Ɛzɛkiyɛlɛ 25:1-17
25 Ɔtɛkɛta wa Jehowa wakaye le mi nto ɔnɛ:
2 “Ɔna onto, kadimola elungi kayɛ otsha le ase Amɔna+ ndo ta prɔfɛsiya lo dikambo diawɔ.+
3 Wɛ pombaka mbuta lo dikambo dia ase Amɔna wate: ‘Nyohokame ɔtɛkɛta wa Nkum’Olongo Nkumadiɔndjɔ Jehowa. Nkum’Olongo Nkumadiɔndjɔ Jehowa kata ate: “Lam’ele wɛ akate wate: ‘Ihi!’ lo dikambo dia tɛmpɛlɔ kami k’ekila etena kakatɔnyɔma ndo lo dikambo dia wodja wa Isariyɛlɛ etena kakawatshikala tɔngɔ to ndo lo dikambo dia luudu la Juda etena kakawatshu lo lɔhɔmbɔ,
4 ɔnkɔnɛ dimi layanga kokimɔ le anto wa lo Ɛstɛ dia vɔ kɔsa. Vɔ wayoka mpango* yawɔ l’etei kayɛ ndo wayoka mvudu yawɔ y’apɛma l’atei ayɛ. Vɔ wayɔlɛ elowa ayɛ ndo wayɔnɔ abɛlɛ ayɛ.
5 Dimi layetɛ Raba+ dihole dia ndeshaka kamɛlɔ ndo ɛtshi ka nkɛtɛ ka ase Amɔna dihole dia dongalonga momuyaka; ko nyayohomba mbeya dia dimi kele Jehowa.”’”
6 “Nɛ dia Nkum’Olongo Nkumadiɔndjɔ Jehowa kata ate: ‘Lam’ele wɛ akade lokambo+ ndo akahomanya ekolo ndo akangɛnangɛna* lo dikambo dia wodja wa Isariyɛlɛ la ɛtɛkɛta wa diɔnyɔ,+
7 ɔnkɔnɛ dimi layosembola lonya lami lo dikambo diayɛ dia kokimɔ le wedja oko ɛngɔ ka dimbo. Dimi layokonya oma l’atei w’anto ndo layokoshila oshiki oma lo wedja.+ Dimi layokoshila oshiki, ko wɛ ayohomba mbeya dia dimi kele Jehowa.’
8 “Nkum’Olongo Nkumadiɔndjɔ Jehowa kata ate: ‘Lam’ele Mɔaba+ la Seirɛ+ wakate vate: “Nyende, luudu la Juda lekɔ oko wedja ekina tshɛ,”
9 dimi layanga ntondja omamu* wa Mɔaba sɛkɛ lo esomba ande wa l’olelo, olangala* wa wodja ande, Bɛtɛ-Jeshimɔta, Baala-Meɔna polo la Kiriatayima.+
10 Dimi layowokimɔ kaamɛ la ase Amɔna oko ɛngɔ le anto wa lo Ɛstɛ,+ ko ase Amɔna hawotohɔma nto l’atei wa wedja.+
11 Ndo dimi layela elombwelo le Mɔaba,+ ko vɔ wayohomba mbeya dia dimi kele Jehowa.’
12 “Nkum’Olongo Nkumadiɔndjɔ Jehowa kata ate: ‘Ɛdɔmɛ ambosala akambo la shɔmbɔya otsha le luudu la Juda ndo amboyayangɛ onongo wa woke lo mbasɔmbɔya;+
13 diakɔ diata Nkum’Olongo Nkumadiɔndjɔ Jehowa ate: “Dimi layosembola lonya lami dia ndɔsha Ɛdɔmɛ ndo layodiaka anto la dongalonga dia lɔkɔ ko dimi layowetɛ tɔngɔ to.+ Oma la Temana polo la Dedana, vɔ wayodiakema la lokuwa la ta.+
14 ‘Dimi layɔsɔmbɔya Ɛdɔmɛ lo tshimbo ya wodja ami Isariyɛlɛ.+ Vɔ wayela nkɛlɛ kami ndo odudu ami le Ɛdɔmɛ, dia vɔ mɛna shɔmbɔya+ yami,’ mbata Nkum’Olongo Nkumadiɔndjɔ Jehowa.”’
15 “Nkum’Olongo Nkumadiɔndjɔ Jehowa kata ate: ‘L’ɔtɛ wa lohetsho lawɔ lahashile, ase Filistiya wakayange lo yoho ya kɔlɔ* dia nsɔmbɔya ndo ndanya.+
16 Diakɔ diata Nkum’Olongo Nkumadiɔndjɔ Jehowa ate: “Dimi layanga nsembola lonya lami dia ndɔsha ase Filistiya+ ndo dimi layanga ndjaka ase Kerɛtɛ+ ndo dimi layanga ndanya atshikadi w’anto wadjasɛ l’omamu wa ndjale.+
17 Dimi layowaela etsha wa weke wa shɔmbɔya la alanya wa la nkɛlɛ, ko vɔ wayohomba mbeya dia dimi kele Jehowa etena kayomela shɔmbɔya yami le wɔ.”’”
Nɔtɛ ka l'ɛse ka dikatshi
^ Kana “mpango yele la mpele.”
^ Kana “anima anyu.”
^ Kana “ɔlɛngɛlɔ.”
^ Kana “oholola.”
^ Kana “la lohetsho lo anima.”
