1 Ɛkɔndɔ 10:1-14
-
Nyɔi ka Saolo nde l’anande w’apami (1-14)
10 L’etena kɛsɔ, ase Filistiya wakalɔka l’ase Isariyɛlɛ. Ko apami w’ase Isariyɛlɛ wakalawɔ oma la ntondo k’ase Filistiya ndo efula wakadiakema lo Dikona dia Ngiliboa.+
2 Ase Filistiya wakatetemala mbidja Saolo nde l’anande lo shasa, ko ase Filistiya wakadiake ana waki Saolo anɛ: Jɔnatana, Abinadaba ndo Malaki-Shua.+
3 Ta diaki wolo le Saolo ndo amboki wa eta wakawɛnyi, ko amboki wa eta akɔ wakoohomuya wolo.+
4 Ko Saolo akatɛ ɔmɛmbi ande wa dihomɔ dia ta ate: “Sɔmɔla lokuwa layɛ la ta kele ombikelɔ, diaha apami waki kominya mpota ango ndjoya ko ndjonsalɛ akambo la esehe tshɛ.”*+ Koko ɔmɛmbi ande wa dihomɔ dia ta konanga, nɛ dia nde akoke wɔma efula. Ko Saolo akɔshi lokuwa la ta ndo akayakɔsha lɔkɔ.+
5 Lam’akɛnyi ɔmɛmbi ande wa dihomɔ dia ta dia Saolo ambovɔ, nde lawɔ akayakɔsha lo lokuwa lande la ta, ko akavu.
6 Ɔnkɔnɛ Saolo, anande w’apami 3 ndo ase luudu lande tshɛ wakavu kaamɛ.+
7 Lam’akɛnyi ase Isariyɛlɛ tshɛ waki lo okidi* dia anto tshɛ wambolawɔ ndo Saolo nde l’anande w’apami wambovɔ, vɔ wakatatɛ ntshika esomba awɔ ko wakalawɔ. Ko ase Filistiya wakaye ko wakadjasɛ lɔkɔ.
8 La wedi a pindju, lam’akaye ase Filistiya dia ndjɔsa diangɔ dia wanɛ wakavu, vɔ wakatane odo wa Saolo ndo w’anande w’apami wokalemi lo Dikona dia Ngiliboa.+
9 Ko vɔ wakoohembola ɔtɛ ndo wakɔshi dihomɔ diande dia ta, ko wakatome dui lo ɛtshi ka nkɛtɛ k’otondo k’ase Filistiya dia tohandjola lokumu le dikishi diawɔ+ ndo le anto awɔ.
10 Oma laasɔ, vɔ wakadje dihomɔ diande dia ta lo luudu* la jambizambi yawɔ ndo wakahanɛ lowako lande lo luudu la Dangɔna.+
11 Lam’akoke ase Jabɛshɛ+ wa la Ngiliyadɛ kɛnɛ tshɛ kakasalɛ ase Filistiya Saolo,+
12 andɔshi wa ta tshɛ wakonɛɛ, ko wakatɛmba odo wa Saolo la edo w’anande w’apami. Vɔ wakaye la wɔ la Jabɛshɛ ndo wakakundɛ weka awɔ l’ɛse k’osongo wa woke wa la Jabɛshɛ,+ ko wakakile mbo ya ndɛ l’edja ka nshi 7.
13 Ɔnkɔnɛ, Saolo akavu l’ɔtɛ wakinde kɔmɛnya kɔlamelo yande le Jehowa, nɛ dia nde kokitanyiya ɔtɛkɛta wa Jehowa,+ ndo l’ɔtɛ wakandatosala diendja le ɔnɛ latɛkɛtsha dimu+
14 lo dihole dia mimbola Jehowa kanyi. Ko Nde akoodiake ndo akakimɔ lowandji le Davidɛ ɔna Jɛse.+