Ɛzɛkiyɛlɛ 31:1-18
-
Ɔkwɛlɔ w’Edjibito, olondo w’otale (1-18)
31 Lo ɔnɔnyi wa 11 ngɔndɔ ka 3 lushi 1, ɔtɛkɛta wa Jehowa wakaye le mi nto ɔnɛ:
2 “Ɔna onto, tɛ Farawɔ nkumekanga ka Edjibito la nyemba yande y’anto+ wate:‘Akɔna afɔna la yɛ lo woke ayɛ?
3 Aki ose Asuriya ɔmɔtshi, olondo wa la Lɛbanɔna,Waki la ntahe y’amɛna yele oko hioka, waki otale tshwa;Shɔdi yawɔ yakakomaka polo lo wange.
4 Ashi wakoohamia woke, tɛkɔ di’ashi di’ɛhɔngɔ diakawodia otale.
Ɛkɛdi waki l’otshimbedi w’otondo wa lɛnɛ akawonɛma;Mboka y’ashi awɔ yakalɔyaka esongo tshɛ wa lo ekambɔ kakɔ.
5 Diakɔ diakawole otale ndeka esongo ekina tshɛ wa lo ekambɔ kakɔ.
Ntahe yawɔ ya weke yakafulanɛ ndo ntahe yawɔ yakole etaleL’ɔtɛ wa efula k’ashi waki lo ɛkɛdi awɔ.
6 Tofudu tshɛ ta l’olongo takasale tokefu tayɔ lo ntahe yawɔ ya weke,Nyama tshɛ ya l’okonda yakotaka l’ɛse ka ntahe yawɔ,Ndo wedja tshɛ wele la anto efula wakadjasɛka lo dɛdi diawɔ.
7 Vɔ wakayala diambo lo olangala ndo lo otale wa ntahe yawɔ,Nɛ dia edio awɔ wakaholɔ polo lo ashi w’efula.
8 Ndooko olondo okina wa lo ekambɔ ka Nzambi+ wakakoke mbɛdikama la wɔ.
Ndooko osongo wa dihake waki la ntahe ya weke oko vɔ,Ndo ndooko osongo wa platanɛ wakakoke mbɛdima la ntahe yawɔ.
Ndooko osongo okina wa lo ekambɔ ka Nzambi wakakoke nsɛmanɛ la wɔ lo olangala.
9 Dimi lakawetɛ olangala la akatshi efula,Ndo esongo ekina tshɛ wa lo Ɛdɛna, ekambɔ ka Nzambi ka mɛtɛ wakɔɔkɔmiyaka.’
10 “Diakɔ diata Nkum’Olongo Nkumadiɔndjɔ Jehowa ate: ‘Lam’ele vɔ* wakakome otale efula, shɔdi yawɔ polo lo wange, ndo otema awɔ wakayala la lotamanya l’ɔtɛ wa otale awɔ,
11 dimi layowokimɔ lo anya wa omboledi wa wolo wa wedja.+ Nde mɛtɛ ayowosha dilanya, ndo dimi layowokasha l’ɔtɛ wa kɔlɔ kawɔ.
12 Ndo angɛndangɛnda, wodja woleki esehe wayowɔkɔta ndo wayowokalɛ lo akona, akatshi awɔ wayɔkɔ lo ekidi tshɛ, ndo ntahe yawɔ yayokalema tenyi tenyi lo ɛkɛdi tshɛ wa lo wodja.+ Anto tshɛ wa la nkɛtɛ wayomɔ oma lo dɛdi diawɔ ndo wayowotshika.
13 Tofudu tshɛ ta l’olongo tayodjasɛ lo okendeka awɔ wambɔkɔ, ndo nyama tshɛ ya lo okonda lo ntahe yawɔ.+
14 Dui sɔ diekɔ ngasɔ diaha osongo ɔmɔtshi wele suke la ashi monga otale ngasɔ kana shɔdi yawɔ nkoma lo wange ndo ndooko osongo walɔyama dimɛna wakoka mbɛdima la wɔ otale. Nɛ dia vɔ tshɛ wayokimɔma lo nyɔi, lo wodja wa l’ɛse, kaamɛ la ana w’anto watatshu lo difuku.’*
15 “Nkum’Olongo Nkumadiɔndjɔ Jehowa kata ate: ‘Lushi layowoholɔ otsha lo Diombo,* dimi layosala dia otanda monga. Ɔnkɔnɛ dimi layokomba ashi w’angunda ndo layemɛ ɛkɛdi awɔ diaha ashi w’efula nkɛla. Dimi layetɛ Lɛbanɔna wodjima l’ɔtɛ awɔ, ndo esongo tshɛ wa lo ekambɔ wayoma.
16 Lo londjo la ɔkwɛlɔ awɔ, dimi layosala dia wedja nsaka lokomba etena kayomɔɔtɔla lo Diombo* kaamɛ la wanɛ tshɛ wataholɔ lo difuku,* ndo esongo tshɛ wa lo Ɛdɛna,+ esongo wa lɔsɔna ndo woleki amɛna wa la Lɛbanɔna, wɛnɛ tshɛ walɔyama dimɛna la ashi wayosambema lo wodja wa l’ɛse.
17 Vɔ wambotshɔ lo Diombo* kaamɛ la nde, otsha le wanɛ wakadiakema la lokuwa la ta,+ kaamɛ la wanɛ wakoosukɛka* wakadjasɛka l’ɛse ka dɛdi diawɔ l’atei wa wedja.’+
18 “‘Osongo akɔna wa lo Ɛdɛna waki oko wɛ lo lotombo ndo lo woke?+ Koko wɛ mɛtɛ ayɔtɔlama kaamɛ la esongo wa lo Ɛdɛna otsha lo wodja wa l’ɛse. Wɛ ayetama kaamɛ la wanɛ waki kominya mpota, kaamɛ la wanɛ wakadiakema la lokuwa la ta. Kɛsɔ kayokomɛ Farawɔ la nyemba yande y’anto tshɛ,’ mbata Nkum’Olongo Nkumadiɔndjɔ Jehowa.”
Nɔtɛ ka l'ɛse ka dikatshi
^ Tshɛk., “wɛ.”
^ Kana “diombo.”
^ Kana “Sheɔlɛ,” mbuta ate odimu a pɛngando. Enda Elembetshielo.
^ Kana “Sheɔlɛ,” mbuta ate odimu a pɛngando. Enda Elembetshielo.
^ Kana “diombo.”
^ Kana “Sheɔlɛ,” mbuta ate odimu a pɛngando. Enda Elembetshielo.
^ Tshɛk., “lonya.”
