Ɛzɛkiyɛlɛ 5:1-17
5 “Koko wɛ, ɔna onto, ɔsa lokuwa la ta la mpɛmɔ dia wɛ nkamba la lɔ oko ɛrɛswara w’onto lanyana divo. Nya divo diayɛ ndo ndɛdu yayɛ, oma laasɔ, ɔsa kilɔ dia mbɛdika wotsho adiɔ kele kahanya divo lo elui efula.
2 Kotshumbe k’asato ɔtɔi kadiɔ lo dja l’atei wa osomba lam’ayoshila+ nshi y’odingelo awɔ. Oma laasɔ, kɔshi k’asato ɔtɔi kekina ko wɛ kikɔmɔla lokuwa la ta l’otshimbedi w’otondo w’osomba,*+ ndo k’asato ɔtɔi katshikala kokihandjole lo lɔpɛpɛ, ko dimi layɔsɔmɔla lokuwa la ta dia ditshanya.+
3 “Kɔshi nto wɛɔngi engana oma l’atei adiɔ ko wɛ mbaɔmba lo ehembo* wa dihɔndɔ diayɛ.
4 Kɔshi yema nkina nto ko wɛ ndjiokɛ lo dja ko ndjitshumba. Oma lɔkɔ dja yayolalɔ otsha lo luudu l’otondo la Isariyɛlɛ.+
5 “Nkum’Olongo Nkumadiɔndjɔ Jehowa kata ate: ‘Ɔnɛ ele Jɛrusalɛma. Dimi lakayikitsha l’atei wa wedja, wedja yidinga.
6 Koko yɔ yambɔtɔmbɔkwɛ tɛdikɔ tami ta dombo ndo wadjango ami, lo nsala akambo wa kɔlɔ efula oleki wedja ndo wedja woyidingi.+ Nɛ dia vɔ wambɔsɛka tɛdikɔ tami ta dombo ndo vɔ kɔkɛndakɛnda lo wadjango ami.’
7 “Diakɔ diata Nkum’Olongo Nkumadiɔndjɔ Jehowa ate: ‘Lam’ele nyu nyakasale kɔlɔ efula oleki wedja wonyodingi ndo nyu kɔkɛndakɛnda lo wadjango ami ndo kondjela tɛdikɔ tami ta dombo, koko nyu nyakayele tɛdikɔ ta dombo ta wedja wonyodingi,+
8 Nkum’Olongo Nkumadiɔndjɔ Jehowa kata ate: “Osomba le,+ dimi ɔnɛ lamboya dia ndjokɔlɔsha ndo dimi layela elombwelo l’atei ayɛ lo washo wa wedja.+
9 Dimi layokosalɛ kɛnɛ kemi latasalaka ndo woho wahamatosala nto l’ɔtɛ wa ditshelo+ diayɛ tshɛ dia wɔnɔnyi.
10 “‘“Ɔnkɔnɛ, ambutshi wa apami wele l’atei ayɛ wayɔlɛ anawɔ+ ndo ana wayɔlɛ washɛwɔ ndo dimi layela elombwelo l’atei ayɛ ndo layohandjola wanɛ tshɛ wayotshikala l’atei ayɛ lo bɛkɛ* tshɛ.”’+
11 “‘Ɔnkɔnɛ, lo mɛtɛ oko wemi la lɔsɛnɔ,’ mbata Nkum’Olongo Nkumadiɔndjɔ Jehowa, ‘lam’ele tɛmpɛlɔ kami k’ekila mbakayadje mindo la dikishi diayɛ tshɛ dia nyɛtɛɛtɛ ndo la ditshelo+ diayɛ tshɛ dia wɔnɔnyi, dimi lawɔ layokɔsɛka;* sso diami hadiotokooka kandji ndo dimi hantokooka kɛtshi.+
12 K’asato ɔtɔi l’atei ayɛ wayovɔ la elando* kana wayolanyema la ndjala ka kasha. K’asato ɔtɔi kekina wayodiakema laleyɛ la lokuwa la ta.+ Ndo dimi layohandjola k’asato ɔtɔi katshikala lo bɛkɛ* tshɛ ndo dimi layɔsɔmɔla lokuwa la ta dia mbatshanya.+
13 Ko nkɛlɛ kami kayokoma l’ekomelo katɔ ndo odudu wawaokami wayokitakita, ko layɔngɛnangɛna.+ Ndo vɔ wayohomba mbeya dia dimi Jehowa lakatɛkɛta lo woho wahikami dia mamemami dimɛ oto,+ etena kayomoshidiya mbahongolɛ nkɛlɛ kami.
14 “‘Dimi layoketɛ tɔngɔ to ndo ɛngɔ ka diɔnyɔ l’atei wa wedja wokodingi ndo lo washo wa onto tshɛ layetaka laawɔ.+
15 Wɛ ayonga ɛngɔ ka lɔtɛngɔ ndo ka diɔnyɔ,+ ɛnyɛlɔ kasha ɔhɛmwɛlɔ ndo ɛngɔ ka pɔngɔlɛ nsɔyi le wedja wokodingi lam’ayomela elombwelo le yɛ la nkɛlɛ ndo la odudu ndo la alanya wa wolo. Dimi Jehowa kambota dui sɔ.
16 “‘Dimi layowatomɛ mpito ya nyɔi ya ndjala ka kasha dia mbalanya. Mpito yayomotoma yayonyolanya.+ Dimi layosala dia ndjala ka kasha monga wolo le nyu ndo layotshika dia nyosha mbo ya ndɛ.*+
17 Dimi layonyotomɛ ndjala ka kasha ndo nyama ya mpango+ ya l’okonda, ko yɔ yayonyɔhɔtɔla ana. Elando ndo ɔkɛdiɛlɔ wa dikila wayofula le yɛ ndo dimi layotoma lokuwa la ta dia kɔlɔsha.+ Dimi Jehowa kambota dui sɔ.’”
Nɔtɛ ka l'ɛse ka dikatshi
^ Tshɛk., “ande.”
^ Kana “nsɔsɔ.”
^ Tshɛk., “lo mpɛpɛ.”
^ Kana “layokokitshakitsha.”
^ Kana “hemɔ.”
^ Tshɛk., “lo mpɛpɛ.”
^ Tshɛk., “layohembola tosongo tayɛ ta mapa.” Ondo mendanaka la tosongo takawatɔngɛka mapa.
