1 Kɔrɛtɔ 15:1-58
15 Analengo, dimi lambonyohola dikambo dia lokumu l’ɔlɔlɔ lakamanyewoya,+ lakanyetawɔ ndo latetemalanyu nkukutɛ.
2 Lo tshimbo yalɔ mbayonyoshimbamɛ naka nyu nkukutɛ lokumu l’ɔlɔlɔ lakamanyewoya. Naka aha ngasɔ, kete oyalayala mbakanyayala ambetawudi.
3 Nɛ dia l’atei w’akambo wa ntondo wakamanyetsha mbele ndo kɛnɛ kakamalongola kata ɔnɛ: Kristo akavu dikambo dia pɛkato yaso lo ndjela Afundelo;+
4 ndo dia nde akakundɛma,+ eelo, nde akolɔ+ lushi la 3+ lo ndjela Afundelo;+
5 ndo dia nde akɛnama le Kɛfasi,*+ ko oma laasɔ le apɔstɔlɔ ande 12.+
6 Oma laasɔ, nde akɛnama mbala kakɔ ɔtɔi+ le anangɛso ndekana 500 wele efula ka l’atei awɔ wekekɔ kaamɛ la so, kaanga mbele amɔtshi wambolala djɔ lo nyɔi.
7 L’ɔkɔngɔ wa laasɔ, nde akɛnama le Jakɔba+ ko oma laasɔ le apɔstɔlɔ tshɛ.+
8 Koko l’ekomelo, nde akayɛnamaka ndo le mi+ wate kana oko le ɔna lambotɔ osondjo.
9 Nɛ dia dimi kele ɔpɔstɔlɔ woleki tshitshɛ ndo dimi haasungana mbelamɛ ɔpɔstɔlɔ, nɛ dia lakahɛnyahɛnyaka etshumanelo ka Nzambi.+
10 Koko, oma lo ɔlɔlɔ waheyama mbɛdika waki Nzambi mbemi kɛnɛ kemi. Ndo ɔlɔlɔ ande waheyama mbɛdika komonga anyanya le mi, koko dimi lakakambe olimu efula mbaleka vɔ tshɛ; ɛɛ, aha dimi mbakakambe, koko ɔlɔlɔ waheyama mbɛdika waki Nzambi wele le mi.
11 Ɔnkɔnɛ oyadi dimi kana vɔ, ngasɔ mbasambishaso ndo ngasɔ mbakanyetawɔ.
12 Ko naka tekɔ lo nsambisha dia Kristo akolɔ oma lo nyɔi,+ lande na kata anto amɔtshi l’atei anyu ɔnɛ eolwelo k’oma lo nyɔi bu?
13 Naka mɛtɛ eolwelo k’oma lo nyɔi bu, kete ndo Kristo kombolɔ.
14 Ko naka Kristo kombolɔ, kete lo mɛtɛ esambishelo kaso kekɔ anyanya ndo mbetawɔ kanyu kekɔ nto anyanya.
15 Ndo nto naka mɛtɛ anto wavɔ hawotolɔ, kete sho taya ɛmɛnyi wa kashi lo dikambo dia Nzambi,+ nɛ dia tambosambisha awui wa kashi lo dikambo dia Nzambi lo mbuta ɔnɛ nde akolola Kristo,+ ko tete le nde komboolola.
16 Nɛ dia naka anto wavɔ hawotolɔ, kete Kristo lawɔ kombolɔ.
17 Ndo nto, naka Kristo kombolɔ, kete mbetawɔ kanyu kekɔ anyanya ndo nyaakatetemala nsɛna lo pɛkato yanyu.+
18 Naka ngasɔ, kete wanɛ woladi djɔ lo nyɔi wele la diɔtɔnganelo la Kristo vɔ lawɔ wakashishɔ lo pondjo.+
19 Ko naka paka lɔsɛnɔ lɔnɛ loto mbalongamɛso le Kristo, kete sho mboleki anto akina tshɛ kandji.
20 Koko lam’ele Kristo akolɔ oma lo nyɔi, nde ekɔ ɔlɔnga wa wanɛ woladi djɔ lo nyɔi.+
21 Nɛ dia lam’ele nyɔi kakaye oma le onto ɔtɔi,+ eolwelo k’anto wavɔ ndja oma le onto ɔtɔi.+
22 Nɛ dia oko wavɔ+ anto tshɛ oma le Adama, mbele ndo anto tshɛ wayonga la lɔsɛnɔ+ oma le Kristo.
23 Koko, onto l’onto lo dihole diande: Kristo mbele ɔlɔnga,+ oma laasɔ wanɛ wele waki Kristo lo etena ka woongelo ande.+
24 Oma laasɔ, l’ekomelo, lam’ayondokimɔ Diolelo le Nzambi kande ndo She, lam’ayondolanya waolelo tshɛ ndo mandji tshɛ ndo wolo.+
25 Nɛ dia nde pombaka monga Nkumekanga polo lam’ayokitsha Nzambi atunyi tshɛ l’ɛse k’ekolo ande.+
26 Otunyi w’ekomelo wayolanyema ele nyɔi.+
27 Nɛ dia Nzambi “akalɛndja diangɔ tshɛ l’ɛse k’ekolo ande.”+ Koko lam’atande dia ‘diangɔ tshɛ diambɔlɛndjama,’+ mbokɛmaka dia aha ndo Ɔnɛ lakɔɔlɛndjɛ diangɔ tshɛ.+
28 Koko, lam’ayɔlɛndjama diangɔ tshɛ le nde, Ɔna ndamɛ nde lawɔ ayɔlɛmbɛ Ɔnɛ lakɔɔlɛndjɛ diangɔ tshɛ,+ dia Nzambi monga laadiko dia tshɛ.+
29 Naka ngasɔ, kakɔna kayokomɛ wanɛ wabatizama l’oyango wa monga edo?+ Naka anto wavɔ hawotolɔ, lande na kabatizamawɔ vɔ lawɔ l’oyango wa monga ngasɔ?
30 Lande na keso sho lawɔ lo waale wonya tshɛ?*+
31 Lushi la lushi dimi mongaka lo waale wa nyɔi. Analengo, ɔsɔ kele ɔkɔkɔ wele la mi oma le Kristo Yeso Nkumɛso wa ndjatombola lo dikambo dianyu.
32 Naka oko anto akina* dimi lakalɔ la nyama ya mpango l’Ɛfɛsɔ,+ wahɔ akɔna wele la dikambo sɔ le mi? Naka anto wavɔ hawotolɔ oma lo nyɔi, kete “nyɛsɔ tole ndo tɔnɔ, nɛ dia tayovɔ loyi.”+
33 Tanyokesamake. Lɔngɛnyi la kɔlɔ ndanyaka mbekelo y’ɛlɔlɔ.*+
34 Nyokane yimba lo yoho ya dimɛna ndo tanyosalake pɛkato, nɛ dia anto amɔtshi bu la ewo kaki Nzambi. Dimi lekɔ lo mbuta akambo asɔ dia nyu mboka nsɔnyi.
35 Koko, onto ɔmɔtshi ayombola ate: “Ngande wayolɔ anto wavɔ? Ɛɛ, la demba dia woho akɔna diayowolɔ?”+
36 Enginya le, kɛnɛ konɛyɛ hatombe paka tɔ kambotavwe.
37 Lo dikambo dia kɛnɛ konɛyɛ, aha tshondo y’ɛngɔ konɛyɛ koko woho, oyadi w’eponga kana w’ɛngɔ kekina.
38 Koko Nzambi kishaka demba woho walangande ndo nde mbishaka woho la woho yoho mɔtshi ya demba.
39 Alemba tshɛ bu woho ɔtɔi, anto wekɔ la woho awɔ wa demba, nyama yalongawɔ yekɔ la woho ayɔ wa demba, tofudu tekɔ la woho atɔ wa demba ndo nse yekɔ la woho ayɔ wa demba.
40 Alemba wa l’olongo+ wekɔ ndo alemba wa la nkɛtɛ+ wekɔ, koko lotombo lele la alemba wa l’olongo lekɔ woho ɔmɔtshi ndo lele la alemba wa la nkɛtɛ lekɔ woho okina.
41 Lotombo lele la wonya ntshikitana+ la lotombo lele la ngɔndɔ ndo lɔ ntshikitana la lotombo lele la tɔɔtɔ ndo yɔɔtɔ la yɔɔtɔ yekɔ la lotombo layɔ.
42 Ngasɔ mbediɔ ndo lo dikambo dia eolwelo ka wanɛ wavɔ. Demba monɛmaka kɛnɛ kahɔnda ndo mbolɔka kɛnɛ kahahɔndɛ.+
43 Diɔ monɛmaka la diɔnyɔ ndo mbolɔka la lotombo.+ Diɔ monɛmaka la wɔdu ndo mbolɔka la wolo.+
44 Diɔ monɛmaka demba dia l’emunyi ndo mbolɔka demba dia lo nyuma. Naka demba dia l’emunyi diekɔ, kete ndo demba dia lo nyuma diekɔ.
45 Ɔnkɔnɛ akafundama ɔnɛ: “Adama, onto la ntondo akayala onto* lasɛna.”+ Adama w’ekomelo akayala nyuma kasha lɔsɛnɔ.+
46 Koko, aha kɛnɛ kele nyuma mbeta ntondo. Kɛnɛ kele emunyi mbeta ntondo ko kɛnɛ kele nyuma ndjoya l’ɔkɔngɔ.
47 Onto la ntondo akaye oma la nkɛtɛ ndo akasalema la ditshu;+ onto la hende akaye oma l’olongo.+
48 Oko wele ɔnɛ lakasalema la ditshu mbele ndo anto wakasalema la ditshu. Ndo oko wele ose olongo mbele ndo ase olongo.+
49 Ndo oko wakatɔshi efanelo ka ɔnɛ lakasalema la ditshu,+ mbayotɔsa ndo efanelo ka ose olongo.+
50 Koko analengo, kɛnɛ kalangami mbuta ele: Emunyi la dikila hawokoke nkita Diolelo dia Nzambi ndo kɛnɛ kahɔnda hakoke nkita kɛnɛ kahahɔndɛ.
51 Nyolonge nyote sheke y’ekila: Aha sho tshɛ mbayolala djɔ lo nyɔi, koko sho tshɛ tayokadimɔ+
52 mbala kakɔ ɔtɔi, lo mayi ka sso, lam’ayoda dimama di’ekomelo. Nɛ dia dimama diayoda,+ ko wanɛ wakavu wayolɔ l’alemba wahahɔndɛ, ndo sho tayokadimɔ.
53 Nɛ dia kɛnɛ kahɔnda pombaka ndɔta kɛnɛ kahahɔndɛ+ ndo kɛnɛ kavɔ pombaka ndɔta kɛnɛ kahavu.+
54 Koko lam’ayɔlɔta kɛnɛ kahɔnda kɛnɛ kahahɔndɛ ndo lam’ayɔlɔta kɛnɛ kavɔ kɛnɛ kahavu, mbayokotshama kɛnɛ kakafundama ɔnɛ: “Nyɔi ambonyɛma lo pondjo.”+
55 “Nyɔi le, lende ele otshumba ayɛ? Nyɔi le, lende ele waanga ayɛ?”+
56 Waanga wakonya lo nyɔi ele pɛkato,+ ndo wolo wa pɛkato ko Ɛlɛmbɛ.*+
57 Koko Nzambi losaka, nɛ dia nde ambotosha otshumba lo tshimbo ya Nkumɛso Yeso Kristo!+
58 Ɔnkɔnɛ analengo wa ngandji, nyotshikale nge,+ nyoshikimale, ndo nyoyalake nshi tshɛ la akambo efula wa nsala+ l’olimu wa Nkumadiɔndjɔ, nyeya dia paa kɛnanyu l’olimu wa Nkumadiɔndjɔ keema anyanya.+
Nɔtɛ ka l'ɛse ka dikatshi
^ Nde kelamɛ nto Petero.
^ Kana “tena tshɛ?”
^ Kana ondo “lo ndjela kanyi y’anto.”
^ Kana “ndanyaka lɔkɛwɔ l’ɔlɔlɔ.”
^ Kana “anima.”
^ Kana “ndo Ɛlɛmbɛ mbasha pɛkato wolo atɔ.”
