1 Kɔrɛtɔ 1:1-31
1 Dimi Pɔɔlɔ, lakelamɛ lo lolango la Nzambi dia monga ɔpɔstɔlɔ+ wa Kristo Yeso, lekɔ kaamɛ la ɔnangɛso Sostɛnɛ ndo
2 lambonyofundɛ nyu ase etshumanelo ka Nzambi kele la Kɔrɛtɔ,+ nyu wanɛ wakakidiama kaamɛ la Kristo Yeso,+ wanɛ wakelamɛ dia monga ekilami, kaamɛ l’anto tshɛ wa l’ahole tshɛ welɛ* lokombo la Nkumɛso Yeso Kristo+ lele Nkumɛwɔ ndo Nkumɛso nte:
3 Ɔlɔlɔ waheyama mbɛdika ndo wɔladi w’oma le Nzambi Shɛso ndo w’oma le Nkumadiɔndjɔ Yeso Kristo wayale la nyu!
4 Nshi tshɛ dimi mbishaka Nzambi kami losaka lo dikambo dianyu l’ɔtɛ wa ɔlɔlɔ waheyama mbɛdika waki Nzambi wakandanyosalɛ oma le Kristo Yeso,
5 nɛ dia lo akambo tshɛ, nyu nyakangɔnɛ le nde, lo akoka tshɛ wa ntɛkɛta ndo lo ewo tshɛ,+
6 oko wele esambishelo kendana la Kristo+ kamboshikimala l’atei anyu,
7 lo yɛdikɔ yele ndooko losha lahombanyu, etena kakongɛnyu l’asolo walomɔlomɔ woshwelo wa Nkumɛso Yeso Kristo.+
8 Ndo nto, nde ayonyokeketsha polo l’ekomelo diaha kaanga onto monga l’ɔkɔkɔ wa nyofunda lo lushi la Nkumɛso Yeso Kristo.+
9 Nzambi lakanyelɛ dia nyu monga kaamɛ la Ɔnande Yeso Kristo Nkumɛso ekɔ Nzambi ka kɔlamelo.+
10 Ɔnkɔnɛ analengo, dimi lambonyɔsɛngasɛnga lo lokombo la Nkumɛso Yeso Kristo dia nyu tshɛ nsanga lolemi ndo diaha diatɔnelo monga lam’asanyu,+ koko dia nyu tshɛ monga kaamɛ lo yimba yaamɛ ndo lo tokanyi taamɛ.+
11 Analengo le, anto amɔtshi w’oma lo luudu la Klowe wakambewoya lo dikambo dianyu dia diatɔnelo diekɔ lam’asanyu.
12 Kɛnɛ kalangami mbuta ele, onto l’onto la l’atei anyu ekɔ lo mbuta ate: “Dimi oseka Pɔɔlɔ,” “dimi oseka Apolo,”+ “dimi oseka Kɛfasi,”* “dimi oseka Kristo.”
13 Onde Kristo ambatɔna? Onde Pɔɔlɔ akadiakema lo otamba dikambo dianyu? Kana onde nyu nyakabatizama lo lokombo la Pɔɔlɔ?
14 Dimi lambosha Nzambi losaka nɛ dia dimi kobatiza ndooko onto l’atei anyu onyake Krispo+ la Ngayo,+
15 diaha onto mbuta ate nyu nyakabatizama lo lokombo lami.
16 Eelo, dimi lakabatiza ndo ase luudu la Stɛfana.+ Koko anto akina, dimi haleye kana lakabatiza onto ɔmɔtshi laadiko dia wasɔ.
17 Nɛ dia Kristo akantome, aha dia ndjobatiza, koko dia ndjewoya lokumu l’ɔlɔlɔ;+ aha la ɛtɛkɛta wa lomba,* diaha otamba w’asui* wa Kristo mbɔsama oko ɛngɔ k’anyanya.
18 Nɛ dia ɛtɛkɛta wendana la otamba w’asui* wekɔ enginya le wanɛ walanyema,+ koko le so sho wanɛ washimbamɛ, vɔ wekɔ wolo wa Nzambi.+
19 Nɛ dia akafundama ɔnɛ: “Dimi layolanya lomba la akanga wa tomba ndo layonya*+ yimba ya ambeyi wa mukanda.”
20 Lende ele kanga lomba? Lende ele ofundji?* Lende ele kanga taamu la lo dikongɛ nɛ di’akambo?* Shi Nzambi ambetɛ lomba l’andja ɔnɛ enginya?
21 Nɛ dia kaanga mbele andja ɔnɛ oma lo lomba lawɔ, konyanga dia mbeya Nzambi,+ oma lo lomba lande,+ Nzambi akɛnyi ɔlɔlɔ shimbɛ wanɛ wetawɔ l’ekimanyielo ka awui wa enginya+ wa kɛnɛ kasambishama.
22 Nɛ dia ase Juda wekɔ lo nɔmba tolembetelo+ ndo ase Ngirika wekɔ lo nyanga lomba;
23 koko sho tekɔ lo nsambisha Kristo lakadiakema l’otamba. Dui sɔ diekɔ otamba wa ntakanya le ase Juda ndo dui di’enginya+ le ase wedja.
24 Koko le wanɛ wakelamɛ, oyadi ase Juda kana ase Ngirika, Kristo ekɔ wolo wa Nzambi ndo lomba la Nzambi.+
25 Nɛ dia dikambo di’enginya diaki Nzambi ndeka anto lomba ndo dikambo dia wɔdu diaki Nzambi ndeka anto wolo.+
26 Nɛ dia analengo le, nyekɔ lo mɛna woho wakandanyelɛ dia anto wele la lomba lo yoho ya lo demba*+ bu efula, anto wele la wolo bu efula ndo anto wele la eotwelo ka nɛmɔ*+ bu efula,
27 koko Nzambi sɔnaka diangɔ di’enginya dia l’andja ɔnɛ dia nde mbisha akanga wa tomba nsɔnyi ndo Nzambi sɔnaka diangɔ dia wɔdu dia l’andja ɔnɛ dia mbisha diangɔ dia wolo nsɔnyi;+
28 ndo Nzambi sɔnaka diangɔ di’anyanya dia l’andja ɔnɛ ndo diangɔ diahɔsama la nɛmɔ, diangɔ diele bu dia nde ndanya diangɔ diele diekɔ,+
29 diaha onto* ndjafuna lo washo wa Nzambi.
30 Koko diɛsɛ la nde mbenyu kaamɛ la Kristo Yeso ɔnɛ lamboyala le so lomba l’oma le Nzambi ndo losembwe+ ndo ekidielo+ ndo etshungwelo k’oma lo oshinga w’etshungwelo,+
31 dia ndjaala oko wakadiafundama ɔnɛ: “Ɔnɛ layafuna, ayafune le Jehowa.”*+
Nɔtɛ ka l'ɛse ka dikatshi
^ Kana “watɛndɛ.”
^ Nde kelamɛ nto Petero.
^ Kana “ɛtɛkɛta wa yimba.”
^ Enda Elembetshielo.
^ Enda Elembetshielo.
^ Kana “layosokola l’omamu.”
^ Mbuta ate manyi lo Ɛlɛmbɛ.
^ Kana “etena kɛnɛ.” Enda Elembetshielo.
^ Kana “lo ndjela woho wɛna anto akambo.”
^ Kana “w’oma lo nkumbo ya lokumu.”
^ Tshɛk., “emunyi.”
