1 Samuɛlɛ 21:1-15
21 L’ɔkɔngɔ diko, Davidɛ akatokoma la Nɔbɔ+ le ɔlɔmbɛdi Ahimɛlɛkɛ. Ahimɛlɛkɛ akatatɛ nsaka lokomba lam’akandɛnyi Davidɛ, ko akawotɛ ate: “Lande na keyɛ wɛmɛ ndo ndooko onto lele kaamɛ la yɛ?”+
2 Davidɛ akakadimola ɔlɔmbɛdi Ahimɛlɛkɛ ate: “Nkumekanga akambutɛ dia dimi nsala dui dimɔtshi, koko nde akate ate: ‘Aha kaanga onto 1 mbeya awui wendana la lɔkɛndɔ lamomokotoma ndo awui wamomokotɛ.’ Dimi lakokana la ɛlɔngɔ ami w’apami dia tohomana la wɔ dihole dimɔtshi.
3 Naka wɛ ekɔ la mapa 5 lango, ombishawɔ, kana ɛngɔ kekina tshɛ kele la yɛ.”
4 Koko ɔlɔmbɛdi akakadimola Davidɛ ate: “Ndooko mapa ko mapa lanɛ, paka mapa w’ekila+ naka ɛlɔngɔ w’apami akɔ wakakakitɔna la wamato.”*+
5 Davidɛ akakadimola ɔlɔmbɛdi ate: “Lo mɛtɛ, sho takakakitɔna la wamato oko wakidiɔ lo mbala yetshi lam’akamatshɔka dia tɔlɔsha.+ Naka alemba w’ɛlɔngɔ w’apami akɔ mongaka ekila lo nkɛndɔ y’anyanya, kete hoke ɛlɔ! Shi vɔ wayoleka monga ekila?”
6 Ko ɔlɔmbɛdi akawosha mapa w’ekila,+ nɛ dia mapa ekina komonga laawɔ, onyake paka mapa wa lɛɛnya wakawanya oma la ntondo ka Jehowa, ko vɔ nkitsha mapa w’eyoyo lushi lakawawanya.
7 Okambi ɔmɔtshi waki Saolo aki laawɔ lushi lakɔ okimame la ntondo ka Jehowa. Lokombo lande Dɔɛngɛ,+ ose Ɛdɔmɛ,+ owandji w’alami w’ɛkɔkɔ waki Saolo.
8 Ko Davidɛ akatɛ Ahimɛlɛkɛ ate: “Onde wɛ ndooko la dikɔnga kana lokuwa la ta lanɛ? Dimi kɔmbɔsa lokuwa la mi la ta kana ehomɔ kekina tshɛ ka ta, nɛ dia nkumekanga akantome lɔkɛndɔ la wanyandja.”
9 Ko ɔlɔmbɛdi akate ate: “Lokuwa la ta laki Ngɔliyatɛ+ ose Filistiya lakayadiake lo Okidi* wa Ela+ lekɔ lanɛ. Lɔ mɔmbama la dihɔndɔ l’ɔkɔngɔ w’efodɛ.+ Naka wate liɔshi ko wɛ liɔsa, nɛ dia lɔ loto mbele lanɛ.” Davidɛ akate ate: “Ndooko lɔnɛ lolileki. Ombishalɔ.”
10 Davidɛ akonɛɛ lushi lɔsɔ ndo akatetemala ndawɔ+ Saolo, ko nde akatokoma laka Akishi, nkumekanga ka Ngata.+
11 Ekambi wa Akishi wakawotɛ vate: “Shi ɔnɛ Davidɛ, nkumekanga ka wodja awɔ? Shi nde kele ɔnɛ lakawembɛka lam’akawanɔka lokombe, wata vate:
‘Saolo ambodiaka nunu nunu diande,Ndo Davidɛ nunu+ akumi akumi diande’?”
12 Davidɛ akalame ɛtɛkɛta ɛsɔ l’otema ndo nde akoke Akishi, nkumekanga ka Ngata wɔma+ efula.
13 Ko nde akadimbiya dadi la ntondo kawɔ ndo akasale akambo oko kanga dadi+ l’atei awɔ.* Nde akekɛka eshidi lo nkuke ya la soko ndo akakɛlaka ndɔdu lo ndɛdu yande.
14 Ko Akishi akatɛ ekambi ande ate: “Nyu mɛnaka dia pami kɛnɛ ekɔ dadi! Lande na kayanyambelande?
15 Onde aladi wele lami lanɛ ɔkɛkɛ mbewɔ, katomonga l’ohomba wa nyu mbela onto lasala akambo oko kanga dadi la ntondo kami? Onde onto ɔnɛ pombaka mbɔtɔ lo luudu lami?”
Nɔtɛ ka l'ɛse ka dikatshi
^ Kana “wakayalame diaha nsala dieyanelo.”
^ Kana “Okidi w’Ebamubamu.”
^ Tshɛk., “lo anya awɔ.”
