1 Ɛkɔndɔ 12:1-40
-
Asukedi wa lowandji laki Davidɛ (1-40)
12 Apami anɛ mbakaye le Davidɛ la Zikilangɛ+ etena kakinde kokoka mbeteta woho walangande l’ɔtɛ wa Saolo+ ɔna Kisha, ndo vɔ waki l’atei w’andɔshi wa ta wa wolo wakoosukɛ lo ta.+
2 Vɔ waki la eta ndo wakakokaka nkamba la lonya l’omi ndo la lɔmɔsɔ+ dia mboka ave+ kana tshieta mpito la ota. Vɔ waki l’atei w’anango Saolo, aseka Bɛnjamina.+
3 Ahiyɛzɛrɛ kaki owandji, kaamɛ la Jɔashi, vɔ akɔ 2 ana w’apami wa Shema ose Ngibɛa;+ Jeziyɛlɛ nde la Pɛlɛtɛ ana w’apami wa Azɛmavɛta,+ Beraka, Jehu ose Anatɔta,
4 Ishimaya ose Ngibiyɔna,+ ɔndɔshi wa ta wa wolo l’atei w’andɔshi wa ta wa wolo 30+ ndo owandji w’andɔshi wa ta wa wolo 30; kaamɛ ndo Jɛrɛmiya, Jahaziyɛlɛ, Johanana, Jɔzabada ose Ngedɛra,
5 Eluzai, Jerimɔtɛ, Baaliya, Shemariya, Shefatiya ose Harifu,
6 Elekana, Ishiya, Azarɛlɛ, Jɔɛzɛrɛ ndo Jashobeama, aseka Kɔra;+
7 ndo Jɔɛla nde la Zebadiya ana w’apami wa Jɛrɔhama ya la Ngɛdɔrɛ.
8 Aseka Ngada amɔtshi wakete lo wedi wa Davidɛ lo longele la l’oswe.+ Vɔ waki andɔshi wa ta wa wolo, asɔlayi waketshama ta, waki suke dia mɛmba dingawo dia weke ndo akɔnga, wele dungi diawɔ diaki oko dungi dia ntambwɛ ndo wakalawɔka efula oko mboloko ya l’akona.
9 Ezɛrɛ kaki owandji, wa 2 Obadiya, wa 3 Eliyabɛ,
10 wa 4 Mishimana, wa 5 Jɛrɛmiya,
11 wa 6 Atai, wa 7 Eliyɛlɛ,
12 wa 8 Johanana, wa 9 Elizabada,
13 wa 10 Jɛrɛmiya, wa 11 Makibanai.
14 Wasɔ mbaki aseka Ngada,+ ewandji w’asɔlayi. Ɔnɛ lakaleke tshitshɛ mbɛdima la 100, ndo ɔnɛ lakaleke woke mbɛdima la kinunu (1 000).+
15 Wasɔ mbele apami wakatehɔ Jɔrdana lo ngɔndɔ ka ntondo etena kakayambɔmbɔka wedi akɔ 2, ndo vɔ wakatshanya wanɛ wakadjasɛka lo bɛtshi dia nkɛtɛ dia l’ɛse otsha lo ɛstɛ ndo lo owɛstɛ.
16 Apami amɔtshi w’aseka Bɛnjamina ndo w’aseka Juda wakaye vɔ la wɔ le Davidɛ lo longele lande.+
17 Ko Davidɛ akatshu la ntondo kawɔ ndo akawatɛ ate: “Naka la wɔladi kambonyoya le mi dia ndjonkimanyiya, kete otema ami wayonga kaamɛ la nyu. Ko naka dia ndjomfunga le andɔshi ami etena kele dimi hansadi ndooko kɔlɔ, Nzambi ka watshɛso eende dikambo sɔ ndo asambole.”+
18 Oma laasɔ, nyuma kakaye le* Amasai+ laki owandji w’andɔshi wa ta wa wolo 30, ko nde akate ate:
“Davidɛ le, sho tekɔ anto ayɛ, Ɔna Jɛse+ le, tekɔ kaamɛ la yɛ,
Wɔladi, wɔladi wayale la yɛ, ndo wɔladi le ɔnɛ lakokimanyiya,Nɛ dia Nzambi kayɛ ekɔ lo kokimanyiya.”+
Ɔnkɔnɛ, Davidɛ akaalongola ndo akaasɔnɛ dia vɔ monga l’atei w’ewandji w’asɔlayi ande.
19 Aseka Manase amɔtshi vɔ lawɔ wakete lo wedi wa Davidɛ etena kakandaye la ase Filistiya dia ndjɔlɔsha Saolo; koko nde kokimanyiya ase Filistiya, nɛ dia l’ɔkɔngɔ wa vɔ nkɛtshanya, nkumi y’ase Filistiya+ wakookaloya, wata vate: “Nde ayoyeta lo wedi wa Saolo nkumɛnde, ko nsɛnɔ yaso yayonga lo waale.”+
20 Etena kakandatshu la Zikilangɛ,+ aseka Manase anɛ wakete lo wedi ande: Adɛna, Jɔzabada, Jɛdiyaɛlɛ, Mikayɛlɛ, Jɔzabada, Elihu ndo Zilɛtai, ewandji wa nunu di’aseka Manase.+
21 Vɔ wakakimanyiya Davidɛ dia ndɔsha olui wa dengalenga, nɛ dia vɔ tshɛ waki apami wa wolo, waki la dihonga+ ndo wakayonga ewandji w’asɔlayi.
22 Lushi la lushi, anto wakatetemalaka ndja le Davidɛ+ dia ndjookimanyiya polo ndo mpango ndjokoma woke oko mpango ka Nzambi.+
23 Ɔnɛ kele lofulo l’ewandji wa wanɛ waki la dihomɔ dia ta wakaye le Davidɛ la Hɛbɛrɔna+ dia ndjonya lowandji oma le Saolo ko mboshalɔ lo ndjela didjango dia Jehowa.+
24 Apami w’aseka Juda wakɛmbaka dingawo dia weke ndo akɔnga kaamɛ la dihomɔ dia ta waki nunu samalo la nkama enanɛi (6 800).
25 Oma le aseka Simɛyɔna, apami wa wolo ndo wa dihonga waki asɔlayi nunu esambele la lokama (7 100).
26 Oma le ase Lɛwi nunu nɛi la nkama shamalo (4 600).
27 Jɛhɔyada+ kaki ɔnɔmbɔdi w’ana w’apami wa Arɔna,+ ndo apami nunu sato la nkama esambele (3 700) waki kaamɛ la nde,
28 kaamɛ ndo Zadɔka,+ ɔlɔngɔ a pami wa wolo ndo wa dihonga, mbidja ndo ewandji 22 w’oma lo luudu la shɛwɔ.
29 Oma le aseka Bɛnjamina anango Saolo,+ anto nunu sato (3 000) wele efula ka l’atei awɔ wakalamaka diangɔ dia lo luudu la Saolo ntondo.
30 Oma le aseka Efrayimɛ, apami nunu akumi ahende la nkama enanɛi (20 800) wa wolo, wa dihonga ndo wa lokumu w’oma lo mvudu ya washɛwɔ.
31 Oma le k’ahende ɔtɔi ka dioho dia Manase, anto nunu dikumi l’enanɛi (18 000) wakasɔnama lo ndjela nkombo yawɔ dia tetɛ Davidɛ nkumekanga.
32 Oma le dioho dia Isakara wanɛ wakashihodia tena ndo wakeyaka kɛnɛ kakahombe Isariyɛlɛ nsala, waki apami 200 l’atei w’ewandji awɔ, ndo vɔ mbakalɔmbɔlaka anangɛwɔ tshɛ.
33 Oma le aseka Zebuluna, apami nunu akumi atanu (50 000) wakakokaka nkamba olimu w’ɔsɔlayi, wanɛ wakalɔngamaka dia ndɔ ta la weho tshɛ wa dihomɔ dia ta, vɔ tshɛ wakete lo wedi waki Davidɛ la kɔlamelo ya tshɛ lo tshɛ.*
34 Oma le aseka Nafɛtali, ewandji kinunu (1 000) ndo vɔ waki kaamɛ l’anto nunu akumi asato l’esambele (37 000) waki la dingawo dia weke ndo l’akɔnga.
35 Oma le aseka Danɛ, wanɛ wakalɔngama dia ndɔ ta waki nunu akumi ahende l’enanɛi la nkama shamalo (28 600).
36 Ndo oma le aseka Ashɛrɛ, wanɛ wakakokaka nkamba olimu w’ɔsɔlayi lo nɔngama dia ndɔ ta waki nunu akumi anɛi (40 000).
37 Oma lo wedi wa Jɔrdana,+ oma le aseka Rubɛna, aseka Ngada ndo k’ahende ɔtɔi ka dioho dia Manase waki asɔlayi nunu lokama l’akumi ahende (120 000) waki kaamɛ la weho tshɛ wa dihomɔ dia ta.
38 Apami asɔ tshɛ w’andɔshi wa ta wakasangana kaamɛ dia ndɔ ta. Vɔ wakaye la Hɛbɛrɔna la otema ɔtɔi dia ndjetɛ Davidɛ nkumekanga k’Isariyɛlɛ w’otondo, ndo ase Isariyɛlɛ akina tshɛ wakasangana kaamɛ walanga* mbetɛ Davidɛ nkumekanga.+
39 Ko vɔ wakatshikala lɛkɔ kaamɛ la Davidɛ nshi 3, walɛ ndo wanɔ nɛ dia anangɛwɔ wakaalɔngɔsɔlɛ akambo tshɛ.
40 Ndo nto, wanɛ waki suke la wɔ ndo kaanga wanɛ waki etale oko aseka Isakara, Zebuluna ndo Nafɛtali wakelaka mbo ya ndɛ lo mponda, lo kamɛlɔ, lo mfalo ndo lo ngɔmbɛ, ndo wakelaka diangɔ nɛ: Ofushi, ekate wa fingo ka lamula ndo elowa wa vinyɔ, wanu, esɔ kaamɛ ndo ngɔmbɛ la ɛkɔkɔ efula ka mamba, nɛ dia ɔngɛnɔngɛnɔ wakikɔ lo Isariyɛlɛ.
Nɔtɛ ka l'ɛse ka dikatshi
^ Tshɛk., “kakalɔtɛ.”
^ Kana “wanɛ tshɛ wakete lo wedi waki Davidɛ komonga la etema ehende.”
^ Tshɛk., “waki otema ɔtɔi.”
