1 Ɛkɔndɔ 13:1-14
13 Davidɛ akasawola l’ewandji w’anto nunu nunu ndo ewandji w’anto nkama nkama kaamɛ la ɛnɔmbɔdi tshɛ.+
2 Oma laasɔ, Davidɛ akatɛ etshumanelo k’otondo k’Isariyɛlɛ ate: “Naka ekɔ dimɛna le nyu ndo naka Jehowa Nzambi kaso mbetawɔka, nyɛsɔ totome dui le atshikadi w’anangɛso wele lo bɛtshi dia nkɛtɛ tshɛ dia l’Isariyɛlɛ ndo le ɛlɔmbɛdi la ase Lɛwi lo esomba awɔ+ wele la ahole wa ndeshaka dongalonga dia vɔ ndja le so.
3 Ndo nyɛsɔ tokaloya Ɔshɛtɛ+ wa Nzambi kaso.” Dikambo vɔ kombidjama yimba lo nshi ya Saolo.+
4 Etshumanelo k’otondo waketawɔ nsala dui sɔ, nɛ dia diɔ diaki dimɛna le anto tshɛ.
5 Ɔnkɔnɛ Davidɛ akatshumanya ase Isariyɛlɛ tshɛ, oma l’ɔkɛdi* w’Edjibito polo la Lɛbɔ-Hamatɛ*+ dia tɔsa Ɔshɛtɛ wa Nzambi ka mɛtɛ oma la Kiriatɛ-Jarima.+
6 Davidɛ nde l’ase Isariyɛlɛ tshɛ wakadɛ otsha la Baalaha,+ la Kiriatɛ-Jarima k’aseka Juda dia toya la Ɔshɛtɛ wa Jehowa Nzambi ka mɛtɛ, ɔnɛ lodjashi lo kiti ka lowandji laadiko* dia akɛruba,+ lɛnɛ elɛwɔ* lokombo lande.
7 Koko vɔ wakahɛ Ɔshɛtɛ wa Nzambi ka mɛtɛ lo pusupusu k’oyoyo,+ dia mbɛɛmba oma lo luudu la Abinadaba, ko Uza ndo Ahiyo wakayalɔmbɔlaka pusupusu kakɔ.+
8 Davidɛ nde l’ase Isariyɛlɛ tshɛ wakayangɛnangɛnaka la ntondo ka Nzambi ka mɛtɛ la wolo awɔ tshɛ, wayembe esambo, wayahome nsɛsɛ, dihomahoma dikina di’eshinga, ngɔmɔ,+ nsɛmbalɛ+ ndo amama.+
9 Koko lam’akawakome lo dihole di’esuswelo dia Kidɔna, Uza akasembola lonya lande, ko akakimɛ Ɔshɛtɛ nɛ dia ngɔmbɛ yaki suke la mbɔkɔsha.
10 Ko nkɛlɛ ka Jehowa kadɔdɔ kakaye le Uza ndo Nde akɔɔkɔmɔla, nɛ dia nde akasembola lonya dia nkimɛ Ɔshɛtɛ,+ ko nde akavu laawɔ la ntondo ka Nzambi.+
11 Koko Davidɛ akomala,* nɛ dia nkɛlɛ ka Jehowa kakatshulɔ le Uza ndo dihole sɔ mbelamɛka ɔnɛ Pɛrɛzɛ-Uza* polo ndo ɛlɔ.
12 Ɔnkɔnɛ, Davidɛ akoke Nzambi ka mɛtɛ wɔma efula lushi lɔsɔ, ko akate ate: “Ngande wayomokoka mbela Ɔshɛtɛ wa Nzambi ka mɛtɛ le mi?”+
13 Davidɛ konanga ntɔla Ɔshɛtɛ akɔ lɛnɛ akinde l’Osomba wa Davidɛ, koko nde akɔɔtɔlɛ otsha lo luudu laki Ɔbɛdɛ-Ɛdɔmɛ ose Ngiti.
14 Ɔshɛtɛ wa Nzambi ka mɛtɛ waki kaamɛ l’ase luudu laki Ɔbɛdɛ-Ɛdɔmɛ, wakatshikala lo luudu lande l’edja ka ngɔndɔ 3, ndo Jehowa akatshɔkɔlaka ase luudu laki Ɔbɛdɛ-Ɛdɔmɛ ndo kɛnɛ tshɛ kaki la nde.+
Nɔtɛ ka l'ɛse ka dikatshi
^ Kana “oma la Shihɔrɛ.”
^ Kana “mbɔtwɛlɔ ka Hamatɛ.”
^ Kana “atɛndɛwɔ.”
^ Kana ondo “lam’asa.”
^ Kana “akatshimbe wɔɔngɔ.”
^ Kitshimudi ate: “Ntondɔ le Uza.”
