1 Samuɛlɛ 23:1-29
23 Oma laasɔ, wakayotɛ Davidɛ ɔnɛ: “Ase Filistiya wekɔ lo ndɔsha Keila+ ndo wekɔ lo mimba diangɔ dia l’ahole w’esuswelo.”
2 Ko Davidɛ akambola Jehowa kanyi ate:+ “Ntshu todiake ase Filistiya asɔ?” Jehowa akatɛ Davidɛ ate: “Tshɔka todiake ase Filistiya kele totshungole Keila.”
3 Koko anto wa Davidɛ wakawotɛ vate: “Lanɛ la Juda+ mbeso la wɔma, kete hoke naka sho ntshɔ la Keila tɔlɔ l’andɔshi wa ta w’ase Filistiya!”+
4 Ko Davidɛ akambola Jehowa+ kanyi nto. Jehowa akookadimola ate: “Onɛɛ, holɔ otsha la Keila, nɛ dia dimi layokimɔ ase Filistiya lo anya+ ayɛ.”
5 Ko Davidɛ akatshu nde l’anto ande otsha la Keila ndo wakatɔlɔsha ase Filistiya. Nde akɔshi dongalonga diawɔ ndo akaadiake lo yɛdikɔ y’efula, ko Davidɛ akatshungola ase Keila.+
6 Lam’akalawɔ Abiyatara+ ɔna Ahimɛlɛkɛ otsha le Davidɛ la Keila, nde aki la efodɛ.
7 Wakatotɛ Saolo vate: “Davidɛ amboya la Keila.” Ko Saolo akate ate: “Nzambi ambookimɔ lo anya ami,+ nɛ dia nde amboyatadia lo djonga lo mbɔtɔ l’osomba wele la nkuke ndo la tokengete.”
8 Ko Saolo akatshumanya anto tshɛ dikambo dia ta, dia vɔ mpolɔ otsha la Keila ndo todinga Davidɛ nde l’anto ande.
9 Lam’akeye Davidɛ dia Saolo ekɔ lo ndjalɔngɔsɔla dia mbɔlɔsha, nde akatɛ ɔlɔmbɛdi Abiyatara ate: “Yaka la efodɛ lanɛ.”+
10 Ko Davidɛ akate ate: “Jehowa Nzambi k’Isariyɛlɛ le, okambi ayɛ amboka mɛtɛ dia Saolo ekɔ lo nanga ndja la Keila dia ndjolanya osomba l’ɔtɛ ami.+
11 Onde ewandji* wa Keila wayonkimɔ lo anya ande? Onde Saolo ayoya oko wamboka okambi ayɛ? Jehowa Nzambi k’Isariyɛlɛ le, lam’alangayɛ, tɛ okambi ayɛ.” Ko Jehowa akate ate: “Nde ayoya.”
12 Davidɛ akambola ate: “Onde ewandji wa Keila wayonkimɔ dimi l’anto ami lo anya wa Saolo?” Jehowa akakadimola ate: “Vɔ wayokokimɔ.”
13 Aha la ntshimbatshimba, Davidɛ akonɛɛ nde l’anto ande, apami oko 600+ ndo vɔ wakamɔ oma la Keila, ko wakatshu lɛnɛ akawakoke ntshɔ. Lam’akawatotɛ Saolo ɔnɛ Davidɛ ambolawɔ oma la Keila, nde komboyela.
14 Davidɛ akatshikala l’oswe lo ahole wele wolo onto nkoma, lo lɛkɛ l’akona la l’oswe wa Zifu.+ Saolo akatetemala+ mboyanga, koko Jehowa kombokimɔ lo anya ande.
15 Davidɛ akeye dia* Saolo akatombe dia nyanga lɔsɛnɔ* lande etena kaki Davidɛ l’oswe wa Zifu la Hɔrɛshɛ.
16 Ko Jɔnatana ɔna Saolo akatshu otsha le Davidɛ la Hɔrɛshɛ ndo nde akookimanyiya dia nde nkondja wolo* le Jehowa.+
17 Nde akawotɛ ate: “Tokake wɔma, nɛ dia Saolo ka papa hatokɛna. Wɛ ayonga nkumekanga l’Isariyɛlɛ+ ndo dimi layonga onto la 2 oma laleyɛ. Kaanga Saolo ka papa mbeyaka dikambo sɔ.”+
18 Ko vɔ akɔ 2 wakadje sheke+ la ntondo ka Jehowa ndo Davidɛ akatshikala la Hɔrɛshɛ, ko Jɔnatana akakalola lakande.
19 L’ɔkɔngɔ diko, ase Zifu wakatshu le Saolo la Ngibɛa+ ko wakatowotɛ vate: “Shi Davidɛ ndjashɛ suke la so+ lo ahole wele wolo onto nkoma wa la Hɔrɛshɛ,+ lo kionakona ya Hakila+ yele lo sidɛ* ka Jeshimɔna?*+
20 Nkumekanga le, etena tshɛ kayoyolanga,* koye, ko sho tayowokimɔ lo anya wa nkumekanga.”+
21 Ko Saolo akate ate: “Jehowa anyɔtshɔkɔlɛ, nɛ dia nyu nyambomboka kɛtshi.
22 Lam’alanganyu, nyotshu nyotoyange dia mbeya dihole shikaa diende ndo onto lakawɛnyi lɛkɔ, nɛ dia wakambutɛ dia nde ekɔ kanga kɛsɔ efula.
23 Nyotoshikikɛ dimɛna ahole tshɛ watondoyashɛka kele kanyoyonshikikɛ. Oma laasɔ, dimi layoyotshɔ kaamɛ la nyu ndo naka nde ekɔ l’ɛtshi kakɔ ka nkɛtɛ, dimi layowoyanga l’atei wa nunu di’ase Juda tshɛ.”
24 Ko vɔ wakonɛɛ ndo wakatshu otsha la Zifu+ la ntondo ka Saolo etena kele Davidɛ nde l’anto ande waki l’oswe wa Maɔna,+ lo Araba+ lo sidɛ ka Jeshimɔna.
25 Oma laasɔ, Saolo akatshu l’anto ande dia tooyanga.+ Lam’akawatɛ Davidɛ dui sɔ, mbala kakɔ ɔtɔi nde akaholɔ otsha lo dive+ ndo akatotshikala l’oswe wa Maɔna. Lam’akoke Saolo dui sɔ, nde akayelana la Davidɛ l’oswe wa Maɔna.
26 Lam’akakome Saolo lo wedi ɔmɔtshi wa dikona, Davidɛ nde l’anto ande waki lo wedi okina wa dikona. Davidɛ akatalawɔka+ Saolo, koko Saolo nde l’anto ande wakatayelanaka la Davidɛ nde l’anto ande dia mbanda.+
27 Koko ɔkɛndji ɔmɔtshi akaye le Saolo ndjowotɛ ɔnɛ: “Yaka esadi, nɛ dia ase Filistiya wambɔtwɛ wodja!”
28 Saolo akatshike ndjelana la Davidɛ+ ko akatshu dia tɔlɔ l’ase Filistiya. Diakɔ dielamɛ dihole sɔ ɔnɛ Dive di’Okakitɔnelo.
29 Oma laasɔ, Davidɛ akamɔ oma lɛkɔ ko akatodjasɛ lo ahole wele wolo onto nkoma wa la Ɛnɛ-Ngɛdi.+
Nɔtɛ ka l'ɛse ka dikatshi
^ Kana ondo “akanga wa ngelo.”
^ Kana ondo “aki la wɔma l’ɔtɛ wa.”
^ Tshɛk., “ekɔ lo tayange anima ande.”
^ Tshɛk., “nde akakeketsha lonya lande.”
^ Tshɛk., “lo lɛkɛ la lonya l’omi.”
^ Kana ondo “oswe; oswe wa shɛnga.”
^ Kana “kayolanga anima ayɛ.”
