Ɛzɛkiyɛlɛ 39:1-29
39 “Wɛ ɔna onto, ta prɔfɛsiya lo dikambo dia Ngɔngɔ+ ndo tɛnde wate: ‘Nkum’Olongo Nkumadiɔndjɔ Jehowa kata ate: “Dimi layanga kɔlɔsha, wɛ Ngɔngɔ, owandji waheme tshɛ wa Meshɛkɛ ndo Tubala.+
2 Dimi layokokadimola, layokɔlɔmbɔla ndo layoya la yɛ oma lo ahole woleki etale wa lo nɔrdɛ+ ndo layokela lo akona wa Isariyɛlɛ.
3 Dimi layɔkɔla ota oma lo lonya layɛ la lɔmɔsɔ ndo layɔkɔsha mpito yayɛ oma lo lonya layɛ l’omi.
4 Wɛ ayɔkɔ lo akona wa Isariyɛlɛ+ wɛ la asɔlayi ayɛ ndo anto wayonga kaamɛ la yɛ. Dimi layokokimɔ oko mbo ya ndɛ le weho tshɛ wa tofudu talɛ emunyi ndo le nyama ya l’okonda.”’+
5 “‘Wɛ ayɔkɔ lo oswe wa bwe,+ nɛ dia dimi dimɛ kambɔtɛkɛta,’ mbata Nkum’Olongo Nkumadiɔndjɔ Jehowa.
6 “‘Dimi layotoma dja dia ntshumba Mangɔngɔ ndo dia ntshumba wanɛ wodjashi lo asɛnga lo lotui tshitshi,+ ko vɔ wayohomba mbeya dia dimi kele Jehowa.
7 Dimi layosala dia lokombo lami l’ekila mbeyama l’atei wa wodja ami w’Isariyɛlɛ ndo dimi hantetawɔ dia lokombo lami l’ekila mɔnyɔma nto; ko wedja wayohomba mbeya dia dimi kele Jehowa,+ l’Ekila la Isariyɛlɛ.’+
8 “‘Eelo, dui sɔ diekɔ lo ndjaye ndo diɔ diayosalema,’ mbata Nkum’Olongo Nkumadiɔndjɔ Jehowa. ‘Ɔsɔ ele lushi lakamatɛkɛta dikambo dialɔ.
9 Anto wadjasɛ lo esomba wa lo Isariyɛlɛ wayotomba ndo wayotɔnganya dja la dihomɔ dia ta: Dingawo dia totshitshɛ, dingawo dia weke, eta, mpito, tohembe ta ta ndo akɔnga. Vɔ wayokamba la diangɔ sɔ dia mpɛtsha dja+ ɛnɔnyi 7.
10 Vɔ hawotonga la ohomba wa mɛmba nkunyi oma lo ekambɔ kana mina nkunyi oma lo okonda, nɛ dia vɔ wayokamba la dihomɔ dia ta dia mpɛtsha dja.’
“‘Vɔ wayɔkɔsɔla wanɛ wakaakɔsɔla diangɔ ndo wayomba diangɔ oma le wanɛ wakambe diangɔ diawɔ,’ mbata Nkum’Olongo Nkumadiɔndjɔ Jehowa.
11 “‘Lushi lɔsɔ dimi layosha Ngɔngɔ+ diombo lɛkɔ lo Isariyɛlɛ, lo okidi wa wanɛ wɛngɔla lo ɛstɛ ka ndjale, ndo vɔ wayodiha mboka ka wanɛ weta lɛkɔ. Lɛkɔ mbayowokundɛ Ngɔngɔ nde la nyemba yande y’anto, ko vɔ wayowelɛ ɔnɛ Okidi wa Hamɔna-Ngɔngɔ.*+
12 Luudu la Isariyɛlɛ layetsha ngɔndɔ 7 dia mbakundɛ la oyango wa mbɛdia wodja.+
13 Anto tshɛ wa lo wodja wayokamba olimu wa mbakundɛ, ndo dui sɔ diayowaela lokumu lo lushi layomoyatombola,’+ mbata Nkum’Olongo Nkumadiɔndjɔ Jehowa.
14 “‘Wayosha apami ɔkɛndɛ wa mbetetaka wonya tshɛ lo wodja w’otondo ndo dia nkundɛ edo wakatshikala kalakala laadiko dia nkɛtɛ la oyango wa mbɛdia wodja. Vɔ wayotetemala nyangiayangia ngɔndɔ 7.
15 Naka wanɛ weteta lo wodja wambotana weka w’onto, vɔ wayodja djembetelo l’omamu awɔ. Oma laasɔ, wanɛ wele la ɔkɛndɛ wa nkundɛ wayoyokundɛ lo Okidi wa Hamɔna-Ngɔngɔ.+
16 Ndo lɛkɔ mbayonga nto osomba welɛwɔ Hamɔnaha.* Ko vɔ wayɛdia wodja.’+
17 “Wɛ ɔna onto, Nkum’Olongo Nkumadiɔndjɔ Jehowa kata ate: ‘Tɛ weho tshɛ wa tofudu ndo nyama tshɛ ya l’okonda wate: “Nyosangane kaamɛ ndo nyoye. Nyosangane l’otshimbedi w’otondo w’olambo ami wamomɔlɔngɔsɔla dikambo dianyu, olambo wa woke lo akona wa Isariyɛlɛ.+ Nyu nyayɔlɛ emunyi ndo nyayɔnɔ dikila.+
18 Nyu nyayɔlɛ emunyi w’anto wa wolo ndo nyayɔnɔ dikila dia ewandji wa la nkɛtɛ, ɛkɔkɔ wa waomi, ɛsɔngɔ w’ɛkɔkɔ, weombe wa mbudi ndo ngɔmbɛ ya waomi, nyama ya wata tshɛ ya la Bashana.
19 Nyu nyayokumɛ wata ndo nyayɔnɔ dikila polo ndo nyambodjɔ olambo wamomɔlɔngɔsɔla dikambo dianyu.”’
20 “‘Lo mɛsa ami, nyu nyayolota la mfalasa ndo la ambahemi wa pusupusu, akanga wa wolo ndo weho tshɛ w’andɔshi wa ta,’+ mbata Nkum’Olongo Nkumadiɔndjɔ Jehowa.
21 “‘Dimi layɛnya lotombo lami l’atei wa wedja ndo wedja tshɛ wayɛna elombwelo kamomela ndo wolo* wamomɛnya l’atei awɔ.+
22 Oma ko lushi lɔsɔ, luudu la Isariyɛlɛ layohomba mbeya dia dimi kele Jehowa Nzambi kawɔ.
23 Ndo wedja wayohomba mbeya dia luudu la Isariyɛlɛ lakatshu lo lɔhɔmbɔ l’ɔtɛ wa munga kawɔ hita, nɛ dia vɔ komonga la kɔlamelo le mi.+ Ɔnkɔnɛ dimi lakashɛ elungi kami oma le wɔ+ ndo lakaakimɔ lo anya wa atunyi awɔ,+ ko vɔ tshɛ wakadiakema la lokuwa la ta.
24 Dimi lakaasalɛ akambo lo ndjela mindo yawɔ ndo kɔlɔ yawɔ, ndo dimi lakashɛ elungi kami oma le wɔ.’
25 “Nkum’Olongo Nkumadiɔndjɔ Jehowa kata ate: ‘Dimi layokaloya mfumbe ya Jakɔbɔ+ ndo layoka luudu la Isariyɛlɛ+ l’otondo kɛtshi; ndo dimi layamɛ* lokombo lami l’ekila+ l’ohetoheto tshɛ.
26 L’ɔkɔngɔ wa vɔ mbishama nsɔnyi l’ɔtɛ wakiwɔ komonga la kɔlamelo le mi,+ vɔ wayodjasɛ lo lotui tshitshi lo wodja awɔ, ko ndooko onto layowaotsha wɔma.+
27 Etena kayomaakaloya oma lo wedja ndo kayomaatshumanya oma lo wedja w’atunyi awɔ,+ ndo dimi layoyakidia l’atei awɔ lo washo wa wedja efula.’+
28 “‘Vɔ wayohomba mbeya dia dimi kele Jehowa Nzambi kawɔ etena kayomaatoma otsha lo lɔhɔmbɔ l’atei wa wedja ko oma laasɔ mbakaloya lo wodja awɔ, aha la ntshika ndooko onto l’atei awɔ l’ɔkɔngɔ.+
29 Dimi hantowashɛ elungi kami nto,+ nɛ dia dimi layohongola nyuma kami le luudu la Isariyɛlɛ,’+ mbata Nkum’Olongo Nkumadiɔndjɔ Jehowa.”
Nɔtɛ ka l'ɛse ka dikatshi
^ Kana “Okidi wa Nyemba y’anto waki Ngɔngɔ.”
^ Kitshimudi ate: “Nyemba.”
^ Tshɛk., “lonya.”
^ Tshɛk., “layɛnya omamemelo wa la tshondo le.”
