Ɛzɛkiyɛlɛ 47:1-23
47 Oma laasɔ, nde akankaloya lo ɛɔtwɛlɔ ka tɛmpɛlɔ+ ndo lɛkɔ dimi lakɛnyi ashi wakɛla oma l’ɛse ka ɛɔtwɛlɔ ka tɛmpɛlɔ otsha lo ɛstɛ, nɛ dia ntondo ka tɛmpɛlɔ+ kakɛlɛ otsha lo ɛstɛ. Ashi akɔ wakakɛlaka oma l’ɛse ka lo lɛkɛ la lonya l’omi la tɛmpɛlɔ, lo sidɛ ka elambwelo.
2 Oma laasɔ, nde akantondja lo mboka ka soko+ dia lo nɔrdɛ ndo akatshu la mi l’andja ndo akatshimbe la mi otsha lo soko dia l’andja diɛlane la ɛstɛ,+ ko dimi lakɛnyi ashi wakɛla oma lo lɛkɛ la lonya l’omi.
3 Lam’akatombe pami kakɔ otsha lo ɛstɛ okime ɔkɔdi wa yɛdikɔ lo lonya+ lande, nde akɛdika kubita* kinunu (1 000) ko akambetsha lo ashi akɔ; ashi akɔ waki dingunda polo lo tɔkɔlɔngɔnyɔ.
4 Oma laasɔ, nde akɛdika kinunu (1 000) nto ko akambetsha lo ashi akɔ, ko waki dingunda polo lo adwe.
Nde akɛdika kinunu (1 000) kekina ndo akambetsha lɔkɔ, ko ashi akɔ waki dingunda polo lo lokende.
5 Lam’akandɛdika kinunu (1 000) kekina nto, vɔ waki ɔkɛdi wakimi kokoka ntehɔ, nɛ dia ashi waki dingunda efula woho wele onto pombaka nsala osale, ɔkɛdi w’ashi wahakoke onto ntehɔ l’ekolo.
6 Nde akamimbola ate: “Ɔna onto, onde wɛ akɛnyi dikambo dingo?”
Oma laasɔ, nde akankɛndjakɛndja ndo akankaloya l’omamu w’ɔkɛdi akɔ.
7 Lam’akamakalola, dimi lakɛnyi dia l’omamu wa ɔkɛdi akɔ aki esongo efula ka mamba lo wedi akɔ 2.+
8 Ko nde akambutɛ ate: “Ashi anɛ wekɔ lo nkɛla otsha lo ɛstɛ ndo vɔ wekɔ lo ntetemala polo la Araba*+ ndo vɔ toshaka ndjale. Etena kashawɔ ndjale,+ ashi wa lɛkɔ wayɔkɔnɔ.
9 Lokema la ditongami* diasɛna diayokoka nsɛna dihole tshɛ diakɛla ashi akɔ.* Lokema la nse layonga, nɛ dia ashi anɛ wayɔkɛla lɛkɔ. Ashi wa lo ndjale wayɔkɔnɔ ndo ɛngɔ tshɛ kayɔsɛna dihole tshɛ diakɛla ɔkɛdi ɔnɛ.
10 “Amundji wa nse wayemala l’omamu atɔ oma la Ɛnɛ-Ngɛdi+ polo la Ɛnɛ-Engelayima, lɛnɛ ayonga dihole dia manɛ ɛtɛyi. Lokema la weho efula wa nse layonga lɛkɔ oko nse ya lo Ndjale ka Woke.*+
11 “Tɔ kayonga la ahole wa lɔtɛkɛ ndo ahole wa laanda, ndo ahole asɔ hawotɔkɔnɔ. Vɔ wayotshikala lɛɛhɔ+ loto.
12 “Weho tshɛ w’esongo watondja mbo ya ndɛ wayotomba lo wedi akɔ 2 w’ɔkɛdi. Akatshi awɔ hawotɔlɛngɛ; ndo elowa awɔ hawotɔkɔ ɛlɔlɔki. Ngɔndɔ tshɛ vɔ wayɔtɔka elowa w’eyoyo, nɛ dia ashi awɔ wekɔ lo nkɛla oma lo tɛmpɛlɔ k’ekila.+ Elowa awɔ wayonga mbo ya ndɛ ndo akatshi awɔ dikambo dia ɛkɔnwɛlɔ.”+
13 Nkum’Olongo Nkumadiɔndjɔ Jehowa kata ate: “Ɔnɛ ele ɛtshi ka nkɛtɛ kayonyosha waoho 12 wa Isariyɛlɛ oko ɛtshi ka nkɛtɛ k’okitɔ ndo Yɔsɛfu ayonga la bɛtshi 2.+
14 Nyu nyayokikita ndo nyayolongola tema ta popo.* Dimi lakatshibe dia mbisha watshɛnyu+ wodja ɔnɛ ndo kakianɛ dimi lambonyoshawɔ* oko etenyi k’okitɔ.
15 “Ɔnɛ ele olelo wa wodja lo lɛkɛ la nɔrdɛ: Vɔ wayeta oma lo Ndjale ka Woke lo mboka k’otsha la Hɛtilɔna+ otsha la Zedada,+
16 Hamatɛ,+ Berɔta+ ndo Sibarayima kele lam’asa ɛtshi ka nkɛtɛ ka Damasɛkɛ la ɛtshi ka nkɛtɛ ka Hamatɛ, polo la Hazɛrɛ-Hatikɔna wele suke la olelo wa Haurana.+
17 Ɔnkɔnɛ olelo wayeta oma lo ndjale otsha la Hazara-Ɛnɔna+ suke la olelo wa Damasɛkɛ polo lo nɔrdɛ ndo olelo wa Hamatɛ.+ Ɔsɔ ekɔ olelo wa lo nɔrdɛ.
18 “Lɛkɛ la ɛstɛ mbetaka lam’asa Haurana la Damasɛkɛ ndo l’omamu wa Jɔrdana lam’asa Ngiliyadɛ+ la wodja wa Isariyɛlɛ. Kanyɛdike oma l’olelo polo lo ndjale* ka lo ɛstɛ. Ɔsɔ ekɔ olelo wa lo ɛstɛ.
19 Olelo wa lo sidɛ* wayonga oma lo Tamara polo lo ashi wa Miriba-Kadɛshɛ,+ polo lo Okidi w’ashi* ndo polo lo Ndjale ka Woke.+ Ɔsɔ ekɔ olelo wa lo sidɛ.*
20 “Lo lɛkɛ la owɛstɛ mbele Ndjale ka Woke, oma l’olelo polo lo dihole diɛlane la Lɛbɔ-Hamatɛ.*+ Ɔsɔ ekɔ olelo wa lo owɛstɛ.”
21 “Kanyokahane wodja ɔnɛ lam’asanyu, lam’asa waoho 12 wa Isariyɛlɛ.
22 Kanyookahane oko etenyi k’okitɔ dikambo dianyu ndo dikambo di’angɛndangɛnda wodjashi kaamɛ la nyu wele la ana etena kodjashiwɔ l’atei anyu; ndo vɔ wayonga oko ase Isariyɛlɛ wa lootɔ le nyu. Vɔ wayolongola etenyi k’okitɔ l’atei wa waoho wa Isariyɛlɛ kaamɛ la nyu.
23 Nyu pombaka mbisha ɔngɛndangɛnda etenyi k’okitɔ lo ɛtshi ka nkɛtɛ ka dioho dia lɛnɛ odjashinde,” mbata Nkum’Olongo Nkumadiɔndjɔ Jehowa.
Nɔtɛ ka l'ɛse ka dikatshi
^ Kana “laandja l’oswe.”
^ Kana “anima.”
^ Tshɛk., “ɛkɛdi akɔ 2.”
^ Mbuta ate Mediteraneya.
^ Tshɛk., “nyayokikita, onto tshɛ oko ɔnango.”
^ Tshɛk., “kambɔkɔ le nyu.”
^ Mbuta ate Ndjale Kambovɔ.
^ Tshɛk., “lɛkɛ la sidɛ l’otsha lo sidɛ.”
^ Mbuta ate Okidi w’ashi wa Edjibito.
^ Tshɛk., “lɛkɛ la sidɛ l’otsha lo sidɛ.”
^ Kana “mbɔtwɛlɔ ka Hamatɛ.”
