1 Ɛkɔndɔ 17:1-27
17 Kam’akadjasɛ Davidɛ lo luudu* lande hita, nde akatɛ omvutshi Natana+ ate: “Dimi ɔnɛ adjasɛ lo luudu lakakama la esongo w’elondo,+ koko ɔshɛtɛ wa sheke wa Jehowa wekɔ l’ɛse k’ahɔndɔ w’apɛma.”+
2 Natana akakadimola Davidɛ ate: “Sala kɛnɛ tshɛ kele l’otema ayɛ, nɛ dia Nzambi ka mɛtɛ ekɔ kaamɛ la yɛ.”
3 L’otsho akɔ waamɛ, ɔtɛkɛta wa Nzambi wakaye le Natana ndjowotɛ ɔnɛ:
4 “Tshɔka tote okambi ami Davidɛ wate: ‘Jehowa kata ate: “Aha wɛ kayombikɛ luudu la dimi mbidjasɛ.+
5 Nɛ dia dimi kombidjasɛ lo luudu oma ko lushi lakamatondja ase Isariyɛlɛ polo ndo ɛlɔ, koko lekɔ lo tasɛkɔsɛkɔ lo luudu la dipɛma la luudu la dipɛma, lo tabɛrnaklɛ kɛmɔtshi otsha lo kekina.*+
6 L’edja tshɛ kakamatatshɔka kaamɛ l’ase Isariyɛlɛ tshɛ, onde lambotɛka shushi mɔtshi ya l’Isariyɛlɛ yakamasɔnɛ dia namaka wodja ami nte: ‘Lande na kakinyu kombikɛmi luudu la l’esongo w’elondo?’”’
7 “Ɔnkɔnɛ, tote okambi ami Davidɛ wate: ‘Jehowa kanga lolembelembe kata ate: “Dimi lakakɔshi oma lɛnɛ akayaleshaka dongalonga, oma lɛnɛ akayatayelanaka la ɛkɔkɔ dia wɛ monga ɔnɔmbɔdi wa wodja ami Isariyɛlɛ.+
8 Dimi layonga kaamɛ la yɛ lɛnɛ tshɛ ayoyotshɔ+ ndo dimi layonya* atunyi ayɛ tshɛ oma la ntondo kayɛ.+ Dimi layetɛ lokombo layɛ woke oko lokombo l’anto wa weke wa la nkɛtɛ.+
9 Dimi layɔsɔna dihole dikambo dia wodja ami Isariyɛlɛ, ko layowadjashiya ndo vɔ wayodjasɛ lɛkɔ, ko ndooko onto layowafutanya nto. Anto wa kɔlɔ hawotowahɛnyahɛnya* nto oko wakawasalaka lo nshi yakete,+
10 oma ko lushi lakamasɔnɛ toshushi dia nɔmbɔla wodja ami Isariyɛlɛ.+ Dimi layosala di’atunyi ayɛ tshɛ monga l’ɛse kayɛ.+ Ndo nto, lambokotɛ nte: ‘Jehowa ayokokɛ luudu.’*
11 “‘“Lam’ayokomɛ nshi yayɛ ko wɛ amboyela watshɛyɛ, dimi layotondja ɔnayɛ* l’ɔkɔngɔ ayɛ, ɔnayɛ ɔmɔtshi la pami,+ ko dimi layoshikikadia lowandji lande nge.+
12 Nde kayoyombikɛ luudu+ ndo dimi layoshikikadia kiti kande ka lowandji pondjo pondjo.+
13 Dimi layonga she ndo nde ayonga ɔnami.+ Dimi hantonya ngandji kami ka kɔlamelo oma le nde+ woho wakamakinya oma le ɔnɛ laki la ntondo kayɛ.+
14 Dimi layosala dia nde ntshikala lo luudu lami ndo lo lowandji lami pondjo,+ ndo kiti kande ka lowandji kayotshikalaka pondjo pondjo.”’”+
15 Natana akatɛ Davidɛ awui asɔ tshɛ ndo ɛnɛlɔ kɛsɔ k’otondo.
16 Ko nkumekanga Davidɛ akɔtɔ, akadjasɛ la ntondo ka Jehowa ko akate ate: “Jehowa Nzambi le, dimi eemi? Ndo luudu lami eelɔ dia wɛ salɛmi akambo anɛ tshɛ?+
17 Laadiko dia laasɔ, Nzambi le, wɛ ambɔtɛkɛta ndo dikambo dia luudu l’okambi ayɛ polo lo nshi yayaye yeke etale efula,+ ndo wɛ ambombidja yimba oko dimi lekɔ onto lahomba ndeka mbidiyama,* wɛ Jehowa Nzambi.
18 Okambi ayɛ Davidɛ akokande kotɛ nto lo kɛnɛmɔ kamboyombisha lam’ele wɛ mbeyaka okambi ayɛ dimɛna?+
19 Jehowa le, wɛ ambosala akambo wa weke anɛ tshɛ lo mbishola woke woke ayɛ lo dikambo di’okambi ayɛ, lo ndjela kɛnɛ kalanga otema ayɛ.*+
20 Jehowa le, ndooko lele oko wɛ+ ndo ndooko Nzambi kekina paka wɛ.+ Kɛnɛ tshɛ kambotooka l’atoyi aso shikikɛka dui sɔ.
21 Naa wodja okina wele la nkɛtɛ wele oko wodja ayɛ Isariyɛlɛ?+ Nzambi ka mɛtɛ akatshu ko akataatshungola oko wodja ande.+ Wɛ akayatongɛ lokombo oma lo akambo wa weke ndo wa diambo+ efula wakayasale lo mbitshanya wedja oma la ntondo ka wodja ayɛ+ wakayatshungola oma l’Edjibito.
22 Wɛ akasale dia wodja ayɛ Isariyɛlɛ monga wodja ayɛ hita pondjo pondjo.+ Jehowa le, wɛ aya Nzambi kawɔ.+
23 Jehowa le, wonya ɔnɛ, sala dia daka diamboyolaka lo dikambo di’okambi ayɛ ndo luudu lande mongaka la kɔlamelo lo tena tshɛ ndo osale paka oko wamboyolaka.+
24 Lokombo layɛ latshikalake pondjo* ndo latombɔmake+ pondjo pondjo, kele anto kawote vate: ‘Jehowa kanga lolembelembe Nzambi k’Isariyɛlɛ ekɔ Nzambi le Isariyɛlɛ,’ ndo luudu l’okambi ayɛ Davidɛ lashikimale nge la ntondo kayɛ.+
25 Nɛ dia wɛ Nzambi kami, wɛ ambosholɛ okambi ayɛ sangwelo diayɛ dia mbokɛ luudu.* Diakɔ diambokosalɛ okambi ayɛ dɔmbɛlɔ nɛ la eshikikelo tshɛ.
26 Jehowa le, wɛ ekɔ Nzambi ka mɛtɛ ndo wɛ ambolaka akambo w’ɛlɔlɔ asɔ lo dikambo di’okambi ayɛ.
27 Ɔnkɔnɛ, ɔngɛnɛngɛnɛ dia ntshɔkɔla luudu l’okambi ayɛ ndo lɔ latetemale monga pondjo pondjo la ntondo kayɛ, nɛ dia Jehowa le, wɛ kambɔtshɔkɔla, ndo lɔ lambɔtshɔkwama pondjo pondjo.”
Nɔtɛ ka l'ɛse ka dikatshi
^ Kana “luudu l’owandji.”
^ Ondo kitshimudi ate: “Oma lo dihole dimɔtshi diele luudu la dipɛma otsha lo dihole dikina ndo oma lo dihole dimɔtshi di’edjaselo otsha lo dikina.”
^ Tshɛk., “layodiaka.”
^ Tshɛk., “hatowahekoya.”
^ Kana “lowandji la l’ɔlɔndji wa nkumbo.”
^ Tshɛk., “lɔtɔngɔ.”
^ Kana “onto la lokumu.”
^ Kana “lo yoho yɔtɔnɛ la lolango layɛ.”
^ Kana “longake kɔlamelo.”
^ Kana “lowandji la l’ɔlɔndji wa nkumbo.”
