1 Kɔrɛtɔ 16:1-24
16 Lo kɛnɛ kendana la falanga yakɔngɔlɛnyu ekilami,+ nyoyele alako wakamasha tshumanelo dia la Ngalatiya.
2 Lushi la ntondo la lo lomingu tshɛ, onto l’onto l’atei anyu koombake yangɔ mɔtshi lo ndjela ekondjelo kande diaha ɛkɔngɔ ndjosalema lam’ayomoya.
3 Koko lam’ayomoya, dimi layotoma anto wakanyalowola lo mikanda+ dia vɔ ntɔla weshasha wakanyakimɔ l’otema ɔtɔi otsha la Jɛrusalɛma.
4 Ko naka ekɔ dimɛna dia dimi ntshɔ ndo lɛkɔ, kete dimi layotshɔ kaamɛ la wɔ.
5 Koko layoya lengo le nyu lam’ayometa oma la Makɛdɔniya, nɛ dia dimi layeta oma la Makɛdɔniya,+
6 ndo ondo layotshikala yema la nyu kana layetsha nshi ya tshitshi kaamɛ la nyu dia nyu tshindɛmi yema otsha lɛnɛ ayomotshɔ.
7 Dimi haalange nyɛna tsho yema lam’atamete, nɛ dia dimi kombolaka ntshikala tshanda mɔtshi la nyu,+ naka Jehowa* alanga.
8 Dimi layotshikala l’Ɛfɛsɔ+ polo lo Fɛtɛ ka Pɛntɛkɔsta,
9 nɛ dia lokuke la soko dia woke diasha diaaso dia nkamba olimu lambondjihwamɛ,+ koko atunyi wekɔ efula.
10 Naka Timɔte+ amboya, nyosale tshɛ diaha nde mboka wɔma etena kayondonga kaamɛ lanyu, nɛ dia nde ekɔ lo nkamba olimu wa Jehowa*+ oko dimi.
11 Ɔnkɔnɛ, onto atowɔnyɔlake. Nyootshinde yema lo mboka kande lo wɔladi dia nde nkoma le mi, nɛ dia dimi lekɔ lo mbokonga kaamɛ ndo anangɛso.
12 Lo kɛnɛ kendana la ɔnangɛso Apolo,+ dimi lakɔɔkɔkɔmiya la wolo dia nde ndja le nyu kaamɛ la anangɛso. Koko nde konanga ndja l’etena kɛnɛ, nde ayoya lam’ayondokondja diaaso.
13 Nyɔsɛnake,+ nyotshikale nge lo mbetawɔ,+ nyosale akambo oko apami*+ ndo nyonge la wolo.+
14 Dikambo tshɛ diasalanyu, diasaleme la ngandji.+
15 Analengo, dimi lambonyokeketsha nte: Nyu mbeyaka dia ase luudu la Stɛfana mbele ɛlɔnga wa l’Akaya ndo dia vɔ wakayakimɔ la lolango lawɔ dia kambɛ ekilami.
16 Nyotetemale ndjakitshakitsha l’ɛse k’anto wa woho ɔsɔ ndo ka wanɛ tshɛ wakamba kaamɛ ndo wakamba olimu wa wolo.+
17 Koko dimi lekɔ lo ngɛnangɛna woongelo wa Stɛfana,+ Fɔrtunato ndo Akayikusɛ lanɛ, nɛ dia vɔ wekɔ lo kimanyiyami l’etena kenyu bu laawɔ.
18 Dikambo vɔ wakankeketsha ndo wakanyokeketsha. Ɔnkɔnɛ, nyonge la lowando le anto wa woho ɔsɔ.
19 Tshumanelo dia la Aziya diambonyotomɛ mɔyɔ. Akula la Piriskila kaamɛ ndo etshumanelo kasangana lo luudu lawɔ+ wambonyotomɛ mɔyɔ la wangasanu tshɛ lo Nkumadiɔndjɔ.
20 Anangɛso tshɛ wanyotomɛ mɔyɔ. Nyoshane mɔyɔ wa la bizɛ k’ekila.
21 Dimi Pɔɔlɔ lambonyotomɛ mɔyɔ ɔnɛ wofundami la lonya lami dimɛ.
22 Naka onto hoke Nkumadiɔndjɔ ngandji, nde adjame mananu. Nkumɛso, yaka!
23 Ɔlɔlɔ waheyama mbɛdika wa Nkumadiɔndjɔ Yeso wayale la nyu!
24 Ngandji kami kayale la nyu, nyu wanɛ tshɛ wele kaamɛ la Kristo Yeso!
