1 Kɔrɛtɔ 14:1-40
14 Nyowese ngandji, koko nyotetemale nsala la wolo dia monga la* losha la nyuma, djekoleko dia nyu mbuta prɔfɛsiya.+
2 Nɛ dia ɔnɛ latɛkɛta lo ɛtɛkɛta ekina, aha anto mbatɛnde, koko Nzambi nɛ dia ndooko onto loka+ ndo nde ekɔ lo mbuta toseke t’ekila+ l’ekimanyielo ka nyuma.
3 Koko ɔnɛ lata prɔfɛsiya mbodiaka, keketshaka ndo sambaka anto oma l’ɛtɛkɛta ande.
4 Ɔnɛ latɛkɛta l’ɔtɛkɛta okina ndjakeketshaka ndamɛ, koko ɔnɛ lata prɔfɛsiya keketshaka etshumanelo.
5 Dimi lotolanga dia nyu tshɛ ntɛkɛta lo ɛtɛkɛta ekina,+ koko dimi ndeka nanga nyu mbuta prɔfɛsiya.+ Lo mɛtɛ, ɔnɛ lata prɔfɛsiya ndeka ɔnɛ latɛkɛta lo ɛtɛkɛta ekina, onyake naka nde ekɔ lo nkadimola dia etshumanelo keketshama.
6 Analengo, naka l’etena kɛnɛ dimi ndja ko ndjɔtɛkɛta la nyu lo ɛtɛkɛta ekina, kakɔna k’ɔlɔ kayomonyosalɛ? Onyake dimi kɔtɛkɛtshi la nyu la woshwelo w’akambo,+ kana la ewo,+ kana la wotelo wa prɔfɛsiya, kana la wetshelo.
7 Ɔsɔ ekɔ oko diangɔ diele bu la lɔsɛnɔ diakokawɔ mpoma la diɔ mishiki, ɛnyɛlɔ hionge kana lɔsɛsɛ. Naka wendjo wahomama hawotshikitana, ngande wayokoka anto mbeya kɛnɛ kahomawɔ lo hionge kana lo lɔsɛsɛ?
8 Lo mɛtɛ, naka dimama diambodama lo yoho yahokɛma, akɔna ayoyalɔngɔsɔla dia ndɔ ta?
9 Woho akɔ waamɛ mbele, naka nyu hanyɔtɛkɛta ɛtɛkɛta wokɛma hwe, ngande wayeya anto kɛnɛ katɛkɛtama? Mɛtɛ nyayonga oko anto watɛkɛta lo lɔpɛpɛ.
10 Mbeyaka monga ko weho w’ɛtɛkɛta wekɔ efula l’andja, koko ndooko woho wele bu la kitshimudi.
11 Ko naka dimi halashihodia kitshimudi y’ɔtɛkɛta ɔmɔtshi, kete dimi layonga ɔngɛndangɛnda le ɔnɛ latɛkɛta ndo ɔnɛ latɛkɛta ayonga ɔngɛndangɛnda le mi.
12 Ɔnkɔnɛ ndo nyu, lam’ele nyekɔ lo nkombola l’asolo walomɔlomɔ losha la nyuma, nyoyange dia ndola la losha layokeketsha etshumanelo.+
13 Ɔnkɔnɛ, ɔnɛ latɛkɛta lo ɔtɛkɛta okina alɔmbɛ dia nde nkadimola.+
14 Nɛ dia naka lekɔ lo nɔmba lo ɔtɛkɛta okina, kete losha lami la nyuma mbalɔmba, koko halashihodia ndooko dui lo yimba yami.
15 Ko ahomba salema? Dimi layɔlɔmba la losha la nyuma, koko layɔlɔmba ndo la yimba yami. Dimi layemba esambo wa lotombo la losha la nyuma, koko layemba ndo esambo wa lotombo la yimba yami.
16 Naka wɛ hasadi ngasɔ, ko wɛ ntombola Nzambi la losha la nyuma, ngande wayokoka onto k’onto la l’atei anyu mbuta ate “Aamɛɛ” lo eokelo kayɛ ka losaka, lam’ele nde heye kɛnɛ katayɛ?
17 Ekɔ mɛtɛ dia wɛ ekɔ lo mbisha losaka lo yoho ya dimɛna, koko onto okina hakeketshama.
18 Dimi lekɔ lo mbisha Nzambi losaka lo woho watɛkɛtami lo ɛtɛkɛta efula nyoleka nyu tshɛ.
19 Koko l’etshumanelo kɛmɔtshi, layoleka nanga mbuta tɔtɛkɛta 5 lo yimba* yami, takokami nto mbetsha* anto akina lo dihole dia tɔtɛkɛta nunu dikumi (10 000) lo ɔtɛkɛta okina.+
20 Analengo, tanyongake ana wa akɛnda lo eokelo kanyu,+ koko nyonge ana wa akɛnda lo kɛnɛ kendana la kɔlɔ.+ Ndo nyonge etshundju w’anto lo eokelo kanyu.+
21 Akafundama lo Ɛlɛmbɛ ɔnɛ: “‘Dimi layosawola la anto anɛ lo ɛtɛkɛta w’angɛndangɛnda ndo lo tɔtɛkɛta t’angɛndangɛnda, koko polo laasɔ, vɔ wayotona mpokamɛmi,’ mbata Jehowa.”*+
22 Ɔnkɔnɛ, ɛtɛkɛta ekina bu djembetelo le ambetawudi, koko le anto wele bu ambetawudi.+ Ndo wotelo wa prɔfɛsiya bu dikambo di’anto wele bu ambetawudi, koko dikambo dia ambetawudi.
23 Oma lɔkɔ, naka ase etshumanelo k’otondo wambosangana, ko vɔ tshɛ ntɛkɛta lo ɛtɛkɛta ekina, koko anto k’anto kana wanɛ wele bu ambetawudi wambosangana la wɔ, onde vɔ hawotota vate nyambodjɔ aladi?
24 Koko naka nyu tshɛ nyekɔ lo mbuta prɔfɛsiya ko onto lele bu ombetawudi kana onto k’onto ambosangana la nyu, nde ayaanyema ndo ayɔsɛdingɔma dimɛna oma le wɔ tshɛ.
25 L’etena kɛsɔ, akambo woshɛmi lo otema ande wayotomba sɛkɛ ndo nde ayɔkɔ ekukumadi ko ayɔtɛmɔla Nzambi, ata ate: “Nzambi ekɔ mɛtɛ l’atei anyu.”+
26 Analengo, ko ahombaso nsala? Etena kasangananyu, onto ɔmɔtshi ekɔ la osambo, okina ekɔ la wetshelo, okina ekɔ la woshwelo, okina ekɔ la losha la ntɛkɛta lo ɛtɛkɛta ekina ndo okina ekɔ la losha la nkadimola.+ Nyosalake akambo tshɛ dia keketshana.
27 Naka onto ɔmɔtshi ntɛkɛta lo ɔtɛkɛta okina, dikambo sɔ diakome le anto 2 ndo naka amboleka efula, kete 3 ndo vɔ wengɔnyake. Koko onto ɔmɔtshi pombaka kadimolaka.+
28 Ko naka ndooko onto lakadimola, kete nde pombaka nɛmbɔhala lo etshumanelo ndo nde ayatɛkɛtɛke ndo atɛkɛtake la Nzambi.
29 Ndo nto, amvutshi+ 2 kana 3 watɛkɛtɛ ndo akina washihodia kitshimudi.
30 Ko naka okina ambolongola woshwelo etena kodjashinde, ɔnɛ lele la ɔtɛkɛta ɔlame.
31 Nɛ dia nyu tshɛ kokaka mbuta prɔfɛsiya onto l’onto l’etena kande dia anto tshɛ nkondja wetshelo ndo anto tshɛ keketshama.+
32 Amvutshi pombaka menda woho wakambawɔ la losha la nyuma l’amvutshi.
33 Nɛ dia Nzambi keema Nzambi k’ofukutanu, koko nde ekɔ Nzambi ka wɔladi.+
Oko wediɔ lo tshumanelo tshɛ dia ekilami,
34 wamato wɔlame lo tshumanelo, nɛ dia vɔ bu la lotshungɔ la ntɛkɛta.+ Koko wayakitshakitsha l’ɛse k’apami+ oko wata ndo Ɛlɛmbɛ.
35 Ko naka vɔ nangaka mbeka dui dimɔtshi, wambole waomɛwɔ lawakawɔ, nɛ dia ekɔ dui dia nsɔnyi dia womoto ntɛkɛta lo etshumanelo.
36 Onde oma le nyu mbakatɔngɔ ɔtɛkɛta wa Nzambi, kana onde paka le nyu oto mbakawakome?
37 Naka onto ɔmɔtshi mbɔsaka dia nde ekɔ omvutshi kana akalongola losha la nyuma, kete nde pombaka mbetawɔ di’akambo wanyofundɛmi wekɔ didjango diaki Nkumadiɔndjɔ.
38 Ko naka onto ɔmɔtshi mbaɔnyɔlaka, kete nde ayɔnyɔma.*
39 Ɔnkɔnɛ analengo, nyotetemale nsala la wolo dia mbuta prɔfɛsiya,+ koko tanyoshimbake anto dia vɔ ntɛkɛta lo ɛtɛkɛta ekina.+
40 Koko akambo tshɛ wasaleme dimɛna ndo aha l’ofukutanu.*+
Nɔtɛ ka l'ɛse ka dikatshi
^ Kana “nyotetemale nyanga la ohetoheto tshɛ.”
^ Kana “eokelo.”
^ Kana “mbetsha lo onyɔ.”
^ Kana ondo “naka onto ɔmɔtshi heye, kete nde ayotetemala ntshikala lo heye kande.”
^ Kana “lo yoho yokongɛmi dimɛna.”
