1 Samuɛlɛ 22:1-23
22 Ko Davidɛ akamɔ oma laawɔ,+ akatoyashɛ lo wooko wa Adulama.+ Lam’akoke anango ndo ase luudu la she tshɛ dui sɔ, vɔ wakaholɔ lɛkɔ le nde.
2 Wanɛ tshɛ waki la ekakatanu, la abasa ndo la lɔkɔnyɔ* wakatshumana lalende, ko nde akayala owandji awɔ. Apami oko 400 waki kaamɛ la nde.
3 L’ɔkɔngɔ diko, Davidɛ akamɔ oma laawɔ, ko akatshu la Mizipɛ ka la Mɔaba+ ndo akatotɛ nkumekanga ka Mɔaba ate: “Lam’alangayɛ, etawɔ dia papa la mama ntshikala kaamɛ la yɛ polo lam’ayomeya kɛnɛ kayonsalɛ Nzambi.”
4 Ɔnkɔnɛ, nde akaatshike le nkumekanga ka Mɔaba, ko vɔ wakadjasɛ kaamɛ la nde edja tshɛ kaki Davidɛ lo longele.+
5 Oma laasɔ, omvutshi Ngada+ akatɛ Davidɛ ate: “Takotshikala lo longele. Mɔ oma lanɛ, tshɔka lo ɛtshi ka nkɛtɛ ka Juda.”+ Ko Davidɛ akamɔ ndo akatshu otsha l’okonda wa Hɛrɛtɛ.
6 Saolo akoke dia Davidɛ nde l’apami waki kaamɛ la nde wambɛnama. L’etena kɛsɔ, Saolo akadjasɛ la Ngibɛa+ l’ɛse k’osongo wa tamarisɛ waki lo dihole dia la diko okime dikɔnga diande lo lonya, ndo ekambi ande tshɛ wakemala lalende mbodinga.
7 Ko Saolo akatɛ ekambi ande wakemala lalende ate: “Nyu aseka Bɛnjamina le, nyompokame lam’alanganyu. Onde ɔna Jɛse+ nde lawɔ ayonyosha nyu tshɛ dikambɔ ndo dikambɔ dia vinyɔ? Onde nde ayonyɔsɔna nyu tshɛ ewandji w’anto nunu nunu ndo ewandji w’anto nkama nkama?+
8 Nyu tshɛ nyakambɔtwɛ sheke! Ndooko onto lakambutɛ etena kakadje ɔnami hita sheke nde la ɔna Jɛse!+ Ndooko onto l’atei anyu lakamboke kandji ndo lakambewoya dia ɔnami hita ambotshutshuya okambi ami hita dia nde mpolama dia ndɔshami, oko wediɔ kakianɛ.”
9 Ko Dɔɛngɛ+ ose Ɛdɔmɛ lakemala laawɔ ndo laki owandji w’ekambi wa Saolo akate ate:+ “Dimi lakɛnyi lam’akaye ɔna Jɛse la Nɔbɔ le Ahimɛlɛkɛ ɔna Ahitubɛ.+
10 Nde akambola Jehowa kanyi lo dikambo diande ndo akawosha mpamba. Nde akawosha ndo lokuwa la ta laki Ngɔliyatɛ ose Filistiya.”+
11 Ko nkumekanga akatome anto dia tɔsa Ahimɛlɛkɛ ɔna ɔlɔmbɛdi Ahitubɛ ndo ɛlɔmbɛdi tshɛ wa lo luudu la she waki la Nɔbɔ. Ko vɔ tshɛ wakaye le nkumekanga.
12 Saolo akate ate: “Wɛ ɔna Ahitubɛ, ompokame lam’alangayɛ!” Ko nde akakadimola ate: “Lotui le yɛ, nkumɛmi!”
13 Saolo akawotɛ ate: “Lande na kakanyambɔtwɛ sheke wɛ la ɔna Jɛse lo mbosha mapa la lokuwa la ta ndo lo mimbola Nzambi kanyi lo dikambo diande? Nde ekɔ lo ndɔshana la mi ndo ambompolamɛ, oko wediɔ kakianɛ.”
14 Ko Ahimɛlɛkɛ akakadimola nkumekanga ate: “L’atei w’ekambi ayɛ tshɛ, akɔna akokayɛ ndeka mbɛkɛ otema* le nde oko Davidɛ?+ Nde ekɔ okilo+ wa nkumekanga, owandji w’alami ayɛ ndo onto lele la nɛmɔ efula lo luudu layɛ.+
15 Onde ɛlɔ kamboyonga mbala ka ntondo ka dimi mimbola Nzambi kanyi lo dikambo diande?+ Dimi haakoke nsala pondjo kɛnɛ katayɛ kɛsɔ! Nkumekanga atɛndjake okambi ande ndo ase luudu l’otondo la papa onongo, nɛ dia okambi ayɛ kombeya ndooko dui lo dikambo sɔ.”+
16 Koko nkumekanga akate ate: “Ahimɛlɛkɛ le, ndooko onyake wɛ ayovɔ+ wɛ l’ase luudu+ la shɔ tshɛ.”
17 Ko nkumekanga akatɛ alami* wakemala suke la nde ate: “Nyokadimɔ ndo nyodiake ɛlɔmbɛdi wa Jehowa, nɛ dia vɔ wambeta la Davidɛ wedi! Vɔ wakeyaka dia nde ekɔ lo talawɔ, ko vɔ kombutɛmi!” Koko ekambi wa nkumekanga konanga mbahɛ ɛlɔmbɛdi wa Jehowa anya dia mbadiaka.
18 Ko nkumekanga akatɛ Dɔɛngɛ ate:+ “Kadimɔ ndo diaka ɛlɔmbɛdi!” Mbala kakɔ ɔtɔi, Dɔɛngɛ ose Ɛdɔmɛ+ akatshu, ko akadiake ɛlɔmbɛdi akɔ ndamɛ. Lushi lɔsɔ, nde akadiake apami 85 wakalɔtɛ efodɛ+ wa linɛnɛ.
19 Nde akalanya ndo Nɔbɔ,+ osomba w’ɛlɔmbɛdi la lokuwa la ta. Nde akadiake apami, wamato, ana w’akɛnda, ana w’ashashi, ngɔmbɛ, mponda ndo ɛkɔkɔ la lokuwa la ta.
20 Koko ɔna Ahimɛlɛkɛ ɔna Ahitubɛ ɔmɔtshi, lokombo lande Abiyatara+ akahande ndo akalawɔ dia ndjela Davidɛ.
21 Abiyatara akatotɛ Davidɛ ate: “Saolo ambodiaka ɛlɔmbɛdi wa Jehowa.”
22 Ko Davidɛ akatɛ Abiyatara ate: “Lakeyaka lushi+ laki Dɔɛngɛ ose Ɛdɔmɛ laawɔ dia nde ayotɛ Saolo. Dimi kele la onongo wa nyɔi k’onto tshɛ* la lo luudu la shɔ.
23 Tshikala kaamɛ la mi. Tokake wɔma, nɛ dia onto tshɛ layanga lɔsɛnɔ* layɛ amboyanga lɔsɛnɔ* lami. Dimi layokokokɛ.”+
Nɔtɛ ka l'ɛse ka dikatshi
^ Kana “waki l’anima w’ololo.”
^ Kana “monga la kɔlamelo.”
^ Tshɛk., “andawi.”
^ Kana “k’anima tshɛ.”
^ Kana “anima.”
^ Kana “anima.”
