Ɛzɛkiyɛlɛ 6:1-14
6 Ɔtɛkɛta wa Jehowa wakaye le mi nto ɔnɛ:
2 “Ɔna onto, kadimola elungi kayɛ otsha lo akona wa Isariyɛlɛ kele ta prɔfɛsiya lo dikambo diawɔ.
3 Ta wate: ‘Akona wa Isariyɛlɛ le, nyohokame ɔtɛkɛta wa Nkum’Olongo Nkumadiɔndjɔ Jehowa: Nkum’Olongo Nkumadiɔndjɔ Jehowa katɛ akona, tokonakona, tɛkɔ di’ashi ndo ekidi ate: “Nyende, dimi layela lokuwa la ta le nyu dia nyɔlɔsha ndo dimi layolanya ahole anyu wa la diko.
4 Dilambwelo dianyu diayohandjɔma, dilambwelo dianyu dia tshɔ diayohembɔma+ ndo dimi layokasha edo anyu la ntondo ka dikishi dianyu dia nyɛtɛɛtɛ.*+
5 Dimi layokasha edo w’ase Isariyɛlɛ la ntondo ka dikishi diawɔ dia nyɛtɛɛtɛ ndo dimi layohandjola weka anyu lo otshimbedi w’otondo wa dilambwelo+ dianyu.
6 Lo ahole tshɛ wadjasɛnyu, esomba wayonga atɔngɔ ato+ ndo ahole wa la diko wayohandjɔma ndo wayotshikala atɔngɔ ato.+ Dilambwelo dianyu diayohandjɔma vwa, dikishi dianyu dia nyɛtɛɛtɛ diayolanyema, dilambwelo dianyu dia tshɔ diayonyukɔma ndo elimu anyu wayodimɔma.
7 Ndo wanɛ wayodiakema wayokalema l’atei anyu,+ ko nyu nyayohomba mbeya dia dimi kele Jehowa.+
8 “‘“Koko dimi layotshika atshikadi amɔtshi, nɛ dia amɔtshi l’atei anyu wayohandɔ lokuwa la ta l’atei wa wedja etena kayonyohandjɔnɛ lo wodja w’otondo.+
9 Ndo wanɛ wayohandɔ wayombohɔ l’atei wa wedja wakawandama lo lɔhɔmbɔ.+ Vɔ wayeya dia dimi lakanyange efula l’ɔtɛ wa etema awɔ wele bu la kɔlamelo* wakakadimɔ oma le mi+ ndo l’ɔtɛ waki washo awɔ la nsaki k’efula* ka dikishi diawɔ dia nyɛtɛɛtɛ.+ Vɔ wayoka nsɔnyi ndo wayohetsha akambo tshɛ wa kɔlɔ ndo wa wɔnɔnyi wambowosala.+
10 Vɔ wayohomba mbeya dia dimi kele Jehowa ndo dia woho wakamate dia mbela mpokoso kɛnɛ le wɔ komonga wotata.”’+
11 “Nkum’Olongo Nkumadiɔndjɔ Jehowa kata ate: ‘Da lokambo ndo homɛ lokolo layɛ ndo lela l’ɔtɛ wa akambo tshɛ wa kɔlɔ ndo wa wɔnɔnyi wasalema lo luudu la Isariyɛlɛ, nɛ dia vɔ wayodiakema la lokuwa la ta, la ndjala ka kasha ndo la elando.+
12 Ɔnɛ lele etale ayovɔ la olando, ɔnɛ lele suke ayodiakema la lokuwa la ta ndo ɔnɛ tshɛ layohandɔ awui asɔ ndo layotshikala ayovɔ la ndjala ka kasha; dimi layotshola nkɛlɛ kami tshɛ le wɔ.+
13 Ko nyayohomba mbeya dia dimi kele Jehowa,+ lam’ayokalema edo awɔ l’atei wa dikishi diawɔ dia nyɛtɛɛtɛ, l’otshimbedi w’otondo wa dilambwelo diawɔ,+ lo kionakona tshɛ y’otale, lo tɔsɔdi tshɛ ta akona, l’ɛse ka osongo tshɛ wele la akatshi efula ndo l’ɛse ka ntahe ya esongo wa weke lɛnɛ akawalambolaka elambo* dia ngɛnyangɛnya dikishi diawɔ dia nyɛtɛɛtɛ.+
14 Dimi layosembola lonya lami dia mbalɔsha ndo dia mbetɛ wodja tɔngɔ to, ndo ahole tshɛ wadjasɛwɔ wayonga tɔngɔ to oleki oswe wa shɛnga wele suke la Dibila. Ndo vɔ wayohomba mbeya dia dimi kele Jehowa.’”
Nɔtɛ ka l'ɛse ka dikatshi
^ Tshɛkɛta ya lo Hɛbɛru yele lanɛ mbeyaka mbɔtɔnɛ la tshɛkɛta yalembetshiya “tumi” ndo vɔ nkamba la yɔ dia mɛnya diɔnyɔ di’efula.
^ Kana “l’ɔtɛ wayelawɔ lo yoho ya mindo.”
^ Kana “wa mindo; kinumba.”
^ Kana “epumu wa dimɛna.”
