1 Ɛkɔndɔ 22:1-19
22 Ko Davidɛ akate ate: “Ɔnɛ ekɔ luudu la Jehowa Nzambi ka mɛtɛ ndo ɔnɛ ekɔ elambwelo k’ase Isariyɛlɛ+ nambolaka olambo wa lotshumba.
2 Oma laasɔ, Davidɛ akate dia vɔ nsanganya angɛndangɛnda+ waki lo wodja w’Isariyɛlɛ ndo nde akawasha ɔkɛndɛ wa mbataka ave ndo kɔlɔngaka ave wa mbika luudu la Nzambi ka mɛtɛ.+
3 Ndo nto, Davidɛ akalɔngɔsɔla mbolo efula ka mamba dia nsala nsɛti dikambo dia nkuke ya l’asoko ndo dikambo dia diangɔ diakakatanya, ndo lokema la nkonga laheyama mbɛdika,+
4 kaamɛ ndo abaya w’olondo+ lo yɛdikɔ yaheyama mbadia, nɛ dia ase Sidɔna+ ndo ase Tura+ wakelaka Davidɛ lokema l’abaya w’olondo.
5 Ko Davidɛ akate ate: “Ɔnami Sɔlɔmɔna eke dikɛnda ndo atahokɔ akambo,*+ ko luudu lahomba mbikɛ Jehowa pombaka monga dimɛna dia mamba,+ dia lokumu ndo dimɛna+ dialɔ mbeyama lo wedja tshɛ.+ Ɔnkɔnɛ, dimi layowɔlɔngɔsɔlɛ diangɔ.” Ko Davidɛ akalɔngɔsɔla diangɔ efula ka mamba la ntondo ka nde mvɔ.
6 Ndo nto, nde akelɛ ɔnande Sɔlɔmɔna, ko akawetsha woho wa mbikɛ Jehowa Nzambi k’Isariyɛlɛ luudu.
7 Davidɛ akatɛ ɔnande Sɔlɔmɔna ate: “Dimi lo wedi ami, lakakombolaka lo otema dia mbika luudu dikambo dia lokombo la Jehowa Nzambi kami.+
8 Koko ɔtɛkɛta wa Jehowa wakaye le mi ndjombutɛ ɔnɛ: ‘Wɛ ambɔkɛdia dikila efula ndo wɛ ambɔlɔsha ata wa wolo. Wɛ hatoka luudu dikambo dia lokombo lami,+ nɛ dia wɛ ambɔkɛdia dikila efula la nkɛtɛ la ntondo kami.
9 Eenda, wɛ ayota ɔna+ layonga pami ka wɔladi,* ndo dimi layowosha momuya oma le atunyi ande tshɛ woodingi,+ nɛ dia Sɔlɔmɔna*+ kayonga lokombo lande ndo dimi layosha Isariyɛlɛ wɔladi la lotui tshitshi lo nshi yande.+
10 Nde kayoka luudu dikambo dia lokombo lami.+ Nde ayonga ɔnami ndo dimi layonga she.+ Dimi layoshikikadia kiti kande ka lowandji nge lo Isariyɛlɛ pondjo pondjo.’+
11 “Ɔnkɔnɛ ɔnami le, Jehowa ayale la yɛ, otondoya ndo oke luudu la Jehowa Nzambi kayɛ oko wakandate lo dikambo diayɛ.+
12 Dikambo ɔtɔi ele, Jehowa akosha shɛnɔdi ndo yimba+ lam’ayondokosha lowandji la mbolɛ Isariyɛlɛ, dia wɛ nama ɛlɛmbɛ wa Jehowa Nzambi kayɛ.+
13 Ko wɛ ayotondoya naka wɛ ndjela dimɛna wadjango+ ndo dombwelo diakadjangɛ Jehowa Mɔsɛ dia mbisha Isariyɛlɛ.+ Onga la dihonga ndo keketala. Tokake wɔma ndo tatɛke asolo.+
14 Dimi lambɛna paa efula dia nɔngɔsɔla diangɔ nɛ dikambo dia luudu la Jehowa: Talata* nunu lokama (100 000) ya paonyi ndo talata miliyɔ ɔtɔi (1 000 000) ya mfɛsa kaamɛ, nkonga ndo mbolo+ efula ka mamba woho waheyama mbɛdika, ndo dimi lambɔlɔngɔsɔla abaya la ave,+ koko wɛ koyokotsha diangɔ dikina.
15 Ekambi efula wekɔ kaamɛ la yɛ, mbuta ate ambatshi w’ave, waa masɔ yahika l’ave,+ etshudi w’abaya ndo ekambi wele la weho tshɛ wa diewo.+
16 Paonyi, mfɛsa, nkonga ndo mbolo heyama mbɛdika.+ Emala kele tatɛ olimu ndo Jehowa ayale kaamɛ la yɛ.”+
17 Oma laasɔ, Davidɛ akadjangɛ ewandji tshɛ wa l’Isariyɛlɛ dia nkimanyiya ɔnande Sɔlɔmɔna ate:
18 “Shi Jehowa Nzambi kanyu ekɔ kaamɛ la nyu ndo ambonyosha momuya lo wedi akɔ tshɛ? Nɛ dia nde akakimɔ wanɛ wakadjasɛka lo wodja lo anya anyu, ndo wodja akɔ wambɔlɛndjama la ntondo ka Jehowa ndo la ntondo k’ekambi ande.
19 Kakianɛ, nyoyashikikɛ la etema anyu tshɛ ndo la anima* anyu tshɛ dia nyanga Jehowa Nzambi kanyu,+ ndo nyotate mbika tɛmpɛlɔ k’ekila ka Jehowa Nzambi ka mɛtɛ,+ dia mbela ɔshɛtɛ wa sheke wa Jehowa ndo diangɔ di’ekila dia Nzambi ka mɛtɛ+ lo luudu lohikami dikambo dia lokombo la Jehowa.+
Nɔtɛ ka l'ɛse ka dikatshi
^ Kana “atatshunde.”
^ Tshɛk., “momuya.”
^ Oma lo tshɛkɛta ya lo Hɛbɛru yalembetshiya “Wɔladi.”
^ Enda Elembetshielo.
