1 Kɔrɛtɔ 12:1-31
12 Analengo, dimi haalange nyu ntshikala lo wengengo lo kɛnɛ kendana la losha la nyuma.+
2 Nyu mbeyaka dia lam’akinyu ase wedja,* nyakatshutshuyamaka dia ntɛmɔla dikishi+ diahatɛkɛta lo yoho tshɛ yakanyalɔmbɔmaka.
3 Dimi lambonyotɛ dia ndooko onto lele la nyuma ka Nzambi lata ate: “Yeso ambodjama mananu!” ndo ndooko onto lakoka mbuta ate: “Yeso ekɔ Nkumadiɔndjɔ!” onyake paka nde kɔlɔmbwami la nyuma k’ekila.+
4 Weho wa losha wekɔ efula, koko nyuma kekɔ paka 1.+
5 Weho w’elimu wekɔ efula,+ koko Nkumadiɔndjɔ ekɔ paka 1;
6 ndo elimu* wotshikitanyi wekɔ, koko ekɔ paka Nzambi 1 kasala akambo akɔ tshɛ le anto tshɛ.+
7 Koko wɛnamelo wa nyuma mbishamaka le onto l’onto l’oyango ɔmɔtshi wa dimɛna.+
8 Nɛ dia ɔmɔtshi nongolaka ɛtɛkɛta* wa lomba lo tshimbo ya nyuma, ndo onto okina ɛtɛkɛta wa ewo lo ndjela nyuma kakɔ 1,
9 le okina mbetawɔ+ oma le nyuma kakɔ 1, okina losha la nkɔnɔla+ oma le nyuma kakɔ 1,
10 okina nto osalelo w’akambo wa diambo,+ okina wotelo wa prɔfɛsiya, okina oshihodielo wa ɛtɛkɛta wakasambiyama,+ okina ɛtɛkɛta wotshikitanyi+ ndo okina nkadimola ɛtɛkɛta.+
11 Koko nyuma kakɔ 1 kasala akambo asɔ tshɛ, lo nkahanya onto l’onto oko walangatɔ.
12 Nɛ dia oko wele demba diekɔ 1 koko diekɔ la tenyi efula, ndo kaanga mbele tenyi dia demba diakɔ tshɛ diekɔ efula, diekɔ paka demba 1,+ ngasɔ mbele ndo Kristo.
13 Nɛ dia sho tshɛ takabatizama la nyuma 1 lo demba 1, oyadi ase Juda kana ase Ngirika, oyadi mfumbe kana anto wele la lotshungɔ, ndo wakatɔnɔsha sho tshɛ nyuma kakɔ 1.
14 Nɛ dia lo mɛtɛ, demba keema la etenyi 1 keto, koko diekɔ la tenyi efula.+
15 Naka lokolo layota ate: “Lam’ele dimi keema lonya, dimi bu etenyi ka demba,” onde l’ɔtɛ wa dikambo sɔ lɔ keema etenyi ka demba?
16 Naka toyi diayota ate: “Lam’ele dimi keema sso, dimi bu etenyi ka demba,” onde l’ɔtɛ wa dikambo sɔ diɔ keema etenyi ka demba?
17 Otondonga demba di’otondo diayale sso, lende ototokaka? Otondonga demba di’otondo diayale toyi, lende ototokaka nsolo?
18 Koko kakianɛ Nzambi ambokitsha tenyi dia demba lo ahole adiɔ, etenyi l’etenyi oko wakandalange.
19 Otondonga diɔ tshɛ diayale etenyi 1, onde ɔsɔ otonga demba?
20 Tenyi dia demba diekɔ efula, koko demba diekɔ 1.
21 Sso hadiokoke mbutɛ lonya ɔnɛ: “Dimi bu l’ohomba ayɛ” kana ɔtɛ hawokoke mbutɛ ekolo ɔnɛ: “Dimi bu l’ohomba anyu.”
22 Koko tenyi dia demba diɛnama oko ndeka wɔdu, diekɔ ohomba
23 ndo tenyi dia demba diɔsaso oko bu la nɛmɔ efula,+ diɔ mbashaso nɛmɔ dioleki efula. Ɔnkɔnɛ, tenyi diaso dia demba dia nsɔnyi mbɔsamaka la kɛnɛmɔ k’efula.
24 Koko tenyi diaso dia demba di’elangala bu l’ohomba wa sho dikokɛ lo yoho shɔ. Koko Nzambi akasale demba lo ndeka mbisha etenyi ka demba kele bu la nɛmɔ nɛmɔ di’efula,
25 diaha demba mbatɔna, koko dia tenyi diadiɔ kimanyiyana lam’asadiɔ.+
26 Naka etenyi kɛmɔtshi ka demba kekɔ lo nsowa, kete tenyi dikina tshɛ dia demba sowaka kaamɛ la tɔ.+ Kana naka etenyi kɛmɔtshi ka demba kambodiyama, kete tenyi dikina tshɛ dia demba ngɛnangɛnaka kaamɛ la tɔ.+
27 Nyu nyekɔ demba dia Kristo,+ ndo onto l’onto l’atei anyu ekɔ etenyi kɛmɔtshi ka demba.+
28 Nzambi akakitsha onto l’onto lo dihole diande lo etshumanelo: ntondotondo apɔstɔlɔ,+ oma laasɔ ko amvutshi,+ ko embetsha,+ ko akambo wa diambo,+ ko losha la nkɔnɔla,+ elimu wa kimanyiyana, akoka wa nɔmbɔla,+ ndo ntɛkɛta lo ɛtɛkɛta ekina.+
29 Aha anto tshɛ mbele apɔstɔlɔ, shi mɛtɛ? Aha anto tshɛ mbele amvutshi, shi mɛtɛ? Aha anto tshɛ mbele embetsha, shi mɛtɛ? Aha anto tshɛ mbasala akambo wa diambo, shi mɛtɛ?
30 Aha anto tshɛ mbele la losha la nkɔnɔla, shi mɛtɛ? Aha anto tshɛ mbatɛkɛta lo ɛtɛkɛta ekina, shi mɛtɛ?+ Aha anto tshɛ mbele akadimudi, shi mɛtɛ?+
31 Koko nyotetemale nsala la wolo* dia monga la losha loleki woke,+ ko dimi layonyɛnya mboka koleki dimɛna.+
Nɔtɛ ka l'ɛse ka dikatshi
^ Mbuta ate wanɛ wele bu ambetawudi.
^ Kana “ekambelo.”
^ Kana “losango.”
^ Kana “nyotetemale nyanga l’ohetoheto tshɛ.”
