Ɛzɛkiyɛlɛ 46:1-24
46 “Nkum’Olongo Nkumadiɔndjɔ Jehowa kata ate: ‘Soko dia sɛkɛ dia l’etei diɛlane la ɛstɛ+ pombaka ndjihamaka+ nshi 6 yakambema olimu,+ koko lushi la Sabato ndo lushi la valelo ya ngɔndɔ, diɔ pombaka ndjihɔ.
2 Owandji ayɔtɔka oma l’andja lo mboka ka soko dia tshoto y’otale+ ndo nde ayemalaka l’omamu wa ekundji ka la soko. Ɛlɔmbɛdi wayolambolaka olambo wa lotshumba w’otondo ndo olambo ande w’osanga ndo nde ayokusamaka lo ɛɔtwɛlɔ ka soko, oma laasɔ, ko nde ntomba. Koko soko hadiotodihama polo la dikɔlɔ.
3 Anto wa lo wodja vɔ lawɔ wayokusamaka la ntondo ka Jehowa lo mbɔtwɛlɔ ka soko lo nshi ya Sabato ndo lo towalelo ta ngɔndɔ.+
4 “‘Olambo wa lotshumba w’otondo wayolambola owandji le Jehowa lushi la Sabato pombaka monga ɛsɔngɔ w’ɛkɔkɔ 6 wa waomi waha la ɛkɔmɔ ndo ɔkɔkɔ 1 w’omi waha la ɛkɔmɔ.+
5 Olambo wa ntɔngɔ wayonga efa* 1 dikambo dia ɔkɔkɔ w’omi ndo kɛnɛ tshɛ kayondonga l’akoka wa nkimɔ dikambo dia ɛsɔngɔ w’ɛkɔkɔ wa waomi kaamɛ la hina* 1 k’esɔ lo efa+ tshɛ.
6 Lo lushi la valelo ya ngɔndɔ olambo wayonga wa ɔsɔngɔ 1 wa ngɔmbɛ k’omi waha la ɛkɔmɔ oma lo ngɔmbɛ, ɛsɔngɔ w’ɛkɔkɔ wa waomi 6 ndo ɔkɔkɔ w’omi 1; yɔ pombaka monga nyama yaha la ɛkɔmɔ.+
7 Nde pombaka nambola olambo wa ntɔngɔ wa efa 1 dikambo dia ɔsɔngɔ wa ngɔmbɛ k’omi, efa 1 dikambo dia ɔkɔkɔ w’omi ndo kɛnɛ tshɛ kakokande nkondja dikambo dia ɛsɔngɔ w’ɛkɔkɔ wa waomi. Ndo nde pombaka nambola hina 1 k’esɔ lo efa tshɛ.
8 “‘Etena kayɔtɔka owandji, nde pombaka mbɔtɔ oma lo mboka ka soko dia tshoto y’otale ndo nde pombaka ntomba lo mboka kakɔ kaamɛ.+
9 Etena kayɔtɔka anto wa lo wodja la ntondo ka Jehowa lo nshi ya fɛtɛ,+ wanɛ wayɔtɔka dia ntɛmɔla oma lo soko dia lo nɔrdɛ+ pombaka tombaka lo soko dia lo sidɛ+ ndo wanɛ wayɔtɔka oma lo soko dia lo sidɛ pombaka tombaka oma lo soko dia lo nɔrdɛ. Ndooko onto lahomba nkalola lo mboka ka soko diakandɔtɔ, nɛ dia vɔ pombaka ntomba lo soko diɛlane la wɔ.
10 Lo kɛnɛ kendana la owandji wele l’atei awɔ, nde pombaka mbɔtɔka etena kɔtɔwɔ ndo nde pombaka tombaka etena katombawɔ.
11 Lo nshi ya fɛtɛ ndo lo deko dia fɛtɛ, olambo wa ntɔngɔ pombaka monga wa efa 1 dikambo dia ɔsɔngɔ wa ngɔmbɛ k’omi ndo efa 1 dikambo dia ɔkɔkɔ w’omi ndo kɛnɛ tshɛ kakokande nkimɔ dikambo dia ɛsɔngɔ w’ɛkɔkɔ wa waomi kaamɛ la hina 1 k’esɔ lo efa+ tshɛ.
12 “‘Naka owandji ambokimɔ olambo wa lotshumba+ w’otondo kana elambo w’osanga oko woshasha wa la lolango le Jehowa, soko diɛlane la ɛstɛ pombaka ndjihɔma dikambo diande, ndo nde ayokimɔ olambo ande wa lotshumba w’otondo ndo elambo ande w’osanga woho wasalande lushi la Sabato.+ L’ɔkɔngɔ wa nde ntomba, soko pombaka ndjihama l’ɔkɔngɔ ande.+
13 “‘Lushi tshɛ wɛ pombaka nkimɔ ɔsɔngɔ 1 w’ɔkɔkɔ w’omi waha la ɛkɔmɔ weke lo ɔnɔnyi awɔ wa ntondo oko olambo wa lotshumba w’otondo le Jehowa.+ Wɛ pombaka salaka dui sɔ pindju la pindju.
14 Kaamɛ la wɔ, la pindju tshɛ, wɛ pombaka nkimɔ k’asamalo ɔtɔi k’efa oko olambo wa ntɔngɔ, kaamɛ la k’asato ɔtɔi ka hina k’esɔ dia mɔnga l’ofushi wa dimɛna oko olambo wa ntɔngɔ wa mbala la mbala le Jehowa. Ɔsɔ ekɔ didjango dia pondjo.
15 Vɔ pombaka nkimɔ ɔsɔngɔ w’ɔkɔkɔ w’omi, olambo wa ntɔngɔ ndo esɔ pindju la pindju oko olambo wa lotshumba w’otondo wa mbala la mbala.’
16 “Nkum’Olongo Nkumadiɔndjɔ Jehowa kata ate: ‘Naka owandji ambosha ɔnande ɔmɔtshi woshasha oko etenyi k’okitɔ, vɔ wayoyala waki anande. Ɔsɔ ekɔ ɛngɔ kakawakondja oko etenyi k’okitɔ.
17 Ko naka nde ambosha okambi ande ɔmɔtshi woshasha oma lo etenyi kande k’okitɔ, vɔ wayoyala wande polo l’ɔnɔnyi w’etshungwelo;+ ndo oma laasɔ, vɔ wayoyokalola le owandji. Paka etenyi k’okitɔ ka anande kayotshikalaka kawɔ pondjo.
18 Owandji hahombe mbɔsa etenyi k’okitɔ k’anto lo mbatshutshuya dia mbatakoyatɔ la wolo. Nde pombaka mbisha anande etenyi k’okitɔ oma lo diangɔ diande hita, diaha onto ɔmɔtshi l’atei w’anto ami takoyama ɛngɔ kande.’”
19 Oma laasɔ, nde akambɔtshiya oma lo ɛɔtwɛlɔ+ kaki l’omamu wa soko diatɔla otsha lo mvudu y’oleelo* y’ekila ya ɛlɔmbɛdi yɛlɛ otsha lo nɔrdɛ+ ndo lɛkɔ, dimi lakɛnyi dihole dimɔtshi l’otshimba otsha lo owɛstɛ.
20 Nde akambutɛ ate: “Ɔnɛ ekɔ dihole diayotukutshaka ɛlɔmbɛdi olambo w’onongo ndo olambo wa pɛkato, ndo dihole diayowokatɛka olambo wa ntɔngɔ+ diaha vɔ ntomba ndooko la ɛngɔ lo sɛkɛ dia l’andja dia tosambiya* anto+ ekila.”
21 Nde akantondja otsha lo sɛkɛ dia l’andja ndo akambetshetsha lo atshuku 4 wa sɛkɛ, ko dimi lakɛnyi sɛkɛ lo tshuku tshɛ dia sɛkɛ dia l’andja.
22 Lo atshuku 4 wa sɛkɛ, aki tɔsɛkɛsɛkɛ ta kubita* 40 lo otale ndo kubita 30 lo woke. Tɔsɛkɛsɛkɛ takɔ 4 taki popo.*
23 Ehembo* waki lo bɛkɛ tshɛ dia tɔsɛkɛsɛkɛ takɔ 4 ndo l’ɛse k’ehembo akɔ wakake ahole wa tukutshaka elambo.
24 Oma laasɔ, nde akambutɛ ate: “Ɔnɛ ekɔ mvudu yatukutsha ekambi wa lo tɛmpɛlɔ elambo wakimɔ anto.”+
Nɔtɛ ka l'ɛse ka dikatshi
^ Kana “mvudu y’ekila.”
^ Tshɛk., “nkidia.”
^ Kana “Takɔ 4 ndo atshuku atɔ waki popo.”
^ Kana “Ɛnɔngɔ.”
