1 Samuɛlɛ 28:1-25
-
Saolo ambotshɔ le womoto latɛkɛtsha dimu la Ɛnɛ-Dɔra (1-25)
28 Lo nshi shɔ, ase Filistiya wakatshumanya asɔlayi awɔ dia ndɔsha ase Isariyɛlɛ.+ Ko Akishi akatɛ Davidɛ ate: “Kaa wɛ mbeyaka dia wɛ l’anto ayɛ nyayotshɔ kaamɛ la mi+ lo ta?”
2 Ko Davidɛ akatɛ Akishi ate: “Lo mɛtɛ, wɛ mbeyaka kɛnɛ kayosala okambi ayɛ.” Akishi akatɛ Davidɛ ate: “Diakɔ diayomokɔsɔna dia wɛ monga olami ami wa pondjo.”*+
3 L’etena kɛsɔ ko Samuɛlɛ ambovɔka ndo ase Isariyɛlɛ tshɛ wakoolele ndo wakookundɛ la Rama, osomba ande hita.+ Saolo akatshanya wanɛ watɛkɛtsha dimu ndo waa wetshi oma lo wodja.+
4 Ase Filistiya wakasangana ndo wakatshu ko wakatoka mpango kawɔ la Shunɛma.+ Ɔnkɔnɛ Saolo akatshumanya ase Isariyɛlɛ tshɛ, ko wakake mpango kawɔ la Ngiliboa.+
5 Lam’akɛnyi Saolo mpango k’ase Filistiya, nde akoke wɔma ndo otema ande wakadidima efula.+
6 Kaanga mbakambolaka Saolo Jehowa+ kanyi, Jehowa kombokadimola ndooko lushi, oyadi lo alɔ kana lo tshimbo ya Urimɛ+ kana lo tshimbo y’amvutshi.
7 Ko Saolo akatɛ ekambi ande ate: “Nyonyange womoto ɔmɔtshi latɛkɛtsha dimu+ kele kantshu le nde dia towombola.” Ekambi ande wakakadimola vate: “Eenda, womoto ɔmɔtshi latɛkɛtsha dimu ekɔ la Ɛnɛ-Dɔra.”+
8 Ko Saolo akatshikitanya ɛnamelo kande ndo akalɔtɛ ahɔndɔ akina, ko akatshu le womoto akɔ l’otsho kaamɛ l’anto ande 2. Nde akate ate: “Lam’alangayɛ, sala diendja lo nsala oko onto latɛkɛtsha dimu+ kele ontondje onto layomokotɛ.”
9 Koko womoto akɔ akawotɛ ate: “Onde wɛ heye kɛnɛ kakasale Saolo, woho wakandatshanya wanɛ watɛkɛtsha dimu ndo waa wetshi oma lo wodja?+ Ko lande na kamambayɛ* djonga wate kele wayondjake?”+
10 Ko Saolo akootshibɛ lo lokombo la Jehowa ate: “Lo mɛtɛ oko wele Jehowa la lɔsɛnɔ, wɛ hatonga ndooko la onongo lo dikambo nɛ!”
11 Ko womoto akɔ akate ate: “Onto akɔna ahombami kotondjɛ?” Nde akakadimola ate: “Ontondje Samuɛlɛ.”
12 Lam’akɛnyi womoto akɔ “Samuɛlɛ,”*+ nde akade kioko la wolo tshɛ ndo akatɛ Saolo ate: “Lande na kakayankeshi? Wɛ ekɔ Saolo!”
13 Nkumekanga akawotɛ ate: “Tokake wɔma. Ko amboyɛna?” Womoto akɔ akakadimola Saolo ate: “Lambɛna onto ɔmɔtshi lele oko jambizambi ayatombe oma lo nkɛtɛ.”
14 Ko nde akawombola ate: “Ngande wende?” Nde akate ate: “Pami k’osombe kayatombe ndo nde ndɔta okutu wele bu la anya.”+ Ko Saolo akashihodia dia ɔsɔ ekɔ “Samuɛlɛ,” ko nde akakɔlama ko akakusama.
15 Ko “Samuɛlɛ”* akatɛ Saolo ate: “Lande na kamboyomfutanya lo tondjami?” Saolo akakadimola ate: “Lekɔ l’okakatanu wa wolo. Ase Filistiya wekɔ lo ndɔshami ndo Nzambi ambomboka ɔkɔngɔ ndo nde hayonkadimola oyadi lo tshimbo y’amvutshi kana lo alɔ.+ Diakɔ diamomokelɛ dia wɛ mbutɛmi kɛnɛ kahombami nsala.”+
16 “Samuɛlɛ”* akate ate: “Lande na kamimbolayɛ kanyi lam’ele Jehowa ambokooka ɔkɔngɔ+ ndo aya ɔndɔshi ayɛ?
17 Jehowa ndamɛ ayosala kɛnɛ kakandatatshi lo tshimbo yami ɔnɛ: Jehowa ayonya diolelo oma lo anya ayɛ ko ayodisha Davidɛ,+ osekayɛ pami.
18 Lam’ele wɛ kokitanyiya dui dia Jehowa ndo wɛ kɔmɛnya nkɛlɛ kande kadɔdɔ le ase Amalɛka,+ diakɔ diakosalɛ Jehowa akambo anɛ ɛlɔ.
19 Ndo Jehowa ayokokimɔ wɛ la Isariyɛlɛ lo anya w’ase Filistiya,+ ndo loyi+ wɛ l’anayɛ w’apami+ nyayonga kaamɛ la mi. Ndo nto, Jehowa ayokimɔ asɔlayi w’Isariyɛlɛ lo anya w’ase Filistiya.”+
20 Mbala kakɔ ɔtɔi, Saolo akayahomanya la nkɛtɛ ndo akoke wɔma w’efula l’ɔtɛ wa kɛnɛ kakawotɛ “Samuɛlɛ.”* Nde komonga la wolo nto, nɛ dia nde kɔɔndɛ ndooko ɛngɔ yanyi y’otondo ndo otsho w’otondo.
21 Lam’akaye womoto akɔ le Saolo ndo lam’akandɛnyi dia nde ambohandjɔ wɔɔngɔ efula, womoto akɔ akawotɛ ate: “Okambi ayɛ ambokitanyiya kɛnɛ kakayatshi ndo dimi lakadji lɔsɛnɔ lami lo waale,*+ ko lakasadi kɛnɛ kakayambute.
22 Lam’alangayɛ, aya wɛ mpokamɛ kɛnɛ kakotɛ okambi ayɛ. Etawɔ dia dimi nkitsha ɛtshi ka mapa la ntondo kayɛ kele lɛka dia wɛ nkondja wolo wa wɛ ntshɔ.”
23 Koko nde akatone, ata ate: “Dimi hantɔlɛ.” Ko ekambi ande ndo womoto akɔ wakatetemala mbɔsɛngasɛnga. L’edjedja ka wonya, nde akayowaokɛka ko akemala oma la nkɛtɛ ko akadjasɛ lo mbeto.
24 Womoto akɔ aki la yana ya ngɔmbɛ ya wata lakande, ko nde akayidiake* esadi esadi ndo akɔshi ofushi ko akasɔhɛ ndo akakatɛ mapa waha la wodoya.
25 Nde akasha Saolo la ekambi ande diangɔ diakɔ, ko vɔ wakale. L’ɔkɔngɔ wa laasɔ, vɔ wakonɛɛ ko wakatshu l’otsho.+
Nɔtɛ ka l'ɛse ka dikatshi
^ Tshɛk., “olami w’ɔtɛ ami nshi tshɛ.”
^ Kana “kambayɛ anima ami.”
^ Kana “kɛnɛ kakɛnamaka oko Samuɛlɛ.”
^ Kana “kɛnɛ kakɛnamaka oko Samuɛlɛ.”
^ Kana “kɛnɛ kakɛnamaka oko Samuɛlɛ.”
^ Kana “kɛnɛ kakɛnamaka oko Samuɛlɛ.”
^ Kana “lakakitshisha anima ami lo lonya lami.”
^ Kana “akayilambola.”
