Ɛzɛkiyɛlɛ 36:1-38
36 “Wɛ ɔna onto, ta prɔfɛsiya lo dikambo di’akona wa lo Isariyɛlɛ ndo ta wate: ‘Akona wa lo Isariyɛlɛ le, nyohokame ɔtɛkɛta wa Jehowa.
2 Nkum’Olongo Nkumadiɔndjɔ Jehowa kata ate: “Otunyi akate lo dikambo dianyu ate: ‘Ihi! Kaanga ahole wa la diko w’edjedja waya waso!’”’+
3 “Ɔnkɔnɛ ta prɔfɛsiya wate: ‘Nkum’Olongo Nkumadiɔndjɔ Jehowa kata ate: “Lam’ele vɔ wakakohandjola ndo wakakɔlɔsha oma lo bɛkɛ tshɛ ko wɛ akayala ɛngɔ ka ehandɔ* w’oma l’atei wa wedja ndo anto wakatetemalaka ntɛkɛta lo dikambo diayɛ ndo mbuta awui wa kashi lo dikambo diayɛ,+
4 ɔnkɔnɛ, akona wa lo Isariyɛlɛ le, nyohokame ɔtɛkɛta wa Nkum’Olongo Nkumadiɔndjɔ Jehowa! Nkum’Olongo Nkumadiɔndjɔ Jehowa katɛ akona ndo tokonakona, ɛkɛdi ndo ekidi, ahole wakalana waki tɔngɔ to+ ndo esomba wakasɛkama wakawambe diangɔ dia lɛkɔ ndo wakɔnyɔma oma le ehandɔ wa wedja waadingi;+
5 le wɔ mbata Nkum’Olongo Nkumadiɔndjɔ Jehowa ate: ‘Lo dja ya ohetoheto ami,+ dimi layɔtɛkɛtɛ ehandɔ wa wedja ndo Ɛdɔmɛ w’otondo, wanɛ wele l’ɔngɛnɔngɛnɔ w’efula ndo la lɔsɔkɔ* tshɛ+ wakafune dia wodja ami waya wawɔ, dia mbɔsa ahole awɔ wa ndesha dongalonga ndo dia mimba diangɔ dia lɔkɔ.’”’+
6 “Ɔnkɔnɛ ta prɔfɛsiya lo dikambo dia wodja wa Isariyɛlɛ ndo tɛ akona, tokonakona, ɛkɛdi ndo ekidi wate: ‘Nkum’Olongo Nkumadiɔndjɔ Jehowa kata ate: “Eenda, dimi layɔtɛkɛta lo ohetoheto ami ndo lo nkɛlɛ kami, nɛ dia nyambɛmba nsɔnyi oma le wedja.”’+
7 “Diakɔ diata Nkum’Olongo Nkumadiɔndjɔ Jehowa ate: ‘Dimi dimɛ lambedia lonya lami dia ntshiba dia wedja wonyodingi wayɛmba vɔamɛ nsɔnyi kawɔ.+
8 Koko, nyu akona wa Isariyɛlɛ le, nyu nyayotondja ntahe ndo nyayɔtɔ elowa anyu dikambo dia wodja ami Isariyɛlɛ,+ nɛ dia keema edja vɔ wayokalola.
9 Nɛ dia dimi lekɔ kaamɛ la nyu ndo dimi layokadimɔ oya le nyu ndo nyayokambema ndo nyayonɛma tɔngɔ.
10 Dimi layofudia anto anyu, luudu l’otondo la Isariyɛlɛ, vɔ tshɛ ndo anto wayodjasɛ lo esomba+ ndo ahole wakalanyema wayokama nto.+
11 Eelo, dimi layofudia anto anyu ndo dongalonga dianyu;+ diɔ diayonga efula ndo diayotanɛ. Ko dimi layosala dia nyu mbidjasɛ oko wakanyadjasɛ ntondo,+ ndo layonyɔngɔnya oleki nshi ya ntondo;+ ko nyayohomba mbeya dia dimi kele Jehowa.+
12 Dimi layosala di’anto, ɛɛ, anto ami w’ase Isariyɛlɛ dia vɔ nkɛndakɛnda laadiko dianyu ndo vɔ wayonyɔsa.+ Nyayonga etenyi kawɔ k’okitɔ ndo hanyotowahondja ana nto pondjo.’”+
13 “Nkum’Olongo Nkumadiɔndjɔ Jehowa kata ate: ‘Lam’ele wekɔ lo nyotɛ vate: “Nyu nyekɔ wodja walɛ anto ndo wahondja wedja anyu ana,”’
14 ‘ɔnkɔnɛ, nyu hanyotɔlɛ nto anto ndo hanyotosala nto dia wodja anyu pomba ana,’ mbata Nkum’Olongo Nkumadiɔndjɔ Jehowa.
15 ‘Dimi hantetawɔ dia wedja ekina nyɔtɛnga kana anto nyɔla+ ndo hanyototakanya wedja anyu nto,’ mbata Nkum’Olongo Nkumadiɔndjɔ Jehowa.”
16 Ɔtɛkɛta wa Jehowa wakaye le mi nto ɔnɛ:
17 “Ɔna onto, etena kakadjasɛ luudu la Isariyɛlɛ lo wodja awɔ, vɔ wakawetɛ mindo oma lo mboka yawɔ ndo oma lo etsha awɔ.+ Mboka yawɔ yaki mindo le mi oko womoto lo nshi yande y’ɛnɛlɔ ka dikila.+
18 Ɔnkɔnɛ, dimi lakaatshulwɛ nkɛlɛ kami l’ɔtɛ wa dikila diakawakɛdia lo wodja+ ndo l’ɔtɛ wakawetɛ wodja mindo la dikishi+ diawɔ dia nyɛtɛɛtɛ.*
19 Ɔnkɔnɛ dimi lakawadianganya l’atei wa wedja ndo lakaahandjola l’atei wa wedja.+ Dimi lakaalombosha lo ndjela mboka yawɔ ndo lo ndjela ditshelo diawɔ.
20 Koko lam’akawakome le wedja ɛsɔ, anto wakɔnyɔla lokombo lami l’ekila+ lo mbuta lo dikambo diawɔ ɔnɛ: ‘Wanɛ wekɔ anto waki Jehowa, koko vɔ wakahombe mimɔ oma lo wodja ande.’
21 Ɔnkɔnɛ dimi layoyakiyanya dikambo dia lokombo lami l’ekila lakɔnyɔla luudu la Isariyɛlɛ l’atei wa wedja wa lɛnɛ akawatshu.”+
22 “Ɔnkɔnɛ tɛ luudu la Isariyɛlɛ wate: ‘Nkum’Olongo Nkumadiɔndjɔ Jehowa kata ate: “Luudu la Isariyɛlɛ le, aha l’ɔtɛ anyu mbasalami, koko l’ɔtɛ wa lokombo lami l’ekila lakanyɔnyɔla l’atei wa wedja wa lɛnɛ akanyatshu.”’+
23 ‘Dimi mɛtɛ layokidia lokombo lami la woke+ lakɔnyɔma l’atei wa wedja, lakanyɔnyɔla l’atei awɔ; ko wedja wayohomba mbeya dia dimi kele Jehowa,’+ mbata Nkum’Olongo Nkumadiɔndjɔ Jehowa, ‘lam’ayomokidiama l’atei anyu lo washo awɔ.
24 Dimi layonyɔsa oma lo wedja ndo layonyokaloya oma lo wedja tshɛ ko layonyɔtɔla lo wodja anyu.+
25 Dimi layonyɔmɔnga ashi wa pudipudi, ko nyu nyayonga pudipudi;+ dimi layonyɛdia oma lo mindo yanyu tshɛ+ ndo oma lo dikishi dianyu tshɛ dia nyɛtɛɛtɛ.+
26 Dimi layonyosha otema w’oyoyo+ ndo layodja yimba y’oyoyo l’etei kanyu.+ Dimi layonya otema wa dive+ oma lo alemba anyu ko layonyosha otema wa emunyi.*
27 Dimi layodja nyuma kami l’etei kanyu ndo layonyɔkɛndjakɛndja lo wadjango ami+ ndo nyu nyayokitanyiya ndo nyayoyela tɛdikɔ tami ta dombo.
28 Oma laasɔ, nyu nyayodjasɛ lo wodja wakamasha watshɛnyu ndo nyu nyayonga anto ami ndo dimi layonga Nzambi kanyu.’+
29 “‘Dimi layonyoshimbɛ oma lo mindo yanyu tshɛ ndo layelɛ ntɔngɔ ndo layoyifudia, ko dimi hantela ndjala le nyu.+
30 Dimi layofudia elowa oma lo esongo ndo diangɔ di’oma lo dikambɔ diaha nyu nsowa nto pondjo la ndjala l’atei wa wedja.+
31 Ko nyu nyayohɔ mboka yanyu ya kɔlɔ ndo etsha anyu waki komonga amɛna ndo nyayoyahetsha l’ɔtɛ wa onongo anyu ndo wa ditshelo dianyu dia wɔnɔnyi.+
32 Koko nyeye dikambo nɛ: Aha l’ɔtɛ anyu mbasalami dui sɔ,’+ mbata Nkum’Olongo Nkumadiɔndjɔ Jehowa. ‘Koko nyonge la nsɔnyi ndo nyɔlɔmbɔ l’ɔtɛ wa mboka yanyu, nyu luudu la Isariyɛlɛ.’
33 “Nkum’Olongo Nkumadiɔndjɔ Jehowa kata ate: ‘Lushi layomonyɛdia oma lo onongo anyu tshɛ, dimi layosala di’anto mbidjasɛ lo esomba+ ndo dia ahole wakalana mbikama nto.+
34 Ɛtshi ka nkɛtɛ kakalana kaki tɔngɔ to le onto tshɛ laketaka laawɔ dia menda kayokambema.
35 Anto wayota vate: “Ɛtshi ka nkɛtɛ kaki tɔngɔ to kaya oko ekambɔ ka Ɛdɛna+ ndo esomba wakalana ndo waki atɔngɔ ato ndo wakanyukɔ wambodingama la mpele ndo anto wambodjasɛ lɔkɔ.”+
36 Wedja wakatshikala wakanyodinge wayohomba mbeya dia dimi Jehowa dimɛ kakake kɛnɛ kakanyukɔ ndo dimi lakonɛ kɛnɛ kaki tɔngɔ to. Dimi Jehowa dimɛ kakatɛkɛta ndo dimi lambodikotsha.’+
37 “Nkum’Olongo Nkumadiɔndjɔ Jehowa kata ate: ‘Ndo nto, dimi layetawɔ dia luudu la Isariyɛlɛ nɔmbami dia mbasalɛ dui nɛ: Dimi layofudia anto awɔ oko leemba.
38 Oko leemba l’anto w’ekila, oko leemba longa la Jɛrusalɛma* lo fɛtɛ yayɔ,+ esomba wakalanyema wayolola tɔɔ la nyemba y’anto;+ ko vɔ wayohomba mbeya dia dimi kele Jehowa.’”
Nɔtɛ ka l'ɛse ka dikatshi
^ Tshɛk., “atshikadi; wanɛ wakatshikala.”
^ Kana “la lɔsɔkɔ lo anima.”
^ Tshɛkɛta ya lo Hɛbɛru yele lanɛ mbeyaka mbɔtɔnɛ la tshɛkɛta yalembetshiya “tumi” ndo vɔ nkamba la yɔ dia mɛnya diɔnyɔ di’efula.
^ Mbuta ate otema wakɛta dia ndjela ɛlɔmbwɛlɔ kaki Nzambi.
^ Kana ondo “Oko nyemba ya ɛkɔkɔ w’olambo yonga la Jɛrusalɛma.”
