Ɛzɛkiyɛlɛ 48:1-35
48 “Ɔnɛ ele nkombo ya waoho, ntatɛ oma lo koma ya lo nɔrdɛ: Ɛtshi kaki Danɛ+ mbetaka l’omamu wa mboka k’otsha lo Hɛtilɔna polo la Lɛbɔ-Hamatɛ*+ polo la Hazara-Ɛnana, suke la olelo wa Damasɛkɛ lo nɔrdɛ, l’omamu wa Hamatɛ;+ ndo tɔ mbetaka oma lo ɛstɛ polo l’olelo wa lo owɛstɛ.
2 Ɛtshi kaki Ashɛrɛ+ kekɔ l’olelo wa Danɛ, oma l’olelo wa lo ɛstɛ polo l’olelo wa lo owɛstɛ.
3 Ɛtshi kaki Nafɛtali+ kekɔ l’olelo wa Ashɛrɛ, oma l’olelo wa lo ɛstɛ polo l’olelo wa lo owɛstɛ.
4 Ɛtshi kaki Manase+ kekɔ l’olelo wa Nafɛtali, oma l’olelo wa lo ɛstɛ polo l’olelo wa lo owɛstɛ.
5 Ɛtshi kaki Efrayimɛ kekɔ l’olelo wa Manase,+ oma l’olelo wa lo ɛstɛ polo l’olelo wa lo owɛstɛ.
6 Ɛtshi kaki Rubɛna kekɔ l’olelo wa Efrayimɛ,+ oma l’olelo wa lo ɛstɛ polo l’olelo wa lo owɛstɛ.
7 Ɛtshi kaki Juda kekɔ l’olelo wa Rubɛna,+ oma l’olelo wa lo ɛstɛ polo l’olelo wa lo owɛstɛ.
8 L’olelo wa Juda, oma l’olelo wa lo ɛstɛ polo l’olelo wa lo owɛstɛ, woshasha wayonyokitsha laande pombaka monga la kubita* nunu akumi ahende la tanu (25 000) lo woke+ ndo mbɔtɔnɛ la otale wa bɛtshi dia nkɛtɛ dia waoho akina oma l’olelo wa lo ɛstɛ polo l’olelo wa lo owɛstɛ. Tɛmpɛlɔ k’ekila kayonga l’atei atɔ.
9 “Woshasha wahombanyu nkitsha laande dikambo dia Jehowa wayonga la kubita nunu akumi ahende la tanu (25 000) l’otale ndo nunu dikumi (10 000) lo woke.
10 Ɔsɔ ayonga woshasha w’ekila dikambo di’ɛlɔmbɛdi.+ Vɔ wayonga la kubita nunu akumi ahende la tanu (25 000) lo nɔrdɛ, nunu dikumi (10 000) lo owɛstɛ, nunu dikumi (10 000) lo ɛstɛ ndo nunu akumi ahende la tanu (25 000) lo sidɛ. Tɛmpɛlɔ k’ekila ka Jehowa kayonga l’atei awɔ.
11 Diɔ diayonga dikambo dia ɛlɔmbɛdi wambokidiama, ana wa Zadɔka,+ wanɛ wakakotshaka ɛkɛndɛ awɔ otsha le mi ndo waki kotakɔ mboka etena kakatakɔ ase Isariyɛlɛ l’ase Lɛwi mboka.+
12 Vɔ wayonga la etenyi ka woshasha wa wodja kakitshama laande oko ɛngɔ koleki ekila, l’olelo w’ase Lɛwi.
13 “Suke la ɛtshi ka nkɛtɛ k’ɛlɔmbɛdi, ase Lɛwi wayonga la ɛtshi ka nkɛtɛ ka kubita nunu akumi ahende la tanu (25 000) l’otale ndo nunu dikumi (10 000) lo woke. (Otale atɔ w’otondo wayonga nunu akumi ahende la tanu (25 000) l’otale ndo nunu dikumi (10 000) lo woke.)
14 Vɔ hawohombe nsondja, mengɔnya kana nkaha yema mɔtshi ya lo ɛtshi ka nkɛtɛ kɛsɔ koleki dimɛna ka lo wodja, nɛ dia tɔ kekɔ ɛngɔ k’ekila le Jehowa.
15 “Dihole diatshikala diele la kubita nunu tanu (5 000) lo woke kaamɛ la kubita nunu akumi ahende la tanu (25 000) l’olelo diayonga dikambo di’okambelo w’anto tshɛ wa l’osomba,+ dia mbika mvudu ndo ndeshaka dongalonga. Osomba wayonga l’atei adiɔ.+
16 Wɛdikelo w’osomba vɔ ɔnɛ: Olelo wa lo nɔrdɛ wekɔ la kubita nunu nɛi la nkama tshanu (4 500), olelo wa lo sidɛ wekɔ la nunu nɛi la nkama tshanu (4 500), olelo wa lo ɛstɛ wekɔ la nunu nɛi la nkama tshanu (4 500) ndo olelo wa lo owɛstɛ wekɔ la nunu nɛi la nkama tshanu (4 500).
17 Dihole dia l’osomba dia ndeshaka dongalonga diayonga la kubita 250 lo nɔrdɛ, 250 lo sidɛ, 250 lo ɛstɛ ndo 250 lo owɛstɛ.
18 “Otale w’ɛtshi ka nkɛtɛ katshikala wayɔtɔnɛ la woshasha w’ekila,+ kubita nunu dikumi (10 000) lo ɛstɛ ndo nunu dikumi (10 000) lo owɛstɛ. Tɔ kayɔtɔnɛ la woshasha w’ekila, ndo diangɔ di’oma lɔkɔ diayonga mbo ya ndɛ dikambo dia wanɛ wakambɛ osomba.
19 Wanɛ wakambɛ osomba oma lo waoho tshɛ w’Isariyɛlɛ wayonɛka diangɔ lɔkɔ.+
20 “Woshasha w’otondo wekɔ la kubita nunu akumi ahende la tanu (25 000) la atshuku 4 wɛdimi. Nyu pombaka kikitsha laande oko woshasha w’ekila kaamɛ la ɛtshi ka nkɛtɛ kaki osomba.
21 “Kɛnɛ katshikala lo wedi akɔ 2 wa woshasha w’ekila ndo wa ɛtshi ka nkɛtɛ kaki osomba kayonga dikambo dia owandji.+ Tɔ kayonga l’omamu w’olelo wa kubita nunu akumi ahende la tanu (25 000) wele lo ɛstɛ ndo lo owɛstɛ wa woshasha akɔ. Tɔ kayɔtɔnɛ la bɛtshi dia nkɛtɛ diakakatanya, ndo tɔ kayonga dikambo dia owandji. Woshasha w’ekila ndo dihole di’ekila dia lo tɛmpɛlɔ diayonga l’atei atɔ.
22 “Ɛtshi ka nkɛtɛ k’ase Lɛwi ndo ɛtshi ka nkɛtɛ kaki osomba kayonga lam’asa kɛnɛ kaki owandji. Ɛtshi ka nkɛtɛ kaki owandji kayonga lam’asa olelo wa Juda+ la olelo wa Bɛnjamina.
23 “Lo kɛnɛ kendana la waoho watshikala, ɛtshi kaki Bɛnjamina kekɔ oma l’olelo wa lo ɛstɛ polo l’olelo wa lo owɛstɛ.+
24 Ɛtshi kaki Simɛyɔna kekɔ suke la olelo wa Bɛnjamina,+ oma l’olelo wa lo ɛstɛ polo l’olelo wa lo owɛstɛ.
25 Ɛtshi kaki Isakara+ kekɔ suke la olelo wa Simɛyɔna, oma l’olelo wa lo ɛstɛ polo l’olelo wa lo owɛstɛ.
26 Ɛtshi kaki Zebuluna kekɔ suke la olelo wa Isakara,+ oma l’olelo wa lo ɛstɛ polo l’olelo wa lo owɛstɛ.+
27 Ɛtshi kaki Ngada kekɔ suke l’olelo wa Zebuluna,+ oma l’olelo wa lo ɛstɛ polo l’olelo wa lo owɛstɛ.
28 Olelo wa lo sidɛ wele suke la olelo wa Ngada wayeta oma la Tamara+ otsha l’ashi wa Miriba-Kadɛshɛ,+ polo l’Okidi+ w’ashi* ndo polo lo Ndjale ka Woke.*
29 “Ɔsɔ ekɔ wodja wahombanyu nkahanya oko etenyi k’okitɔ le waoho wa Isariyɛlɛ+ ndo ɔsɔ kayonga bɛtshi diawɔ dia nkɛtɛ,”+ mbata Nkum’Olongo Nkumadiɔndjɔ Jehowa.
30 “Nganɛ mbayonga asoko w’osomba: Lɛkɛ la nɔrdɛ layonga la yɛdikɔ ya kubita nunu nɛi la nkama tshanu (4 500).+
31 “Wayɔlɛ asoko w’osomba nkombo lo ndjela waoho wa Isariyɛlɛ. Lo asoko 3 wa lo nɔrdɛ: soko 1 diekɔ dikambo dia Rubɛna, soko 1 dikambo dia Juda ndo soko 1 dikambo dia Lɛwi.
32 “Lɛkɛ la ɛstɛ layonga l’otale wa kubita nunu nɛi la nkama tshanu (4 500) ndo lekɔ la asoko 3: soko 1 dikambo dia Yɔsɛfu, soko 1 dikambo dia Bɛnjamina ndo soko 1 dikambo dia Danɛ.
33 “Lɛkɛ la sidɛ layonga la yɛdikɔ ya kubita nunu nɛi la nkama tshanu (4 500) la asoko 3: soko 1 dikambo dia Simɛyɔna, soko 1 dikambo dia Isakara ndo soko 1 dikambo dia Zebuluna.
34 “Lɛkɛ la owɛstɛ layonga l’otale wa kubita nunu nɛi la nkama tshanu (3 500) la asoko 3: soko 1 dikambo dia Ngada, soko 1 dikambo dia Ashɛrɛ ndo soko 1 dikambo dia Nafɛtali.
35 “Otshimbedi w’otondo wayonga la kubita nunu dikumi l’enanɛi (18 000). Ndo ntatɛ lushi lɔsɔ, lokombo l’osomba layonga ɔnɛ: Jehowa ekɔ lɛkɔ.”+
Nɔtɛ ka l'ɛse ka dikatshi
^ Kana “mbɔtwɛlɔ ka Hamatɛ.”
^ Mbuta ate Mediteraneya.
^ Mbuta ate Okidi w’ashi wa Edjibito.
