Ɛzɛkiyɛlɛ 9:1-11
9 Oma laasɔ, nde akawelɛ lo atoyi ami la dui dia wolo ate: “Nyele wanɛ wayela dilanya lo osomba, onto la onto la ehomɔ kande ka ta ka ndanya lo lonya lande!”
2 Dimi lakɛnyi apami asamalo wayaye oma lo lɛkɛ la soko dia la diko+ diɛlane la nɔrdɛ, onto la onto okime ehomɔ kande ka ta ka ntɛtshatɛtsha lo lonya lande; ndo pami kɛmɔtshi kaki kaamɛ la wɔ akalɔtɛ dihɔndɔ dia linɛnɛ, la ɔlɔndɔ w’ashi wa mukanda wa sekeletɛlɛ lo lokende lande. Vɔ wakɔtɔ ko wakemala l’omamu wa elambwelo ka nkonga.+
3 Oma laasɔ, lotombo la Nzambi ka Isariyɛlɛ+ lakonɛɛ oma lɛnɛ akilɔ laadiko dia akɛruba ndo lakasɛkɔ otsha lo mbɔtwɛlɔ ka soko dia luudu,+ ko nde akatatɛ mbelɛ pami kakalɔtɛ dihɔndɔ dia linɛnɛ, ɔnɛ laki la ɔlɔndɔ w’ashi wa mukanda lo lokende lande.
4 Jehowa akawotɛ ate: “Eteta lo osomba w’otondo, lo Jɛrusalɛma kele odje djembetelo lo ekoko w’anto wakiyana ndo wakuma akumu+ l’ɔtɛ wa akambo tshɛ wa wɔnɔnyi wasalema lo osomba.”+
5 Nde akatɛ akina lo atoyi ami ate: “Nyetete lo osomba l’ɔkɔngɔ ande kele nyotodiake. Tanyetawɔke dia sso dianyu mbaoka kandji ndo tanyowaokake kɛtshi.+
6 Nyotodiake esombe, ɛlɔngɔ w’apami, esekaseka wa dimuma, ana wa akɛnda ndo wamato tshɛ tshɛ.+ Koko tanyosukanake la onto tshɛ lele la djembetelo.+ Nyotate oma lo tɛmpɛlɔ+ kami k’ekila.” Ko vɔ wakatatɛ la dikumanyi diaki la ntondo ka luudu+ lakɔ.
7 Ko nde akawatɛ ate: “Nyodje luudu mindo ndo nyolodia asɛkɛ la edo.+ Nyotshu!” Ko vɔ wakatombe ndo wakadiake anto wa lo osomba.
8 Etena kakawadiakaka, dimi lakatshikala dimɛ, ko lakayakɔsha ekukumadi ndo lakade ekoko nte: “Hayii, Nkum’Olongo Nkumadiɔndjɔ Jehowa! Onde wɛ ayanga ndanya atshikadi tshɛ wa Isariyɛlɛ etena katsholayɛ nkɛlɛ kayɛ le Jɛrusalɛma?”+
9 Ko nde akambutɛ ate: “Munga ka luudu la Isariyɛlɛ la Juda kekɔ woke woke efula.+ Wodja wambolola tɔɔ la ɔkɛdiɛlɔ wa dikila,+ ndo osomba wambolola tɔɔ la awui wa kɔlɔ.+ Nɛ dia vɔ mbutaka vate: ‘Jehowa ambomɔka oma lo wodja ndo Jehowa hɛnyi.’+
10 Oko le mi, sso diami hadiotowaoka kandji; ndo dimi hantowaoka kɛtshi.+ Dimi layowaela etombelo wa kɔlɔ w’oma lo mboka kawɔ lo ɛtɛ awɔ hita.”
11 Oma laasɔ, dimi lakɛnyi pami kakalɔtɛ dihɔndɔ dia linɛnɛ la ɔlɔndɔ w’ashi wa mukanda lo lokende lande akaloya dui ate: “Dimi lambosala paka oko wakayambidjangɛ.”
