1 Ɛkɔndɔ 5:1-26
5 Rubɛna+ ɔna Isariyɛlɛ l’enondo aki l’ana w’apami. Nde kaki enondo, koko lam’ele nde akadje mbeto ka she mindo,*+ wakasha ana wa Yɔsɛfu+ ɔna Isariyɛlɛ lotshungɔ lande l’ɔna enondo; ɔnkɔnɛ nde kofundjama lokombo la lotshungɔ l’ɔna enondo lo ndjela ɔlɔndji.
2 Kaanga mbele Juda+ akaleke anango ndo oma le nde kakatombe ɔnɛ lakahombe monga ɔnɔmbɔdi,+ Yɔsɛfu kele la lotshungɔ l’ɔna enondo.
3 Ana w’apami wa Rubɛna ɔna Isariyɛlɛ l’enondo vɔ anɛ: Hanɔka, Palu, Hɛzɛrɔna ndo Karami.+
4 Ana w’apami wa Jɔɛlɛ vɔ anɛ: Shemaya ɔnande, Ngɔngɔ ɔnande, Shimei ɔnande,
5 Mika ɔnande, Reaya ɔnande, Baala ɔnande,
6 ndo Bɛrahɛ ɔnande, ɔnɛ lele Tilingatɛ-Pilinɛsɛrɛ+ nkumekanga k’Asuriya akɔɔtɔlɛ lo lɔhɔmbɔ. Nde aki owandji w’aseka Rubɛna.
7 Anango lo ndjela nkumbo yawɔ, lo ndjela ofundjelo wa nkombo lo ɛlɔndji awɔ ndo lo ndjela tokanula tawɔ vɔ anɛ: Oko owandji, Jeyɛlɛ, Zɛkariya,
8 ndo Bɛla ɔna Azazɛ ɔna Shɛma ɔna Jɔɛlɛ lakadjasɛka la Aroɛrɛ+ polo ndo la Nɛbɔ ndo la Baala-Meɔna.+
9 Lo ɛstɛ, nde akadjasɛka polo l’etatelo k’oswe wele suke la Ɔkɛdi w’Efaratɛ,+ nɛ dia dongalonga diawɔ diakafulanɛ lo ɛtshi ka nkɛtɛ ka Ngiliyadɛ.+
10 Lo nshi ya Saolo, vɔ wakalɔsha ase Hangirɛ wanɛ wakalɛndjama la ntondo kawɔ, ko vɔ wakadjasɛ lo mvudu yawɔ y’apɛma lo ɛtshi ka nkɛtɛ k’otondo lo ɛstɛ ka Ngiliyadɛ.
11 Tokanula ta Ngada wakadjasɛka suke la wɔ lo ɛtshi ka nkɛtɛ ka Bashana polo la Salɛka.+
12 Jɔɛlɛ aki owandji, oma laasɔ ko Shafama, ko Janai ndo Shafata lo Bashana.
13 Anangɛwɔ w’ase mvudu ya washɛwɔ vɔ anɛ: Mikayɛlɛ, Meshulama, Shɛba, Jɔrai, Jakanɛ, Zia ndo Ebɛrɛ, tshɛ tshɛ 7.
14 Wasɔ mbele ana w’apami wa Abihayilɛ ɔna Huri ɔna Jarɔa ɔna Ngiliyadɛ ɔna Mikayɛlɛ ɔna Jɛshishai ɔna Jahado ɔna Buza.
15 Ahi ɔna Abidiyɛlɛ ɔna Nguni kaki ɔtɛ wa nkumbo ka shɛwɔ.
16 Vɔ wakadjasɛka la Ngiliyadɛ,+ la Bashana,+ lo tosombasomba tendɛ le wɔ* ndo lo bɛtshi dia nkɛtɛ tshɛ dia la Sharɔna dia ndeshaka dongalonga polo lɛnɛ akomɛdiɔ.
17 Vɔ tshɛ wakafundjama nkombo lo ndjela ɔlɔndji awɔ lo nshi ya Jɔtama+ nkumekanga ka Juda ndo lo nshi ya Jɛrɔbɔama*+ nkumekanga k’Isariyɛlɛ.
18 Aseka Rubɛna, aseka Ngada ndo k’ahende ɔtɔi ka dioho dia Manase waki la andɔshi wa ta wa wolo nunu akumi anɛi la nɛi la nkama esambele l’akumi asamalo (44 760) l’atei w’asɔlayi awɔ wakatɛmbaka dingawo la tokuwa ta ta ndo waki la eta,* ndo vɔ wakalowanyema lo ta.
19 Vɔ wakalɔsha ase Hangirɛ,+ Jɛturɛ, Nafishi+ ndo Nɔdaba.
20 Vɔ wakakimanyiyama dia mbalɔsha, ko ase Hangirɛ la wanɛ tshɛ waki kaamɛ la wɔ wakakimɔma lo anya awɔ, nɛ dia vɔ wakalɔmbɛ Nzambi dia mbakimanyiya lo ta, ko nde akakadimola lo dɔmbɛlɔ diawɔ dikambo vɔ wakayaɛkɛ le nde.+
21 Vɔ wakɔshi dongalonga diawɔ, mbuta ate kamɛlɔ nunu akumi atanu (50 000), ɛkɔkɔ nunu nkama hiende l’akumi atanu (250 000) ndo mponda nunu pende (2 000), kaamɛ ndo anto* nunu lokama (100 000).
22 Efula wakadiakema, nɛ dia Nzambi+ ka mɛtɛ kakalɔshaka ta. Vɔ wakadjasɛ lo dihole diawɔ polo lam’akawayaatɔla lo lɔhɔmbɔ.+
23 Tokanula ta k’ahende ɔtɔi ka dioho dia Manase+ wakadjasɛka lo ɛtshi ka nkɛtɛ k’oma la Bashana polo la Baala-Hɛrɛmɔna ndo Senirɛ ndo Dikona dia Hɛrɛmɔna.+ Vɔ waki efula.
24 Ɛtɛ wa nkumbo ya washɛwɔ vɔ ɛnɛ: Efɛrɛ, Ishi, Eliyɛlɛ, Aziriyɛlɛ, Jɛrɛmiya, Hɔdavia ndo Jahadiyɛlɛ. Vɔ waki andɔshi wa ta wa wolo, apami wa lokumu ndo ɛtɛ wa nkumbo ya washɛwɔ.
25 Koko vɔ wakashisha kɔlamelo otsha le Nzambi ka watshɛwɔ ndo wakasale kinumba* la tozambizambi t’ase wodja akɔ,+ wanɛ wele Nzambi akaashile oshiki la ntondo kawɔ.
26 Ɔnkɔnɛ Nzambi k’Isariyɛlɛ akasɛngiya yimba ya Pulu nkumekanga k’Asuriya,+ (mbuta ate Tilingatɛ-Pilinɛsɛrɛ+ nkumekanga k’Asuriya) ko nde akatɔlɛ aseka Rubɛna, aseka Ngada ndo k’ahende ɔtɔi ka dioho dia Manase lo lɔhɔmbɔ, ndo nde akaatɔlɛ otsha la Hala, Habɔra, Hara ndo lo ɔkɛdi wa Ngɔzana+ lɛnɛ eewɔ polo ndo ɛlɔ.
Nɔtɛ ka l'ɛse ka dikatshi
^ Kana “akɔnyɔla.”
^ Kana “tosukanyi la wɔ.”
^ Mbuta ate Jɛrɔbɔama ya II.
^ Tshɛk., “ndo wakanɛka ota.”
^ Kana “anima w’anto.”
^ Ɛtɛkɛta wa didjidji wɛnya ɔtɛmwɛlɔ wa dikishi dia tozambizambi t’ase wedja ekina.
