Ɛzɛkiyɛlɛ 42:1-20
42 Oma laasɔ, nde akantɔlɛ otsha lo sɛkɛ dia l’andja otsha lo nɔrdɛ.+ Ndo nde akantɔlɛ otsha lo luudu laki la luudu l’oleelo laki suke la dihole dia hwe,+ lo nɔrdɛ ka luudu lakakatanya.+
2 Otale alɔ lo ɛɔtwɛlɔ ka lo nɔrdɛ aki kubita* 100 ndo laki la woke wa kubita 50.
3 Lɔ laki lam’asa sɛkɛ dia l’etei diaki la woke wa kubita 20,+ la odihe wa sɛkɛ dia l’andja. Ekole alɔ wakɛlanɛ lam’asawɔ ndo waki l’etajɛ 3.
4 La ntondo ka mvudu y’oleelo aki ɔsɛsɛ+ ɔmɔtshi wa l’etei wa kubita 10 ndo kubita 100 l’otale* ndo mbɔtwɛlɔ yawɔ yaki lo nɔrdɛ.
5 Mvudu y’oleelo ya la diko ya lo luudu lakɔ yaki totshitshɛ ndeka nyɛ ya l’ɛse ndo ya lo etajɛ wa l’atei, nɛ dia ekole wakaleke mbɔsa ahole ayɔ.
6 Nɛ dia yaki la etajɛ 3, koko yɔ komonga la dikundji oko dikundji dia lo asɛkɛ. Diakɔ diele ɛtshi ka woke k’odihe kakɔsama oma lɔkɔ oleki l’etajɛ wa l’ɛse ndo wa l’atei.
7 Ehele ka l’ave ka l’andja kaki suke la mvudu y’oleelo otsha lo sɛkɛ dia l’andja diakɛlanɛ la mvudu nkina y’oleelo kaki la otale wa kubita 50.
8 Nɛ dia otale wa mvudu y’oleelo yaki otsha lo sɛkɛ dia l’andja aki kubita 50, koko nyɛ yakɛlanɛ la tɛmpɛlɔ k’ekila yaki kubita 100.
9 Mvudu y’oleelo yaki la ɔsɛsɛ wa mbɔtɔ lɔkɔ waki lo ɛstɛ wakakonyaka lo mvudu yakɔ oma lo sɛkɛ dia l’andja.
10 Mvudu y’oleelo yaki nto l’etei* k’ehele k’ave ka lo sɛkɛ otsha lo ɛstɛ, suke la dihole dia hwe ndo la luudu.+
11 Ɔsɛsɛ wakikɔ la ntondo kayɔ wele oko wɔnɛ waki lo mvudu y’oleelo+ ya lo lɛkɛ la nɔrdɛ. Yɔ yaki l’otale ndo woke wa woho ɔtɔi ndo yaki la asoko wa woho ɔtɔi ndo shambo ya woho ɔtɔi. Mbɔtwɛlɔ yayɔ
12 yaki oko mbɔtwɛlɔ ya lo mvudu y’oleelo yaki otsha lo sidɛ. Ɛɔtwɛlɔ kɛmɔtshi kaki l’etatelo k’ɔsɛsɛ akɔ, la ntondo ka ehele k’ave kele suke, otsha lo ɛstɛ, lɛnɛ akakokaka onto mbɔtɔ.+
13 Oma laasɔ, nde akambutɛ ate: “Mvudu y’oleelo ya lo nɔrdɛ ndo mvudu y’oleelo ya lo sidɛ yele suke la dihole dia hwe+ yekɔ mvudu y’oleelo y’ekila lɛnɛ atɔlɛka ɛlɔmbɛdi wayasukanya la Jehowa elambo woleki ekila.+ Lɛkɔ mbadjawɔ elambo woleki ekila, olambo wa ntɔngɔ, olambo wa pɛkato ndo olambo w’onongo, nɛ dia dihole diakɔ diekɔ ekila.+
14 Lam’ɔtɔ ɛlɔmbɛdi, vɔ hawohombe ntomba oma lo dihole di’ekila otsha lo sɛkɛ dia l’andja aha la takolodi ahɔndɔ wakambawɔ olimu+ la wɔ, nɛ dia vɔ wekɔ ekila. Vɔ wayɔlɔta ahɔndɔ akina dia vɔ nsukana la ahole wetawɔma dia anto ndja.”
15 Lam’akandashidiya mbɛdika dihole diele tɛmpɛlɔ ka l’etei,* nde akantɔlɛ otsha l’andja lo soko diɛlane la ɛstɛ+ ndo nde akɛdika dihole diakɔ di’otondo.
16 Nde akɛdika wedi wa lo ɛstɛ la shongo ya yɛdikɔ.* Lo ndjela shongo ya yɛdikɔ, aki otale wa tosongo 500 oma lo wedi ɔmɔtshi otsha lo wedi okina.
17 Nde akɛdika wedi wa lo nɔrdɛ ndo lo ndjela shongo ya yɛdikɔ, aki otale wa tosongo 500.
18 Nde akɛdika wedi wa lo sidɛ, lo ndjela shongo ya yɛdikɔ, aki otale wa tosongo 500.
19 Nde akatshimbe otsha lo wedi wa lo owɛstɛ. Nde akɛdika la shongo ya yɛdikɔ, tosongo 500 l’otale.
20 Nde akɛdika lo bɛkɛ diakɔ 4. Diɔ diaki la ehele lo bɛkɛ diakɔ tshɛ+ ndo tɔ kaki l’otale wa tosongo 500 ndo woke wa tosongo 500,+ dia nkakitola kɛnɛ kele ekila la kɛnɛ kele bu ekila.+
Nɔtɛ ka l'ɛse ka dikatshi
^ Lo ndjela ekadimwelo ka Grɛkɛ ka la Septante: “Otale wa kubita 100.” Efundelo wa lo Hɛbɛru mbutaka ɔnɛ: “Mboka kɛmɔtshi ka kubita 1.” Enda Ap. B14.
^ Tshɛk., “lo wekeke wa.”
^ Tshɛk., “luudu la l’etei.”
