1 Samuɛlɛ 29:1-11
-
Ase Filistiya kondjaɛkɛ le Davidɛ (1-11)
29 Ase Filistiya+ wakasanganya asɔlayi awɔ tshɛ la Afɛkɛ etena kele ase Isariyɛlɛ wakake mpango kawɔ suke la ɛtɛkɔ ka la Jezɛrɛlɛ.+
2 Nkumi ya la Filistiya waketaka laawɔ kaamɛ la nkama yawɔ ndo nunu diawɔ di’asɔlayi ndo Davidɛ l’anto ande wakatakɛndakɛndaka l’ɔkɔngɔ vɔ la Akishi.+
3 Ko ewandji wa la Filistiya wakate vate: “Lande na kele ase Hɛbɛru anɛ lanɛ?” Akishi akakadimola ewandji wa la Filistiya ate: “Ɔnɛ Davidɛ, okambi wa Saolo nkumekanga k’Isariyɛlɛ. Nde ambodjasɛ kaamɛ la mi l’edja k’ɔnɔnyi kana ndekana.+ Dimi hantanyi ndooko kɔlɔ le nde ntatɛ lushi lakandalawɔ le mi polo ndo ɛlɔ.
4 Koko ewandji wa la Filistiya wakawomalɛ ndo wakawotɛ vate: “Kaloyande.+ Tshikande akalole lo dihole diakayookitsha. Tetawɔke dia nde mpolɔ kaamɛ la so lo ta diaha nde totokadimwɛ wonya wa ta.+ Nɛ dia, shi ayoleka dimɛna sho mbetsha ɛtɛ w’anto aso dia vɔ ndɔ la nkumɛnde lo dihole dia ndamɛ ndɔ la nkumɛnde?
5 Shi ɔnɛ Davidɛ lakawembɛka lam’akawanɔka lokombe, wata vate:
‘Saolo ambodiaka nunu nunu diande,Ndo Davidɛ nunu+ akumi akumi diande’?”
6 Ko Akishi+ akelɛ Davidɛ ndo akawotɛ ate: “Lo mɛtɛ oko wele Jehowa la lɔsɛnɔ, wɛ ekɔ onto ɔlɔlɔ ndo dimi lekɔ l’ɔngɛnɔngɛnɔ dia ntshɔ la yɛ lo ta kaamɛ l’asɔlayi+ ami, nɛ dia dimi hantanyi ndooko kɔlɔ le yɛ ntatɛ lushi lakayaye le mi polo ndo ɛlɔ.+ Koko nkumi hawoyaɛkɛ le yɛ.+
7 Ɔnkɔnɛ, kalola la ki ndo tosalake ndooko dikambo diayonyangiya nkumi ya la Filistiya.”
8 Koko Davidɛ akatɛ Akishi ate: “Lande na? Amomosala? Kɔlɔ kakɔna kamboyotana le okambi ayɛ ntatɛ lushi lakamaye le yɛ polo ndo ɛlɔ? Lande na kahamahombe ntshɔ kaamɛ la yɛ dia tɔlɔsha atunyi wa nkumɛmi nkumekanga?”
9 Akishi akakadimola Davidɛ ate: “Lo kanyi yami, wɛ ekɔ ɔlɔlɔ oko ondjelo wa Nzambi.+ Koko ewandji wa la Filistiya wakatshi vate: ‘Tetawɔke dia nde ntshɔ kaamɛ la so lo ta.’
10 Ɔnkɔnɛ, ketɔ la pindju ka pɛɛ kaamɛ la ekambi wa nkumɛyɛ wakaye kaamɛ la yɛ; kanyonee ndo kanyotshu la pindju ka pɛɛ kam’ayohotɔ wonya.”
11 Ko Davidɛ nde l’anto ande wakonɛɛ la pindju ka pɛɛ ndo wakakalola otsha l’ɛtshi ka nkɛtɛ k’ase Filistiya ndo ase Filistiya wakadɛ otsha la Jezɛrɛlɛ.+
