Ɛzɛkiyɛlɛ 38:1-23
38 Ɔtɛkɛta wa Jehowa wakaye le mi nto ɔnɛ:
2 “Ɔna onto, ɛdiya elungi kayɛ otsha le Ngɔngɔ ka lo wodja wa Mangɔngɔ,+ owandji waheme tshɛ wa Meshɛkɛ ndo Tubala,+ ndo ta prɔfɛsiya lo dikambo diande.+
3 Ta wate: ‘Nkum’Olongo Nkumadiɔndjɔ Jehowa kata ate: “Dimi layanga kɔlɔsha wɛ Ngɔngɔ, owandji waheme tshɛ wa Meshɛkɛ ndo Tubala.
4 Dimi layokokadimola ndo layokodja tɔdi lo manga yayɛ+ ndo layokotondja kaamɛ la asɔlayi ayɛ tshɛ,+ mfalasa ndo ambahemi wa mfalasa, vɔ tshɛ wɔlɔtshi ahɔndɔ wa lokumu, etshumanelo ka woke wele la dingawo dia weke ndo dingawo dia totshitshɛ,* vɔ tshɛ wakamba la tokuwa ta ta;
5 Pɛrɛsiya, Etiyɔpiya ndo Puta+ wekɔ kaamɛ la wɔ, vɔ tshɛ wele la engawo ka tshitshɛ ndo lofulɛ;
6 Ngɔmɛrɛ la asɔlayi ande tshɛ, luudu la Tongarama+ l’oma lo ahole woleki etale wa lo nɔrdɛ, kaamɛ la asɔlayi ande tshɛ, anto efula wele kaamɛ la yɛ.+
7 “‘“Onga suke ndo yalɔngɔsɔla, wɛ la asɔlayi ayɛ tshɛ wotshumanyi kaamɛ la yɛ, ndo wɛ ayonga kɔmanda* kawɔ.
8 “‘“Wɛ ayodjama yimba* l’ɔkɔngɔ wa nshi efula. L’etenyi k’ekomelo k’ɛnɔnyi, wɛ ayɔtwɛ wodja w’anto wakakaloyama oma l’olanyelo wa la lokuwa la ta, wosanganyi kaamɛ oma le anto efula lo akona w’Isariyɛlɛ wakatshikala edja tɔngɔ to. Anto wodjashi lo wodja ɔnɛ wakakaloyama oma le anto, ndo vɔ tshɛ mbidjasɛ lo lotui tshitshi.+
9 Wɛ ayoya dia ndjalɔsha oko lɔpɛpɛ la wolo, ndo wɛ ayokomba wodja oko wange, wɛ la asɔlayi ayɛ tshɛ ndo anto efula wele kaamɛ la yɛ.”’
10 “Nkum’Olongo Nkumadiɔndjɔ Jehowa kata ate: ‘Lushi lɔsɔ tokanyi tayokoyɛ lo otema ayɛ ndo wɛ ayosangoya dia nsala dui dia kɔlɔ.
11 Wɛ ayota wate: “Dimi layɔtwɛ wodja wele la ngelo yele bu la ekokelo.*+ Dimi layoya dia ndjɔlɔsha wanɛ wodjashi lo lotui tshitshi, wele ndooko kawafutanya, vɔ tshɛ mbidjasɛ lo ngelo yahakokame la mpele, tokengete kana asoko.”
12 Ayonga dia tɔsa diangɔ efula dia lɔhɔtɔla ndo dia dimbo, dia tɔlɔsha ahole wakalanyema wele kakianɛ anto wambodjasɛ lɛkɔ+ ndo anto wambotshumanyema nto oma lo wedja,+ wayamɔtshɛ ɔngɔnyi ndo lomombo,+ wanɛ wadjasɛ l’atei atei wa nkɛtɛ.
13 “‘Shɛba+ la Dedana,+ amundji w’okanda w’oma la Tarashishi+ ndo andɔshi awɔ wa ta* tshɛ wayokotɛ vate: “Onde wɛ ambotɔtwɛ dia ndjɔsa diangɔ efula dia lɔhɔtɔla ndo dia dimbo? Onde wɛ ambotshumanya asɔlayi ayɛ dia ndjɛmba mfɛsa la paonyi, dia ndjɔsa ɔngɔnyi la lomombo, dia ndjɔsa lokema la diangɔ dia dimbo?”’
14 “Ɔnkɔnɛ, ɔna onto, ta prɔfɛsiya ndo tɛ Ngɔngɔ wate: ‘Nkum’Olongo Nkumadiɔndjɔ Jehowa kata ate: “Lushi lɔsɔ, etena kayodjasɛ wodja ami w’Isariyɛlɛ lo lotui tshitshi, onde wɛ hateya?+
15 Wɛ ayoya oma lo dihole diayɛ, oma lo ahole woleki etale wa lo nɔrdɛ,+ wɛ la anto efula kaamɛ la yɛ, vɔ tshɛ wahemi lo mfalasa, etshumanelo ka woke, leemba la woke la asɔlayi.+
16 Oko watokombaka wange nkɛtɛ, wɛ ayoya dia ndjɔlɔsha wodja ami w’Isariyɛlɛ. Lo etena k’ekomelo ka nshi, dimi layokela dia ndjɔlɔsha wodja ami+ dia wedja mbeyami etena kayomoyakidia lo tshimbo yayɛ lo washo awɔ, wɛ Ngɔngɔ.”’+
17 “Nkum’Olongo Nkumadiɔndjɔ Jehowa kata ate: ‘Onde wɛ keema onto akɔ laamɛ lakamatɛkɛta lo dikambo diande lo nshi y’edjedja lo tshimbo y’ekambi ami, amvutshi wa lo Isariyɛlɛ wakate prɔfɛsiya lo edja k’ɛnɔnyi efula ɔnɛ wayokela dia ndjaalɔsha?’
18 “‘Lushi lɔsɔ, lushi layɔtwɛ Ngɔngɔ wodja w’Isariyɛlɛ,’ mbata Nkum’Olongo Nkumadiɔndjɔ Jehowa, ‘nkɛlɛ kami k’efula kayodɔdɔ.+
19 Lo ohetoheto ami, lo dja ya odudu ami, dimi layɔtɛkɛta; ndo lushi lɔsɔ didimu dia nkɛtɛ dia wolo diayoyala lo wodja w’Isariyɛlɛ.
20 L’ɔtɛ ami, nse ya lo ndjale, tofudu ta l’olongo, nyama ya l’okonda, dikɛndakɛnda tshɛ diayakotola la nkɛtɛ ndo anto tshɛ wele la nkɛtɛ wayodidima, akona wayokongotɔ,+ ekongo wayokongotɔnɛ, ndo oseka ehele tshɛ kayonyukɔ la nkɛtɛ.’
21 “‘Dimi layelɛ lokuwa la ta dia mbɔlɔsha lo akona ami tshɛ,’ mbata Nkum’Olongo Nkumadiɔndjɔ Jehowa. ‘Lokuwa la ta laki onto tshɛ layɔlɔsha ɔnango.+
22 Dimi layela elombwelo kami le nde* kaamɛ la elando+ ndo ɔkɛdiɛlɔ wa dikila; ndo dimi layɔlɔsha mvula ngembe ka mbɔkɔ+ ndo dja+ ndo mbɔkɔ ya dja+ le nde ndo le asɔlayi ande ndo le efula k’anto wele kaamɛ la nde.+
23 Ndo dimi mɛtɛ layoyatombola ndo layoyakidia ndo layoyaeyanya lo washo wa wedja efula; ko vɔ wayohomba mbeya dia dimi kele Jehowa.’
Nɔtɛ ka l'ɛse ka dikatshi
^ Mbala efula, amboki w’eta mbakɛmbaka dingawo dia totshitshɛ sɔ.
^ Tshɛk., “olami.”
^ Kana “ayelamɛ.”
^ Kana “wele hwe, ngelo ka lo shamba.”
^ Kana “ɛsɔngɔ wa ntambwɛ wele l’alɛfulɛfu.”
^ Kana “Dimi layɔtɔ dimɛ lo elombwelo kaamɛ la nde.”
