1 Ɛkɔndɔ 19:1-19
19 L’ɔkɔngɔ diko, Nahashi nkumekanga k’ase Amɔna akavu, ko ɔnande akayala nkumekanga lo dihole diande.+
2 Ko Davidɛ akate ate: “Dimi layɛnya Hanuna ɔna Nahashi ngandji ka kɔlamelo,+ nɛ dia she akamɛnya ngandji ka kɔlamelo.” Ɔnkɔnɛ, Davidɛ akatome akɛndji dia toosamba l’ɔtɛ wa nyɔi ka she. Koko lam’akakome ekambi wa Davidɛ l’ɛtshi ka nkɛtɛ k’ase Amɔna+ dia tosamba Hanuna,
3 ewandji w’ase Amɔna wakatɛ Hanuna vate: “Onde wɛ fɔnyaka dia Davidɛ ekɔ lo mbisha shɔ nɛmɔ lo woho wamondokotomɛ anto dia ndjokosamba? Shi dia ndjokenda ko kolanya ndo dia ndjokemba wodja mbamboya ekambi ande le yɛ?”
4 Ɔnkɔnɛ, Hanuna akɔshi ekambi wa Davidɛ ko akawanya ndɛdu+ ndo akahembola ahɔndɔ awɔ lo 2 lo asɔkɔ, ko akaakimɔ.
5 Lam’akawayotɛ Davidɛ dikambo di’apami akɔ, mbala kakɔ ɔtɔi nde akatome anto akina dia tohomana la wɔ, nɛ dia wakasha apami akɔ nsɔnyi lo yɛdikɔ y’efula. Nkumekanga akawatɛ ate: “Nyotshikale la Jeriko+ polo lam’ayodɔ ndɛdu yanyu, ko nyu ndjokalola.”
6 Oma laasɔ, ase Amɔna wakɛnyi dia waya nyama nsolo le Davidɛ; ɔnkɔnɛ Hanuna nde l’ase Amɔna wakatome talata* kinunu (1 000) ya mfɛsa dia tofutɛ pusupusu ndo ambahemi wa mfalasa oma la Mezɔpɔtamiya,* Arama-Maaka ndo Zoba.+
7 Ɔnkɔnɛ, vɔ wakatofutɛ pusupusu nunu akumi asato la pende (32 000) kaamɛ la nkumekanga ka Maaka nde l’anto ande. Oma laasɔ, vɔ wakaye ko wakayoka mpango kawɔ la ntondo ka Mɛdɛba.+ Ase Amɔna wakatshumana lo esomba awɔ ndo wakatombe dia ndjɔlɔ ta.
8 Lam’akoke Davidɛ dui sɔ, nde akatome Jɔaba+ l’asɔlayi tshɛ, mbidja ndo andɔshi ande wa ta woleki wolo.+
9 Ko ase Amɔna wakatombe ndo wakalɔngama dia ndɔ ta la soko di’osomba etena kele nkumi ya dikanga yakaye wakatshikala vɔamɛ l’oswe.
10 Lam’akɛnyi Jɔaba dia wayanga mbɔlɔsha oma la ntondo ndo oma l’ɔkɔngɔ, nde akasɔnɛ elui ɛmɔtshi w’asɔlayi woleki diewo lo Isariyɛlɛ, ko akaalɔngɛ dia ndɔsha ase Suriya.+
11 Nde akatshike apami akina tshɛ lo ɛlɔmbwɛlɔ* kaki Abishai+ ɔnango dia nde mbalɔnga dia vɔ ndɔsha ase Amɔna.
12 Ko nde akate ate: “Naka ase Suriya+ wambondeka wolo, ko wɛ ndja ndjombitsha; ko naka ase Amɔna wambokoleka wolo, dimi layoyokotsha.
13 Sho pombaka nkeketala ndo monga la dihonga+ dikambo dia wodja aso ndo di’esomba wa Nzambi kaso, ko Jehowa ayosala kɛnɛ kele ɔlɔlɔ lo washo ande.”
14 Oma laasɔ, Jɔaba nde l’apami waki kaamɛ la nde wakasukana dia mpomana l’ase Suriya lo ta, ko vɔ wakalawɔ oma la ntondo kande.+
15 Lam’akɛnyi ase Amɔna dia ase Suriya wambolawɔ, vɔ lawɔ wakalawɔ Abishai w’ɔnango, ko wakɔtɔ l’osomba. L’ɔkɔngɔ wa laasɔ, Jɔaba akaye la Jɛrusalɛma.
16 Lam’akɛnyi ase Suriya dia ase Isariyɛlɛ wambaalɛndja, vɔ wakatome akɛndji dia totshumanya ase Suriya lo ɛtshi ka nkɛtɛ kele suke la Ɔkɛdi,*+ kaamɛ ndo Shofaka owandji w’asɔlayi wa Hadadɛzɛrɛ lakayawalɔmbɔlaka.+
17 Lam’akawayotɛ Davidɛ, mbala kakɔ ɔtɔi nde akasanganya ase Isariyɛlɛ tshɛ, ko wakatehɔ Jɔrdana, wakakome le wɔ ndo wakalɔngama dia mbalɔsha. Davidɛ akalɔngɛ andɔshi ande wa ta dia ndɔsha ase Suriya, ko vɔ wakɔɔlɔsha.+
18 Koko ase Suriya wakalawɔ ase Isariyɛlɛ ndo Davidɛ akadiake anto nunu esambele (7 000) wakɛndjakɛndja pusupusu ndo asɔlayi w’ase Suriya nunu akumi anɛi (40 000) wakɛndakɛnda l’ekolo, ndo nde akadiake Shofaka laki owandji w’asɔlayi.
19 Lam’akɛnyi ekambi wa Hadadɛzɛrɛ dia ase Isariyɛlɛ+ wambaalɛndja, aha la ntshimbatshimba, vɔ wakadje wɔladi vɔ la Davidɛ ko wakayala l’ɛse kande.+ Ase Suriya konanga nkimanyiya ase Amɔna nto.