Ɛzɛkiyɛlɛ 33:1-33
33 Ɔtɛkɛta wa Jehowa wakaye le mi ɔnɛ:
2 “Ɔna onto, tɛkɛta la ana w’ase wodja ayɛ+ kele tɛwɔ wate:“‘Tɔshi dia dimi lambela lokuwa la ta lo wodja+ ko anto tshɛ wa lo wodja akɔ wambɔsa pami kɛmɔtshi ko wambowetɛ djamu yawɔ,
3 ko nde ambɛna lokuwa la ta layaye lo wodja ko amboda dimama ndo ambewola anto.+
4 Naka onto ɔmɔtshi amboka wondjo wa dimama, koko hadje yimba lo ɔhɛmwɛlɔ+ ko lokuwa la ta lamboya ndo lambɔsa lɔsɛnɔ* lande, dikila diande diayonga l’ɔtɛ ande.+
5 Nde akoke wondjo wa dimama, koko kombidja yimba lo ɔhɛmwɛlɔ. Dikila diande diayonga l’ɔtɛ ande ndamɛ. Otondonga nde akadje yimba lo ɔhɛmwɛlɔ, tshike lɔsɛnɔ* lande lotoshimbamɛ.
6 “‘Ko naka djamu ambɛna lokuwa la ta layaye ko nde hade dimama+ ndo hewodi anto, ko lokuwa la ta lamboya ko lambɔsa lɔsɛnɔ* la onto ɔmɔtshi l’atei awɔ, onto ɔsɔ ayovɔ l’ɔtɛ wa munga kande ndamɛ, koko dimi layɔlɔmba djamu dikila diande.’*+
7 “Wɛ ɔna onto, dimi lambokɔsɔna djamu ya luudu la Isariyɛlɛ; ndo lam’ayoyoka ɔtɛkɛta w’oma lo onyɔ ami, wɛ pombaka mbewolɛmiwɔ.+
8 Lam’ayomotɛ kanga kɔlɔ nte: ‘Kanga kɔlɔ, wɛ mɛtɛ ayovɔ!’+ koko wɛ hatɛkɛta dia mbewola kanga kɔlɔ dia nde ntshikitanya dionga diande, nde ayovɔ oko kanga kɔlɔ l’ɔtɛ wa munga kande,+ koko dimi layokɔlɔmba dikila diande.
9 Ko naka wɛ mbewola kanga kɔlɔ dia nde nkadimɔ oma lo mboka kande, ko nde ambotona dia ntshikitanya dionga diande, nde ayovɔ l’ɔtɛ wa munga kande,+ koko wɛ mɛtɛ ayoshimbɛ lɔsɛnɔ* layɛ.+
10 “Ɔna onto, tɛ luudu la Isariyɛlɛ wate: ‘Nyu nyakate nyate: “Ɔtɔmbɔkwɛlɔ aso ndo pɛkato yaso yaya wotsho efula le so, ambotɔndja;+ laasɔ, ngande wayototshikala la lɔsɛnɔ?”’+
11 Tɛwɔ wate: ‘“Lo mɛtɛ oko wemi la lɔsɛnɔ,” mbata Nkum’Olongo Nkumadiɔndjɔ Jehowa, “dimi haangɛnangɛna nyɔi ka kanga kɔlɔ,+ koko dimi ngɛnangɛnaka dia kanga kɔlɔ ntshikitanya dionga diande dia nde+ ntshikala la lɔsɛnɔ.+ Luudu la Isariyɛlɛ le,+ nyokalole, nyokalole oma lo mboka yanyu ya kɔlɔ,+ nɛ dia lande na kahombanyu mvɔ?”’
12 “Wɛ ɔna onto, tɛ ana w’ase wodja ayɛ wate: ‘Ɔlɔlɔ w’onto ɔlɔlɔ hawotowoshimbɛ etena katɔmbɔkɔnde;+ ndo kɔlɔ ka kanga kɔlɔ hatowotakanya etena kakadimɔnde oma lo kɔlɔ kande;+ kana onto ɔlɔlɔ hatokoka ntshikala la lɔsɛnɔ l’ɔtɛ wa ɔlɔlɔ ande lushi lasalande pɛkato.+
13 Etena kayomotɛ onto ɔlɔlɔ nte: “Wɛ mɛtɛ ayotshikala la lɔsɛnɔ,” ko nde amboyaɛkɛ lo ɔlɔlɔ ande hita ndo ambosala kɛnɛ kele kɔlɔ,*+ ndooko ditshelo diande di’ɔlɔlɔ diayohɔma, koko nde ayovɔ l’ɔtɛ wa kɔlɔ kamondosala.+
14 “‘Ndo etena katɛmi kanga kɔlɔ nte: “Wɛ mɛtɛ ayovɔ,” ko nde ambokadimɔ oma lo pɛkato kande ndo ambosala kɛnɛ kosembwe ndo kele ɔlɔlɔ,+
15 ndo kanga kɔlɔ ambokaloya ɛngɔ kakandɔshi ɔkɔlɛ+ ndo ambɔsɔmbɔla kɛnɛ kakandave,+ ambɔkɛndakɛnda lo wadjango wa lɔsɛnɔ lo ntshika dia nsala kɛnɛ kele kɔlɔ, nde mɛtɛ ayotshikala la lɔsɛnɔ.+ Nde hatovɔ.
16 Ndooko pɛkato kakandasale kayohɔma lo dikambo diande.+ L’ɔtɛ wamondosala kɛnɛ kosembwe ndo kele ɔlɔlɔ, nde mɛtɛ ayotshikala la lɔsɛnɔ.’+
17 “Koko anto wa lo wodja ayɛ wakate vate: ‘Mboka ka Jehowa keema osembɔki,’ etena kele lo mɛtɛ mboka kawɔ kele bu osembɔki.
18 “Naka onto ɔlɔlɔ ambotshika nsala ɔlɔlɔ ko ambosala kɛnɛ kele kɔlɔ, nde pombaka mvɔ l’ɔtɛ wa dui sɔ.+
19 Ko naka kanga kɔlɔ ambokadimɔ oma lo kɔlɔ kande ndo osala kɛnɛ kosembwe ndo kele ɔlɔlɔ, nde ayotshikala la lɔsɛnɔ l’ɔtɛ wamondosala dui sɔ.+
20 “Koko nyu nyakate nyate: ‘Mboka ka Jehowa keema osembɔki.’+ Luudu la Isariyɛlɛ le, dimi layolombosha onto l’onto l’atei anyu lo ndjela mboka yande.”
21 Lo ɔnɔnyi wa 12 wakiso lo lɔhɔmbɔ, ngɔndɔ ka 10 nshi 5, pami kɛmɔtshi kakahandɔ oma la Jɛrusalɛma akaye le mi+ ndo akate ate: “Osomba wambonyukɔma!”+
22 La dikɔlɔ dia la ntondo ka pami kakɔ kakahandɔ ndja, lonya la Jehowa lakaye le mi ndo nde akadihola onyɔ ami la ntondo ka pami kakɔ ndja le mi la pindju. Ɔnkɔnɛ, onyɔ ami wakadihɔ ndo dimi komonga lomi nto.+
23 Ɔtɛkɛta wa Jehowa wakaye le mi ɔnɛ:
24 “Ɔna onto, anto wodjashi lo ahole anɛ wambolanyema+ wekɔ lo mbuta dikambo dia wodja wa Isariyɛlɛ vate: ‘Abrahama aki tsho onto ɔtɔi, koko nde akɔshi wodja.+ Koko sho tekɔ efula; weho akɔ tshɛ wodja wakakimɔma le so dia vɔ monga waso.’
25 “Ɔnkɔnɛ tɛwɔ wate: ‘Nkum’Olongo Nkumadiɔndjɔ Jehowa kata ate: “Nyu nyekɔ lo ndɛ diangɔ kaamɛ la dikila,+ nyekɔ lo mbedia washo anyu otsha le dikishi dianyu dia nyɛtɛɛtɛ,* ndo nyekɔ lo ntetemala nkɛdia dikila.+ Laasɔ lande na katonyɔsa wodja?
26 Nyu nyakayaɛkɛ lo lokuwa lanyu la ta,+ nyakayasha lo ditshelo dia wɔnɔnyi, ndo onto l’onto l’atei anyu aketama la wadi a kana.+ Laasɔ lande na katonyɔsa wodja?”’+
27 “Tɛwɔ wate: ‘Nkum’Olongo Nkumadiɔndjɔ Jehowa kata ate: “Lo mɛtɛ oko wemi la lɔsɛnɔ, wanɛ wadjasɛ lo ahole wakalanyema wayodiakema la lokuwa la ta; wanɛ wele l’oswe wayokimɔma oko mbo ya ndɛ le nyama ya l’okonda; ndo wanɛ wele lo ngele ndo lo weoko wayovɔ la hemɔ.+
28 Dimi layetɛ wodja w’otondo tɔngɔ to+ ndo otako awɔ wa la lotamanya wayokomɛ, ndo akona wa lo Isariyɛlɛ wayonga tɔngɔ to,+ ndooko onto layeta laawɔ.
29 Ko vɔ wayohomba mbeya dia dimi kele Jehowa etena kayometɛ wodja w’otondo tɔngɔ to+ l’ɔtɛ wa akambo tshɛ wa wɔnɔnyi wambowosala.”’+
30 “Wɛ ɔna onto, anto ayɛ wekɔ lo ntɛkɛta lam’asawɔ dikambo diayɛ l’omamu wa mpele ndo lo asoko wa mvudu.+ Vɔ wekɔ lo mbutanɛ lam’asawɔ, onto la wonyande ɔnɛ: ‘Nyoye tohokame ɔtɛkɛta w’oma le Jehowa.’
31 Vɔ wayotshumana dia mbidjasɛ la ntondo kayɛ oko anto ami; ndo vɔ wayohokamɛ ɛtɛkɛta ayɛ, koko hawotokamba la wɔ.+ Nɛ dia vɔ kɔtɛtɛmɔlaka* la enyɔ awɔ, koko etema awɔ wekɔ la lokaki dia nkondja diangɔ lo lokeso.
32 Eenda, le wɔ wɛ ekɔ oko osambo wa ngandji ka lam’asa pami la womoto wembama la ngɛngu ka dimɛna ndo wahomama la diewo tshɛ la ehomahoma k’eshinga. Vɔ wayoka ɛtɛkɛta ayɛ, koko ndooko onto layokamba la wɔ.
33 Ndo lam’ayokotshama dui sɔ, nɛ dia diɔ diayokotshama, vɔ wayohomba mbeya dia omvutshi ɔmɔtshi aki l’atei awɔ.”+
Nɔtɛ ka l'ɛse ka dikatshi
^ Tshɛk., “lambowodiaka.”
^ Kana “anima.”
^ Kana “anima.”
^ Kana “layoyokoya la djamu l’ɔtɛ wa dikila diande.”
^ Kana “anima.”
^ Kana “kɛnɛ kele bu losembwe.”
^ Tshɛkɛta ya lo Hɛbɛru yele lanɛ mbeyaka mbɔtɔnɛ la tshɛkɛta yalembetshiya “tumi” ndo vɔ nkamba la yɔ dia mɛnya diɔnyɔ di’efula.
^ Kana “vɔ tɛkɛtaka la nsaki k’efula ka dieyanelo.”
