Ɛzɛkiyɛlɛ 7:1-27
7 Ɔtɛkɛta wa Jehowa wakaye le mi nto ɔnɛ:
2 “Wɛ ɔna onto, Nkum’Olongo Nkumadiɔndjɔ Jehowa katɛ wodja wa Isariyɛlɛ ate: ‘Ekomelo, ekomelo kamboya le atshuku 4 wa wodja.
3 Ekomelo kamboya kakianɛ le yɛ ndo dimi layanga ntshulola nkɛlɛ kami le yɛ ndo dimi layokolombosha lo ndjela mboka yayɛ ndo layokoya la yɛ l’ɔtɛ wa etsha ayɛ tshɛ wa wɔnɔnyi.
4 Sso diami hadiotokooka kandji; ndo dimi hantokooka kɛtshi,+ nɛ dia dimi layokela etombelo w’oma lo mboka yayɛ hita, ndo wɛ ayodiɛnɛ la etombelo wa kɔlɔ w’oma lo etsha+ ayɛ wa wɔnɔnyi. Ko nyayohomba mbeya dia dimi kele Jehowa.’+
5 “Nkum’Olongo Nkumadiɔndjɔ Jehowa kata ate: ‘Eenda, mpokoso, mpokoso ka laande kekɔ lo ndjaye.+
6 Ekomelo koyaye; ekomelo kayanga ndja; tɔ kayonɛɛ tɔamɛ* oya le yɛ. Eenda, tɔ koyaye.
7 Etena* kayɛ kambokoka, wɛ ladjasɛ lo wodja. Etena kayanga nkoka, lushi laya suke.+ Okandokando koko aha ekoko w’ɔngɛnɔngɛnɔ mbele lo akona.
8 “‘Keema edja dimi layanga mbitshola odudu ami le yɛ,+ ndo dimi layanga mpongola nkɛlɛ kami tshɛ le yɛ+ ndo dimi layanga kolombosha lo ndjela mboka yayɛ ndo layanga mbikoya la yɛ l’ɔtɛ wa etsha ayɛ tshɛ wa wɔnɔnyi.
9 Sso diami hadiotokooka kandji; ndo dimi hantokooka kɛtshi.+ Dimi layokela etombelo w’oma lo mboka yayɛ ndo wɛ ayodiɛnɛ la etombelo wa kɔlɔ w’oma lo etsha ayɛ wa wɔnɔnyi. Ko nyayohomba mbeya dia dimi Jehowa kanyɔkɔmɔla.+
10 “‘Eenda lushi! Eenda, lɔ loyaye!+ Etena kayɛ* kambokoka; danga diambotondja alɛmbɔlɛmbɔ ndo otako wambɔmɔnga.
11 Awui wa ngala wambodɛ lo danga dia awui wa kɔlɔ.+ Oyadi vɔ kana ɛngɔnyi awɔ kana nyemba yawɔ kana lokumu lawɔ, ndooko layohanda.
12 Etena kayokoka, lushi layoya. Osombi atɔngɛnangɛnake ndo osondjishi atolelake, nɛ dia nkɛlɛ kamboyɛ leemba lawɔ l’otondo.*+
13 Nɛ dia osondjishi hatokalola lo kɛnɛ kakasombama, oyadi kaanga lɔsɛnɔ lande lambokokamɛ, nɛ dia ɛnɛlɔ kekɔ dikambo dia leemba l’otondo. Ndooko onto layokalola, ndo l’ɔtɛ wa munga kande,* ndooko onto layoshimbɛ lɔsɛnɔ lande.
14 “‘Vɔ wakade dimama,+ ndo onto tshɛ akayalɔngɔsɔla, koko ndooko onto latshɔ lo ta, nɛ dia nkɛlɛ kami kekɔ le leemba l’otondo.+
15 Lokuwa la ta lekɔ l’andja+ ndo elando la ndjala ka kasha kekɔ l’etei. Onto tshɛ lele lo ekambɔ ayovɔ la lokuwa la ta, ndo ndjala ka kasha la elando wayodiaka wanɛ wele lo osomba.+
16 Ehandɔ awɔ wanɛ wayanga dia ndawɔ wayotshɔ otsha lo akona, ndo oko benga dia lo ekidi, onto l’onto ayokuma akumu l’ɔtɛ wa munga+ kande.
17 Anya awɔ tshɛ wayɔla yɔɔ ndo adwe awɔ tshɛ wayololanɛ la ashi.*+
18 Vɔ wakalɔtɛ akoto,+ ndo wakandama* la wodudu. Onto tshɛ ayoshama nsɔnyi ndo ɔtɛ tshɛ ayonyɛma hiɔlɔ.*+
19 “‘Vɔ wayokasha mfɛsa yawɔ lo toshinga ndo paonyi yawɔ yayonga ɛngɔ ka kɔlɔ efula le wɔ. Oyadi mfɛsa yawɔ kana paonyi yawɔ ndooko ɛngɔ kayokoka mbashimbɛ lo lushi la nkɛlɛ ka Jehowa.+ Vɔ* hawotolota ndo akundju awɔ hawotolola, nɛ dia yɔ* yayonga otamba wa ntakanya wele kiɔkɔ ya munga yawɔ.
20 Vɔ wakayala la otako lo olangala wa dɛngalɛnga diawɔ ndo vɔ wakakambe la diɔ* dia nsala mpingu yawɔ ya wɔnɔnyi, dikishi diawɔ dia nyɛtɛɛtɛ.+ Diakɔ diayomoyietɛ ɛngɔ ka kɔlɔ efula le wɔ.
21 Dimi layoyikimɔ* lo anya wa angɛndangɛnda dia vɔ mimba ndo le akanga wa kɔlɔ wa la nkɛtɛ dia vɔ ndjiɔsa ndo vɔ wayoyiɔnyɔla.
22 “‘Dimi layonya elungi kami oma le wɔ,+ ndo vɔ wayɔnyɔla dihole diami dioshɛmi,* ko wevi wayɔtɔ lɔkɔ ndo wayodiɔnyɔla.+
23 “‘Sala mɔlɔla,*+ nɛ dia wodja wambolola tɔɔ la kilombo+ kakasana la dikila ndo osomba wambolola tɔɔ la awui wa ngala.+
24 Dimi layela wedja woleki kɔlɔ,+ ko vɔ wayɔsa mvudu yawɔ+ ndo dimi layokomiya otako wa akanga wa wolo, ndo ahole awɔ w’ekila wayɔnyɔma.+
25 Lam’ayoya shɔkɔ yawɔ, vɔ wayoyanga ki, koko tɔ hatonga.+
26 Mpokoso yayahatana laadiko dia mpokoso ndo losango laadiko dia losango, ndo anto wayoyanga ɛnɛlɔ oma le omvutshi,+ koko ɛlɛmbɛ* wayoshishɔ oma le ɔlɔmbɛdi ndo dako oma le dikumanyi.+
27 Nkumekanga ayotshɔ atalele+ ndo owandji ayɔlɔtshama la oshishelo wa elongamelo,* ndo anya wa anto wa lo wodja wayosaka lokomba la wɔma. Dimi layowasalɛ akambo lo ndjela mboka yawɔ ndo dimi layowalombosha oko wakawalomboshaka. Ko vɔ wayohomba mbeya dia dimi kele Jehowa.’”+
Nɔtɛ ka l'ɛse ka dikatshi
^ Tshɛk., “kayetɔ.”
^ Kana ondo “ekata k’alɛmbɔlɛmbɔ.”
^ Kana ondo “ekata k’alɛmbɔlɛmbɔ.”
^ Mbuta ate oyadi wanɛ wasomba ɛtshi ka nkɛtɛ kana wanɛ wakisondja ndooko layokondja wahɔ, nɛ dia elanyelo kayowakomɛ vɔ tshɛ.
^ Kana ondo “oma lo munga kawɔ.”
^ Mbuta ate oma lo woho wayokusɔ anto wanyi la wɔma.
^ Mbuta ate ɛtɛ awɔ wayonyama divo lo otanda.
^ Tshɛk., “wakakombama.”
^ Kana “Anima awɔ.”
^ Mbuta ate mfɛsa yawɔ la paonyi yawɔ.
^ Mbuta ate diangɔ dia paonyi la mfɛsa.
^ Mbuta ate mfɛsa yawɔ la paonyi yawɔ yakambema dia nsala dikishi.
^ Ondo mendanaka la etenyi koleki l’etei ka lo tɛmpɛlɔ k’ekila ka Jehowa.
^ Mbuta ate mɔlɔla wa lɔhɔmbɔ.
^ Kana “wetshelo.”
^ Kana “elanyelo.”
