Ɛzɛkiyɛlɛ 4:1-17
4 “Koko wɛ ɔna onto, ɔsa tafadi kele kitshadiɔ la ntondo kayɛ. Sanga osomba lɔkɔ, ɛɛ, Jɛrusalɛma.
2 Dingawɔ,+ hika ehele k’odingelo,+ diya longele l’odingelo dia mbɔlɔsha,+ ka mpango dia mbɔlɔsha ndo dingawɔ la dihomɔ dia ta dianyukola mpele.+
3 Ɔsa mpanu ka lowolo kele kitshatɔ oko ehele ka lowolo lam’asayɛ la osomba. Oma laasɔ, ɛdiya elungi kayɛ otsha le wɔ ndo vɔ wayodingama, wɛ pombaka mbodinga. Ɔsɔ ekɔ djembetelo le luudu la Isariyɛlɛ.+
4 “Oma laasɔ, wɛ pombaka mbetama lo lɛkɛ la lonya la lɔmɔsɔ ko wɛ nkitsha onongo wa luudu la Isariyɛlɛ laadiko diayɛ wɛmɛ.*+ Wɛ ayɛmba onongo awɔ l’edja ka lofulo la nshi yayoyetama lo wedi ayɛ.
5 Dimi layokodjangɛ nshi 390 yɔtɔnɛ la ɛnɔnyi wa onongo awɔ,+ ko wɛ ayɛmba onongo wa luudu la Isariyɛlɛ.
6 Wɛ pombaka ndjishidiya.
“Oma laasɔ, wɛ ayetama mbala ka 2 lo lɛkɛ la lonya layɛ l’omi, ndo wɛ ayɛmba onongo wa luudu la Juda+ l’edja ka nshi 40. Lushi 1 ɔnɔnyi 1, lushi 1 ɔnɔnyi 1 kamomokosha.
7 Wɛ ayɛdiya elungi kayɛ otsha lɛnɛ odingami Jɛrusalɛma+ la lonya layɛ laha la dihɔndɔ ndo wɛ pombaka mbuta prɔfɛsiya lo dikambo diayɔ.
8 “Eenda, dimi layokokeleka ɛkɔdi diaha wɛ nkadimɔ oma lo lɛkɛ lɔmɔtshi otsha lo lɛkɛ lokina edja ndo wɛ amboshidiya nshi ya odingamelo ayɛ.
9 “Kɔshi eponga, asami, nyanya, nkɔndɛ ya totshitshɛ, asami wa djisɔ ndo waanya ko wɛ mbidja lo mpoke 1 ko wɛ nkatɛ la wɔ mapa dikambo diayɛ. Nɛ dia l’edja ka lofulo la nshi yayoyetama lo wedi ayɛ, nshi 390, vɔ mbayoyɔlɛka.+
10 Wɛ ayɛdikaka wotsho ndo ndɛ tɔshɛkɛlɛ 20* ta mbo ya ndɛ lo lushi. Wɛ ayɔlɛka lo wenya wakashikikɛma.
11 “Ndo wɛ ayɔnɔka ashi lo yɛdikɔ, k’asamalo ɔtɔi ka hina.* Wɛ ayɔnɔka lo wenya wakashikikɛma.
12 “Wɛ ayodilɛka oko onto lalɛ mapa w’obolonga wa la shima k’asami; wɛ ayodikatɛka lo washo awɔ, lo nkamba la tumi ta onto oko nkunyi.”
13 Jehowa akate ate: “Ngasɔ mbayɔlɛ ase Isariyɛlɛ mapa awɔ wa mindo l’atei wa wedja wa lɛnɛ ayomowahandjola.”+
14 Ko dimi lakate nte: “Aha ngasɔ, Nkum’Olongo Nkumadiɔndjɔ Jehowa! Oma ko dikɛnda diami polo ndo kakianɛ, dimi* latɔtɔka mindo lo ndɛ onatshi wa nyama k’osena kana nyama kambondama oma le nyama ka ngala,+ ndo onatshi wa mindo watɔtɔka lo onyɔ ami.”+
15 Ko nde akambutɛ ate: “Kawɔ, dimi layetawɔ dia wɛ nkamba la tumi ta ngɔmbɛ lo dihole dia tumi ta onto, ndo wɛ ayokatɛ mapa ayɛ la tɔ.”
16 Oma laasɔ, nde akambutɛ ate: “Ɔna onto, eenda, dimi handjokimɔ mbo ya ndɛ* la Jɛrusalɛma,+ ndo la okiyanu w’efula mbayowɔlɛka yema ya diangɔ diawɔ lo mbɛdika lo kilɔ+ ndo la wɔma mbayowɔnɔka yema ya ashi awɔ wa lɛdika.+
17 Dui sɔ diayosalema dia lam’ayowohomba mbo ya ndɛ la ashi, vɔ kawendane watshimba wɔɔngɔ ndo kawɔndɛ l’ɔtɛ wa munga kawɔ.
Nɔtɛ ka l'ɛse ka dikatshi
^ Tshɛk., “diawɔ,” mbuta ate wedi wa lɔmɔsɔ waki Ɛzɛkiyɛlɛ.
^ Kana “anima ami.”
^ Tshɛk., “layanga mpembola tosongo tayɛ ta mapa.” Ondo mendanaka la tosongo takawatɔngɛka mapa.
