1 Kɔrɛtɔ 5:1-13
5 Tekɔ lo mboka dia awui wa mindo wa dieyanelo*+ wekɔ lo salema l’atei anyu, awui wa mindo* wele kaanga ase wedja hawosale, pami kɛmɔtshi ambɔsa* wadi a she.+
2 Onde nyekɔ la ofunu lo dui sɔ? Shi nyu pombaka ndela+ ndo mbitshanya onto lakasale dui sɔ oma l’atei anyu?+
3 Kaanga mbemi bu laawɔ lo demba, dimi lekɔ laawɔ lo yimba ndo dimi lamboshila nombosha pami kakasale dui sɔ, oko dimi lekɔ kaamɛ la nyu.
4 Lam’asangananyu lo lokombo la Nkumɛso Yeso, ndo lo mbeya dia lekɔ kaamɛ la nyu lo yimba, kaamɛ ndo wolo wa Nkumɛso Yeso,
5 nyu pombaka nkimɔ pami kɛsɔ le Satana+ dia ndanya demba la oyango wa nshimbɛ lonyuma lo lushi la Nkumadiɔndjɔ.+
6 Ofunu anyu keema dimɛna. Onde nyu hanyeye dia yema ya wodoya tshitshɛ mbidoyaka ofushi tshɛ wa lɔsɔha?+
7 Nyonya wodoya w’edjedja dia nyu monga ofushi wa lɔsɔha w’oyoyo waha kaanga la yema ya wodoya. Nɛ dia lo mɛtɛ, Kristo lele ɔna ɔkɔkɔ w’Elekanelo+ ambolambɔmaka.+
8 Ɔnkɔnɛ nyɛsɔ tosale fɛtɛ,+ aha la wodoya w’edjedja, aha la wodoya w’akambo wa kɔlɔ ndo wa pɛkato, koko la mapa waha la wodoya w’oshika ndo wa mɛtɛ.
9 Lo mukanda ami, dimi lakanyofundɛ dia nyu ntshika mbekesanɛ* la anto wasala awui wa mindo wa dieyanelo.*
10 Aha dia anto tshɛ wasala awui wa mindo wa dieyanelo* lo andja+ ɔnɛ kana akanga wa lokaki kana apɔtwanyi kana atɛmɔdi wa dikishi mbakamatɛkɛta. Otondonga ngasɔ, tshike nyotohomba ntomba oma lo andja ɔnɛ.+
11 Koko kakianɛ, dimi lambonyofundɛ dia nyu ntshika mbekesanɛ*+ la onto tshɛ lelamɛ ɔnangɛso lasala awui wa mindo wa dieyanelo* kana kanga lokaki+ kana ɔtɛmɔdi wa dikishi kana ɔtɛnganyi* kana ombidjɔki wa wanu+ kana ɔpɔtwanyi,+ ndo diaha nyu ndɛ kaanga ndɛ la onto ɔsɔ.
12 Nɛ dia kasami la anto wa l’andja katomaalombosha? Shi nyu nomboshaka anto wele l’etei,
13 etena kele Nzambi nomboshaka wanɛ wele l’andja?+ “Nyonya kanga kɔlɔ ɔsɔ oma l’atei anyu.”+
Nɔtɛ ka l'ɛse ka dikatshi
^ Grɛkɛ, por·neiʹa. Enda Elembetshielo.
^ Grɛkɛ, por·neiʹa. Enda Elembetshielo.
^ Tshɛk., “ekɔ la.”
^ Kana “ntshika mbɔtɔnɛ.”
^ Enda Elembetshielo, “Awui wa mindo wa dieyanelo.”
^ Enda Elembetshielo, “Awui wa mindo wa dieyanelo.”
^ Kana “ntshika mbɔtɔnɛ.”
^ Enda Elembetshielo, “Awui wa mindo wa dieyanelo.”
^ Kana “onto latondja ɛtɛkɛta wa kɔlɔ.”
