la nsaki ka mbeyana la wanɛ wakolangaka,+ asukanyi ande w’ase Asuriya.+
6 Vɔ waki waa nguvɛrnɛrɛ yakalɔtɛ ahɔndɔ wa bule ndo topita tolɛ, vɔ tshɛ ɛlɔngɔ w’apami w’amɛna wahemi lo mfalasa yawɔ.
7 Nde akatetemala nsala loseka la ana w’apami tshɛ woleki amɛna wa lo Asuriya, nde akayadje mindo+ la dikishi dia nyɛtɛɛtɛ* dia wanɛ wakinde la nsaki ka mbeyana la wɔ.
8 Nde kotshika kinumba kakandasalaka lo Edjibito, nɛ dia lo dikɛnda diande vɔ waketamaka la nde, wakakimɛka ntolo kande ka emuma ndo wakahongolaka nsaki kawɔ ka dieyanelo* le nde.+
9 Ɔnkɔnɛ, dimi lakookimɔ lo anya wa wanɛ wakolangaka, ana w’apami w’ase Asuriya,+ wanɛ wakinde la nsaki ka mbeyana la wɔ.
10 Vɔ wakatondja otakataka+ ande sɛkɛ, wakande anande w’apami la anande wa wamato+ ndo vɔ wakoodiake la lokuwa la ta. Nde akayala la lokumu la kɔlɔ l’atei wa wamato ndo vɔ wakela kilombo le nde.
11 “Etena kakɛnyi Oholiba wa kadiyɛnde dui sɔ, nsaki kande ka dieyanelo kakaleke monga kɔlɔ efula ndo kinumba kande kakaleke ka kadiyɛnde kɔlɔ.+
12 Nde akayala la nsaki ka mbeyana la asukanyi ande, ana w’apami w’ase Asuriya,+ waa nguvɛrnɛrɛ ndo topita tolɛ takalɔtɛ ahɔndɔ wa lɔnɛnɛ ndo takahema laadiko dia mfalasa, vɔ tshɛ ɛlɔngɔ w’apami w’amɛna.
13 Etena kakandayadje mindo, dimi lakɛnyi dia vɔ akɔ 2 wakayele mboka kakɔ ɔtɔi.+
14 Koko nde akatetemala mfudia etsha ande wa kinumba. Nde akɛnyi apami wakawasange lo ehele, esato w’ase Kaladiya wakawasange la dangi dia beela,
15 wɔlɔtshi eya lo nkende yawɔ, la ahɔndɔ wakelekawɔ l’ɔtɛ watalɛndalɛnda lo ɛtɛ awɔ, wele la ɛnamelo ka andɔshi wa ta, vɔ tshɛ wafɔna la ase Babilɔna, wakotɔ lo wodja w’ase Kaladiya.
16 Nde akatatɛ monga la nsaki ka mbeyana la wɔ lam’akandawaɛnyi ndo nde akaatomɛ akɛndji la Kaladiya.+
17 Ɔnkɔnɛ, ana w’apami w’ase Babilɔna wakayaka lo mbeto kande dia ndjeyana la nde ndo vɔ wakawodje mindo la nsaki kawɔ ka dieyanelo.* L’ɔkɔngɔ wa vɔ mbodja mindo, nde* akakadimɔ oma le wɔ ele la lohetsho.
18 “Lam’akandatetemala ndjasha lo yoho ya fumbɔ nsɔnyi lo kinumba ndo ntondja otakataka+ ande sɛkɛ, dimi* lakakadimɔ oma le nde la lohetsho, oko wakamakadimɔ oma le kadiyɛnde la lohetsho.+
19 Nde akatetemala mfudia etsha ande wa kinumba,+ lo mbohɔ nshi yande ya dikɛnda etena kakandasalaka kinumba lo wodja wa Edjibito.+
20 Nde aki la nsaki ka mbeyana la wɔ oko eseka w’apami wele tenyi diawɔ dia demba diekɔ oko dia mponda ndo tenyi diawɔ dia demba dia diwutshi diekɔ oko dia mfalasa.
21 Wɛ akakombola lɔkɛwɔ la nsɔnyi laki la yɛ lo nshi ya dikɛnda lo Edjibito+ etena kakawanandaka ntolo kayɛ, awɛlɛ wa lo nshi yayɛ ya dikɛnda.+
22 “Ɔnkɔnɛ Oholiba le, Nkum’Olongo Nkumadiɔndjɔ Jehowa kata ate: ‘Dimi layanga ntshutshuya wanɛ wakolanga+ wakayakadimɔ* oma le wɔ la lohetsho ndo dimi layanga mbaela dia ndjokɔlɔsha oma lo bɛkɛ tshɛ,+
23 ana w’apami w’ase Babilɔna+ ndo ase Kaladiya+ tshɛ, apami wa Pekodɛ,+ Shoa ndo Koa, kaamɛ la ana w’apami tshɛ w’ase Asuriya. Vɔ tshɛ wekɔ ɛlɔngɔ w’apami w’amɛna, waa nguvɛrnɛrɛ ndo topita tolɛ, andɔshi wa ta ndo ɛsɔnami,* vɔ tshɛ wahemi lo mfalasa.
24 Vɔ wayokɔlɔsha la pusupusu ya ta yadikita ndo la etshimbi ndo la leemba la woke la asɔlayi, la engawo ka woke, la engawo ka tshitshɛ* ndo la lofulɛ. Vɔ wayemala wokodingi ndo dimi layowasha lotshungɔ la mbela elombwelo, ko vɔ wayokolombosha oko wɛnawɔ dimɛna.+
25 Dimi layɛnya yɛnyi yakokami ndo vɔ wayokosalɛ akambo la nkɛlɛ. Vɔ wayohembola ɔhɛmbɛ ayɛ la atoyi ayɛ ndo wanɛ wayotshikala l’atei ayɛ wayodiakema la lokuwa la ta. Vɔ wayɔsa anayɛ w’apami la anayɛ wa wamato ndo wanɛ wayotshikala l’atei ayɛ wayotshumbama la dja.+
26 Vɔ wayokokolola ahɔndɔ+ ayɛ ndo wayɔsa dɛngalɛnga+ diayɛ di’amɛna.
27 Dimi layokomiya lɔkɛwɔ layɛ la nsɔnyi ndo kinumba+ kayɛ kakatatɛ lo wodja wa Edjibito.+ Wɛ ayotshika mbaenda ndo wɛ hatohɔ Edjibito nto.’
28 “Nɛ dia Nkum’Olongo Nkumadiɔndjɔ Jehowa kata ate: ‘Dimi layanga kokimɔ le wanɛ wahetshayɛ, wanɛ wakayakadimɔ* oma le wɔ la lohetsho.+
29 Vɔ wayokosalɛ akambo la lohetsho ndo wayɔsa kɛnɛ tshɛ kakayadiɛnɛ+ dia kikondja ndo wayokotshika otakataka ndo hwe. Otakataka wa nsɔnyi ka awui ayɛ wa mindo ndo lɔkɛwɔ layɛ la nsɔnyi ndo kinumba kayɛ kayotomba sɛkɛ.+
30 Wayokosalɛ akambo asɔ nɛ dia wɛ akayele wedja oko numba,+ nɛ dia wɛ akayadje mindo la dikishi diawɔ dia nyɛtɛɛtɛ.+
31 Wɛ akayele mboka kakɔ 1 kakayele kadiyɛyɛ+ ndo dimi layodja dikɔhɔ diande lo lonya layɛ.’+
32 “Nkum’Olongo Nkumadiɔndjɔ Jehowa kata ate:
‘Wɛ ayɔnɔ dikɔhɔ di’ɔhɔngɔ ndo dia woke dia kadiyɛyɛ,+Ndo wɛ ayoyala ɛngɔ ka tɔɔla ndo ka diɔnyɔ diele efula+ lo dikɔhɔ.
33 Wodjɔki la lɔkɔnyɔ wayokokumɛ,*Dikɔhɔ dia diambo ndo dia elanyelo,Dikɔhɔ dia kadiyɛyɛ Samariya.
34 Wɛ ayohomba dinɔ ndo dishidiya+ ndo ntɔma bɛtshi diadiɔ dia diwombaOma laasɔ, wɛ ayohembola awɛlɛ ayɛ.
“Nɛ dia dimi dimɛ lambɔtɛkɛta,” mbata Nkum’Olongo Nkumadiɔndjɔ Jehowa.’
35 “Diakɔ diata Nkum’Olongo Nkumadiɔndjɔ Jehowa ate: ‘Lam’ele wɛ akambohɛ ndo akaminya yimba tshɛ lo tshɛ,*+ wɛ ayodiɛnɛ la etombelo wa kɔlɔ w’oma lo lɔkɛwɔ layɛ la nsɔnyi ndo etsha ayɛ wa kinumba.’”
36 Oma laasɔ, Jehowa akambutɛ ate: “Ɔna onto, onde wɛ ayewoya kilombo le Ohola ndo Oholiba+ ndo ayowaɛnya ditshelo diawɔ dia wɔnɔnyi?
37 Vɔ wakasale loseka+ ndo dikila diekɔ lo anya awɔ. Aha tsho vɔ wakasale loseka* la dikishi diawɔ dia nyɛtɛɛtɛ, koko ndo woho wakawatshumbe anawɔ wakawambotɛ lo dja oko mbo ya ndɛ dikambo dia dikishi diawɔ.+
38 Ndo nto kɛnɛ kakawansalɛ tɔ kɛnɛ: Vɔ wakadje tɛmpɛlɔ kami k’ekila mindo lushi lɔsɔ ndo vɔ wakɔnyɔla sabato yami.
39 L’ɔkɔngɔ wa vɔ ndjaka anawɔ oko elambo le dikishi diawɔ dia nyɛtɛɛtɛ,+ vɔ wakaye lo tɛmpɛlɔ kami k’ekila dia ndjokiɔnyɔla+ lushi lakɔ. Kɛsɔ mbakawasale l’etei ka luudu lami.
40 Vɔ wakatome ndo ɔkɛndji dia anto ndja oma lo etale.+ Etena kakawayayaka, wɛ akɔkɛ, akadise disadisa lo washo ayɛ ndo akayalɛngɛ la dɛngalɛnga.+
41 Ndo wɛ akadjasɛ lo nkɔsa ka diambo+ ndo mɛsa wakakitshama la ntondo katɔ+ ndo wɛ akakitsha tshɔ+ yami ndo esɔ+ kami lɔkɔ.
42 Londjo la olui w’anto wahadje dikambo yimba lakokɛma lɛkɔ, wele l’atei awɔ mbaki ambidjɔki wakawela oma l’oswe wa shɛnga. Vɔ wakadje ɛkɔma lo anya wa wamato akɔ ndo alɛmbɔ wa nkoso w’amɛna lo ɛtɛ awɔ.
43 “Ko dimi lakate lo dikambo dia womoto lakalɛmbɛ la loseka nte: ‘Wonya ɔnɛ nde ayotetemala nsala kinumba kande.’
44 Ko vɔ wakatetemalaka ntshɔ le nde, oko onto latshɔ le womoto la numba. Ngasɔ mbakawatshɔka le Ohola ndo le Oholiba, wamato wele la lɔkɛwɔ la nsɔnyi.
45 Koko anto w’ɛlɔlɔ wayowolombosha kilombo kɔtɔnɛ la loseka+ ndo la ɔkɛdiɛlɔ wa dikila;+ nɛ dia wamato wa loseka mbewɔ ndo vɔ wekɔ la dikila lo anya awɔ.+
46 “Nɛ dia Nkum’Olongo Nkumadiɔndjɔ Jehowa kata ate: ‘Wayela olui wa asɔlayi dia mbalɔsha dia mbaetɛ ɛngɔ ka lohetsho ndo ɛngɔ ka dimbo.+
47 Asɔlayi wayowaoka ave+ ndo wayowatshatsha la tokuwa tawɔ ta ta. Vɔ wayodiaka anawɔ w’apami la anawɔ wa wamato+ ndo wayotshumba mvudu yawɔ la dja.+
48 Dimi layokomiya lɔkɛwɔ la nsɔnyi lo wodja ndo wamato tshɛ wayokondja wetshelo ko hawotokoya lɔkɛwɔ lanyu la nsɔnyi.+
49 Vɔ wayonyela etombelo wa kɔlɔ oma lo lɔkɛwɔ lanyu la nsɔnyi ndo oma lo pɛkato yanyu yakanyasale la dikishi dianyu dia nyɛtɛɛtɛ; ko nyayohomba mbeya dia dimi kele Nkum’Olongo Nkumadiɔndjɔ Jehowa.’”+
Nɔtɛ ka l'ɛse ka dikatshi
^ Kitshimudi ate: “Luudu lami la dipɛma lekɔ le nde.”
^ Kitshimudi ate: “Luudu lande la dipɛma.”
^ Tshɛkɛta ya lo Hɛbɛru yele lanɛ mbeyaka mbɔtɔnɛ la tshɛkɛta yalembetshiya “tumi” ndo vɔ nkamba la yɔ dia mɛnya diɔnyɔ di’efula.
^ Kana “dieyanelo dia mindo.”
^ Kana “anima ande.”
^ Kana “dieyanelo dia mindo.”
^ Kana “anima ami.”
^ Kana “wakakadimɔ anima ayɛ.”
^ Tshɛk., “wanɛ wakelamɛ.”
^ Mbala efula, amboki w’eta mbakɛmbaka dingawo dia totshitshɛ sɔ.
^ Kana “wakakadimɔ anima ayɛ.”
^ Tshɛk., “wayolola le yɛ.”
^ Tshɛk., “akambikasha l’ɔkɔngɔ ayɛ.”
^ Mbuta ate loseka la lo nyuma.
