1 Kɔrɛtɔ 3:1-23
3 Ɔnkɔnɛ analengo, dimi kokoka ntɛkɛta la nyu oko anto wele la lonyuma,+ koko oko anto wa lo demba, oko ana w’akɛnda+ lo Kristo.
2 Dimi lakanyosha awɛlɛ, koko aha mbo ya ndɛ ya wolo, nɛ dia nyaki nyatakeketala. Kaanga kakianɛ nyu nyatakeketala,+
3 nɛ dia nyeke anto wa lo demba.+ Lam’ele kandjema ndo ewanu wekɔ l’atei anyu, shi laasɔ nyekɔ anto wa lo demba+ ndo nyekɔ lo nkɛndakɛnda oko watɔkɛndakɛndaka anto?
4 Nɛ dia lam’ata ɔmɔtshi ate: “Dimi oseka Pɔɔlɔ,” okina ate: “Dimi oseka Apolo,”+ shi laasɔ nyekɔ lo nsala akambo oko anto k’anto?
5 Ele Apolo? Ko ele Pɔɔlɔ? Vɔ wekɔ ekambi wakanyokimanyiya+ dia nyu nkoma ambetawudi, oko wakasha Nkumadiɔndjɔ onto l’onto.
6 Dimi lakonɛ,+ Apolo akatɛ ashi,+ koko Nzambi kakodia diangɔ diakɔ,
7 diaha oyadi ɔnɛ lonɛ kana ɔnɛ latɛ ashi ndjatombola, koko paka Nzambi ladiodia.+
8 Ɔnɛ lonɛ ndo ɔnɛ latɛ ashi wekɔ ɔtɔi,* koko onto l’onto ayolongola difuto diande lo ndjela olimu ande hita.+
9 Nɛ dia tekɔ ekambi kaamɛ la Nzambi. Nyu nyekɔ ekambɔ kaki Nzambi kakambema, luudu laki Nzambi.+
10 Lo ndjela ɔlɔlɔ waheyama mbɛdika waki Nzambi wakandansalɛ, dimi lakake etshina+ oko ɔnɔmbɔdi wa manyi l’olimu wa wokelo,* koko onto okina ekɔ lo mbika laawɔ. Ɔnkɔnɛ, onto tshɛ endake woho wakande laawɔ.
11 Nɛ dia ndooko onto lakoka mbika etshina kekina laadiko dia kɛnɛ kakakama, mbuta ate Yeso Kristo.+
12 Naka onto mbika paonyi, mfɛsa, mbɔkɔ y’oshinga wolo, esongo, ndjwa kana nsɔdu laadiko dia etshina kakɔ,
13 kete elimu w’onto tshɛ wayɛnama woho wewɔ,* nɛ dia yanyi yayotondja olimu akɔ sɛkɛ dikambo vɔ wayoshɔma l’ekimanyielo ka dja+ ndo dja yɔamɛ yayɛnya woho wele olimu w’onto l’onto.
14 Naka kɛnɛ kakake onto laadiko diatɔ kambotshikala, kete nde ayolongola difuto.
15 Naka kɛnɛ kakake onto kambolongola, kete nde ayoshisha, koko ndamɛ ayoshimbamɛ. Ko naka ngasɔ, kete ayonga oko oma lo dja.
16 Onde nyu hanyeye dia nyu nyekɔ tɛmpɛlɔ ka Nzambi+ ndo ɔnɛ nyuma ka Nzambi mbidjasɛka le nyu?+
17 Naka onto ndanya tɛmpɛlɔ ka Nzambi, kete Nzambi ayowolanya, nɛ dia tɛmpɛlɔ ka Nzambi kekɔ ekila ndo nyu mbele tɛmpɛlɔ kakɔ.+
18 Onto atoyakesake. Naka onto ɔmɔtshi l’atei anyu fɔnyaka dia nde ekɔ kanga lomba lo dikongɛ nɛ di’akambo,* nde ayale enginya dia nde monga kanga lomba,
19 nɛ dia lomba la andja ɔnɛ lekɔ enginya le Nzambi, nɛ dia akafundama ɔnɛ: “Nde atondaka akanga wa tomba lo lokeso+ lawɔ hita.”
20 Ndo nto ɔnɛ: “Jehowa* mbeyaka dia ekanelo ka akanga wa lomba kekɔ anyanya.”+
21 Ɔnkɔnɛ, onto atofunake lo dikambo dia anto, nɛ dia diangɔ tshɛ diekɔ dianyu.
22 Oyadi Pɔɔlɔ kana Apolo kana Kɛfasi*+ kana andja ɔnɛ kana lɔsɛnɔ kana nyɔi kana akambo wa kakianɛ kana akambo wokoya, diangɔ tshɛ diekɔ dianyu.
23 Nyu lo wedi anyu nyekɔ waki Kristo,+ Kristo lo wedi ande ekɔ laki Nzambi.
Nɔtɛ ka l'ɛse ka dikatshi
^ Kana “wekɔ la oyango ɔtɔi.”
^ Kana “ɔnɔmbɔdi w’olimu wele la lomba.”
^ Tshɛk., “wayotomba sɛkɛ.”
^ Kana “lo etena kɛnɛ.” Enda Elembetshielo.
^ Nde kelamɛ nto Petero.
